الـــــــرضـــــــــا بالـــــــمقـــــــســــــــــوم عـــــــبـــــــــــــاده

الديموقراطيه الاخرى

2010-09-19T13:36:00.000-07:00

الديموقراطيه :هى حق طبيعى ومشروع لكل شخص فى ان يعبر عن رأيه واحتياجاته فى الحياه .

الديموقراطيه الاخرى :هى عباره عن هبه او منحه من الحكومه للشعب على غرار (هذا وقد صرح السيد المسئول ان الاعتصامات والاضرابات ماهى الا دليل على الديموقراطيه الى نحياها فى مصر ) وقد تتحول الى (ذله )على غرار (مش كفايه ان احنا سايبينكم ياغجر تشتموا فينا وساكتين عليكو).

الديموقراطيه :كلمه موجوده فى كل زمان ومكان وعلى كل لسان .

الديمواقراطيه الاخرى: يتذكرها المسئولون فقط فى برامج التوك شو فى المداخلات التليفونيه او على الهواء.

الديموقراطيه: هى ان يكون لرأيك اهميه وترى رد فعل له حتى لا تشعر انك (بتخبط راسك فى الحيط),

الديموقراطيه الاخرى: هى ان تقول رايك سواء كان له اهميه ام لا على غرار(قول الى انت عايزه واحنا هنعمل الى احنا عايزينه وابقى قابلنا لو عملنا الى انت عايزه).

الديموقراطيه :هى فعل ورد فعل

الديمواقراطيه الاخرى : هى فعل بدون رد فعل

الديمواقراطيه: مثل الهواء والماء تجده فى كل وقت

الديمواقراطيه الاخرى : مثل قرص المسكن تجده عند اللزوم فقط

الديموقراطيه : هى حكم الشعب

الديموقراطيه الاخرى: حكم اى شخص الا الشعب

الديمواقراطيه :هى صوره جميله من صور الحريه .

الديمواقراطيه الاخرى : صوره متجمله من صور الديكتاتوريه.

عبد الناصر ............... وانا

2010-04-25T13:00:00.000-07:00

يعتقد الكثيرون من حولى بل كونوا فكره راسخه عنى اننى من اعداء الرئيس الراحل عبد الناصر وكأنه يوجد بينى وبينه طار سابق مع انه (والله العظيم عمرى ماشفته قبل كده) ولا اعلم عنه شيئا اكثر ما يعلم عنه ابناء وبنات جيلى .

وهذه الفكره للاسف ترسخت فى اذهان هؤلاء بسبب نظرة الدهشه العظيمه التى ترتسم على وجهى عندما اسمع عن فلان انه ناصرى او عندما تظهر على طرف فمى شبه ابتسامة سخريه عنددا اسمع اغنيه من الاغانى التى كان يقدمها له عبد الحليم حافظ بكل حماس وحب . ومن ثم اجد على راسى سيل من التهكمات والعبارت على غرار ...... انتى يا مفعوصه مش بتحبى عبد الناصر ؟ يا ندامه هو فيه حد ميبحبش ناصر ؟ اكيد انتى بتحبى السادات علشان كده بتكرهى عبد الناصر؟ده عبد الناصر ده كان هو ناصر الغلابه .

وهكذا تجدوننى مثل الكتكوت الذى وقع فى براثن قط اغبى من القط توم . وخصوصا عندما انقد وضعا كان موجود فى زمن الزعيم الفاتح عبد الناصر

والحقيقه اننى لا اكره ابدا عبد الناصر .ولكنى اتعجب من ان يكون الواحد ناصرى . ما معنى ان يكون الواحد ناصرى على وزن شافعى ومالكى وحنبلى . انا حتى الان لا اقدر على استيعاب هذه الفكره . واذا اصبحت قادره على استعابها فمن الاولى ان اطلق على نفسى ايمان الكامليه لاننى من عشاق الزعيم المناضل مصطفى كامل

فعلى الاقل( عبد الناصر كان يؤدى مهام وظائفه كرئيس للدوله . اما الزعماء امثال مصطفى كامل وسعد زغلول لم يطلب منهم احد ذللك )

الفكره نفسها غريبه وتثير فى نفسى التعجب من صفات الفاتح والمنقذ والعادل التى يطلقها من يحبون عبد الناصر عليه كانه كان فى عدل الفاروق عمر او فى شجاعة القائد العظيم صلاح الدين ويتناسون فى بساطه حدثا مثل نكسة 67 التى حدثت فى عصره وضياع سيناء بسببها

انا لا استطيع ان اجده اكثر من رئيس للدوله فانا اجد ان لكل رئيس اشياء له واشياء عليه وله عيوب مثل ما كانت له مزايا فليس هناك عصر كله حلو و عصر اخر كله مر . كل عصر يوجد الاثنين معا ولا ينفصلان ابدا

لماذا هذا التحيز الاعمى لعبد الناصر فقط ؟ انا شخصيا لا اجد شيئا بعد دينى ووطنى يمكن ان يجعلنى اتحمس له

لماذا عبد الناصر هو الزعيم الوحيد الذى كان الشعب مستعدا ولا يزال مستعد ان يغفر له ذلاته ؟لماذا شخصنوا مصر فى عبد الناصرفقط ؟ حقيقة لا اعلم السبب وواضح اننى لن اعلم

واضح اننا كشعوب عربيه لا نعامل رؤساء الدول على انهم اشخاص معينون من قبلنا نحن لادارة شؤوننا ولكن على انهم اشخاص ضحوا بحياتهم ووقتهم وراحتهم من اجلنا

اعتقد انه عندما يدرك الناس الفارق لن تجد ساعتها ناصرى او ساداتى او فاروقى

البيضه ولا الفرخه ؟؟؟؟؟؟

2010-04-09T12:28:00.000-07:00

سؤال بيلح عليا بقاله كتير ولو حد عنده الاجابه يدلنى علشان ادعيله وانا بصلى
بما انى كل اما تعدى عليا الساعات الاقى ناس كتير مبقاش عندها اى ضمير لا فى معاملتها للناس ولا فى شغلها الى بتقبض عليه واشوف ناس اكتر انعدمت فيهم الشهامه والمروءه بتاعت زمان لدرجة انهم يشوفوا واحده حامل او واحد رجله مبتوره فى القطر ومحدش يفكر يقوم علشان يقعد حد فيهم ده غير الناس الى معندهاش ادنى قدر من الايجابيه واراءهم سلبيه الى درجة الشلل على غرار الى نعرفه احسن من اللى منعرفوش رغم الذل والهوان الى هم عايشين صابحين متمسيين فيه

كل ده بيرجعنى لنفس السؤال
هل يا ترى احنا بقينا كده علشان الى حاكمينا كده ؟
ولا علشان احنا كده فاللى حاكمينا لازم يكونوا كده ؟
حد فاهم حاجه !!!!!!!!!!!!!!!

المهم ان الحاجه الوحيده الى انا متاكده منها ان الى ضايع فى النص نوعين من الناس
الناس الى عندها ضمير ونفسها تعمل شئ بس مش قادره تعمل علشان الى كابسين على نفسها
الناس الغلابه الى عايشين تحت خط الادميه والى مفيش فى ايديهم حاجه يعملوها

الـــــعـــــــــو

2010-03-09T16:04:00.000-08:00

استمعت فى احدى القنوات الفضائيه مؤخرا الى هذه الحاله الغريبه المسماه ب (العو). وانا لاادرى الى الان هل هذه اغنيه حقا ام انها (تريلر) لفيلم رعب . الصدفه والفضول سامحهما الله هما من فعلا فيا هذا وللمره الثانيه على التوالى خصوصا بعد مشاهدتى تحفة (الفنانه العظيمه) هيفاء وهبى الاخيره . فانا عامة لست من هواة مشاهدة قنوات الفيديو كليب بل على العكس فانا استحق بجداره لقب زعيمة كارهى عالم الفيديو كليب الرخيص واعتبره اكبر كارثه على الفن المصرى لانه جعل من كل من (هب ودب) نجم وفنان .وبسببه تاه الفن الجيد الذى يقدمه امثال على الحجار ومحمد منير ومحمد الحلو وسط ما يقدمه امثال هيفاء وهبى وهذا المدعو دياب (المطرب الشعبى القادم) .واتوقف قليلا عند هذه الجمله الاخيره. فمن قال لامثال هؤلاء ان الطرب الشعبى معناه الابتذال والاسفاف والتدنى بالالفاظ والحركات الى هذه الدرجه . هل لانه يسمى شعبى . فهل الشعب يتحدث هذه اللغه البذيئه ويمارس هذه الحركات المتدنيه . مفهوم الطرب الشعبى والذى بدأه الفنان العظيم خفيف الظل عبد المطلب او (طلب) وكما ترسخ فى ذهنى فهو مفهوم قمه فى الرقى . فالمطرب الشعبى هو الشخص القريب من الناس البسطاء والذى يعبر ببساطه عن احاسيسهم وخفة ظلهم وكلامهم البسيط الذى لا يندرج الى الاسفاف . اما الان فان كل من (تطق) فى باله مسالة الشهره والمال يقوم مع بعض زملائه فى الغرزه او القهوه بتاليف وتلحين وغناء اى شئ يخطر على بالهم ثم يقوموا بتعبئتها فى شريط ويبتلى بها امثالى .
ملحوظه . دياب يقصد نفسه ب (العو )فى هذه الاغنيه واعتقد ان لما يخنى ذكائى بان حبيبته التى يغنى لها هى ال(بخ) . واتذكر الان الفنان الرائع ومعشوقى الاول فى عالم الطرب الشعبى محمد رشدى عندما كان يطل علينا بوقاره ووسامته واحترامه ويغنى (قالوا مهرك ست جمال وانا واد جمال على اد الحال ومليش ريس مال غير الموال)

احلام !!!!!!!!!!!!!!

2010-02-20T14:50:00.001-08:00

احلام

.......احلام انتى فين يا بنتى

........نعم يابابا انا هنا اهو

.......كنتى فين . اشمعنى النهارده مفتحتليش الباب زى عادتك

.......اسفه يا بابا اصل كنت بتفرج على فيلم فى التلفزيون

.......فيلم . فيلم ايه؟

........فيلم كارتون بس حلو قوىى يا بابا . فيه اميره جميله قوىى بتغنى وترقص وحواليها حيوانات فيران وارانب وعصافير كلهم بيرقصوا ويغنوا معاها . والامير بيمسع صوتها من بعيد كان جميل برده زيه

قولى يابابا هى لازم الاميره تكون حلوه .

.......لا مش لازم . اهم حاجه ان تكون قلبها طيب وبتحب الناس

.......ايه ده يعنى ممكن اكون اميره .

........وليه لا . انتى اصلا بالنسبه ليا اجمل اميره فى الدنيا .

........خلاص انا هتمنى انى لما اكبر اطلع اميره . واقابل امير زى الى انا شفته فى الفيلم .

____________________________________

......الله

ايه اللوحه الحلوه دى الى انتى رسمتيها يا احلام

......عجبتك يا ابله

........حلوه قوىى . مين الى فى اللوحه دول

........دول بابا وماما وانا واخويا

........وايه البيت الجميل ده . ده بيتكم

.........انا قلت ارسم بيت جميل حواليه جنينه فيها ورد وفل وياسمين وبحيره اصطاد فيها انا اخويا. هو مش زى بيتنا صحيح . بس انا لما هكبر هدور على بيت زى ده علشان نعيش فيه كلنا ومنفترقش عن بعض ابدا. وولادنا وولاد ولادنا يبقوا معانا .

.........ربنا يحققلك الى فى بالك

________________________________

علشان احنا مع بعضينا ولاول مره لوحدينا ولا حدش بيبص علينا غير فرحة قلبنا وعينينا

...................يييييييييه . فلقتينى بالاغنيه دى يا بنتى . طول الطريقه من المدرسه قاعده تغنيها واحنا قاعدين فى الفصل فالقانى بيها . حتى واحنا مروحين كمان

........اعمل ايه . الاغنيه معلقه معايا قوىىى . شفتى الرومانسيه شفتى الحب وجماله

........حب ايه فى الى احنا فيه ده احنا لسه صغيرين على الكلام ده

.........هو الحب له سن يا بنتى . طيب انتى شفتى الفيلم الى جه امبارح . شفتى البطل ابن الناس الاغنيا الى حب بنت فقيره واتحدى العالم علشانها . فكرنى بفيلم كارتون شفته زمان عن امير حب بنت ولما تجوزها بقت اميره زيه

ولا الفيلم الى جه اول ا مبارح الى البطله حبت فيه ابن الجيران . نفسى اقابل الامير او حتى ابن الجيران

.........يابنتى الحاجات دى بتحصل فى الافلام وبس . مش كل بنت يتقابل ابن جيران وتحبه . انتى احلامك كتير قوىى

...........مالها الاحلام الاحلام دى احلى حاجه فى الدنيا .

...........بس مش كل الاحلام بتتحقق

............انا احلامى هتتحقق

_________________________________-

.........احلااااااااااااام

احلااااااااااااام

.........ايوه ايوه انا اهو

..........بتعملى ايه عندك. يييييه انتى لسه بتتفرجى ع الفيلم ده انتى شفتيه اكتر من مليون مره

..........بحبه يا ماما وبحب اتفرج عليه

...........ززانتى من ساعة ما اتخرجتى وانتى مواركيش شغله غير الفرجه ع الافلام الى جايباكى ورا دى. انا حاسه انى مخلفه بنت طالعه من فيلم ابيض واسود

..........يعنى انا لقيت حاجه تانيه اعملها ومعملتهاش

.........طيب يلا وضبى نفس علشان فيه ناس جايين عندنا النهارده

........طيب وانا مالى

........وانتى مالك ازاى .الناس دى جايه عشانك . عريس يعنى

........عريس . وجاى هنا البيت ازاى يعنى

........زى الناس ياختى ولا انتى لسه فاكره ان فارس الاحلام هينزل عليكى بالباراشوت

.........وهو يعنى لو منزلش بالباراشوت يقوم ييجى يتفرج عليا فى البيت

........كل البنات بتتجوز كده

........لكن انا مش هتجوز كده . مش ده الى انا حلمت بيه

.........الى حلمتى بيه حاجه والى بيحصل فى الحقيقه حاجه تانيه فوقى بقى

.........ارحمنى يا رب . اما روح افتح الشباك

.........ليه؟

.......يمكن الاقى ابن الجيران قصدى عايزه اشم شوية هوا

________________________________-

.......خلاص هتسافر

.......ايوه

هتوحشينى قوىى يا اختى

........انا مش عارفه البيت هيكون شكله ازاى من غيرك . ازاى هستحمل اعيش فيه. وانت ازاى هتستحمل تبعد عننا تعيش لوحدك فى الغربه

.....اعمل ايه . مجبر اخال لا بطل . يعنى اقعد عاطل هنا من غير شغلانه وبابا يفضل يصرف عليا وانا كبير كده

.......انا عمرى ما تخيلت ان احنا نبعد عن بعض . شوف . شوف الصوره الى رسمتها لنا زمان . انا وانت وولادنا بنجرى ونلعب مع بعض

........ده واحنا صغيرين . زمان كنا بنحلم من غير تفكير ولا قيود لكن احنا دلوقتى كبرنا وكبرنا ع الاحلام دى

........يعنى الصوره دى كانت كدب

..........لا مش كدب . فى وقتها عمرها ماكانت كدب

........بس دلوقتى ايه قيمتها حبر على ورق

__________________________________

........ايه ياامى انتى كل ما تبصى فى وشى الدمعه تفر من عينيكى كده

........غصب عنى كان نفسى افرح بيكى قبل ما اموت

.........تفرحى بيا . هو انا دلوقتى مزعلاكى

........لا بس كان نفسى اشيل عيالك والعب معاهم زى باقى الخلق . مكتوب عليا اشوف كل الناس بتجوز بناتها وانا لا

.............مسالة الجواز اساسا مبقتش تفرق معايا خلاص وحتى لو اتجوزت وخلفت هعقد على عيال افطسهم باذن الله

.........ليه كده اعوذ بالله

.........عايزانى اجيب عيال للدنيا دى . علشان يبقوا زيى وزى اخويا متبهدلين ومتفرقين . اقولهم احلموا واتمنوا وفى الاخر ايه النهايه . ؟؟؟

_____________________________

........ايوه نعم حضرتك قولتيلى اسمك ايه

.........اسمى احلام

........وعايزه ايه يا انسه احلام . تطلعى بطاقه ولا شهادة ميلاد

.........لا

انا عايزه اغير اسمى !!!!!

مبرووووووووووووك تانى لمصر

2010-01-31T14:32:00.000-08:00

مبروووووووووووووووك لمصر

2010-01-28T15:08:00.000-08:00

7/0
اربع اجوان
وتلاته طرد

ربنا مش بيضيع حق حد

حد يقولى عنوان الحكم ده فين علشان ابعتله شهادة تقدير
مفيش واحد جزائرى قدر يتنفس
فرحتى بالطرد اكتر من الاجوان
ازاى ناس معندهاش اخلاق تلعب رياضه ؟
اذا كان المفروض ان الرياضه بتهذب الاخلاق

فضيحه علنيه لمنتحب الجزائر
ومحدش يقولى بلاش شماته

http://www.seyyarmsn.info/

2010-01-26T12:32:00.000-08:00

اما فتحت الماسنجر بعد طول غياب لقيت اتنين من اصدقائى كاتبين رساله غريبه على الماسنجر وهى انا عملتلهم بلوك من ع الماسنجر
وعرفوا عن طريق الموقع الى مكتوب فوق ده
طبعا انا لغاية دلوقتى مش فاهمه حاجه فى اى حاجه لانى معملتش لحد بلوك اساسا
انا حتى لو مش طايقه الناس الى منضافين عندى عمرى فى حياتى ما هعملهم بلوك

فانا مش عارفه هل ده صح وانا مش واخده بالى ولا العيال دى بتشتغلنى
ياريت د. ليكتر وجنى الى بعتوا الرساله دى يدخلوا يفهمونى
لان صراحه لغاية دلوقتى مش فاهمه

البدايه ..............وبداية صناعة الديكتاتور

2010-01-18T13:24:00.000-08:00

فى البدايه لا انكر اعجابى الشديد وتفاعلى فى طفولتى مع فيلم البدايه للمخرج العبقرى او زعيم عباقرة الاخراج صلاح ابو سيف. ولكن اعجابى به كان مجرد اندماج مع فيلم رايته وقتها كفيلم مضحك فانتازى لا ااكثر ولا اقل بدون الاهتمام باسم المخرج او المؤلف او غيرهما

لكن مع التقدم فى العمر واكتساب الخبرات وبعيدا عن الانبهار الطفولى فهذا الفيلم لا يتوقف عن ابهارى يوما بعد يوم ومع كل مره اشاهده فيه

فهذا الفيلم على الرغم من بساطته فهو يحمل عمق غير عادى فى داخله

ورغم ان الفكره ربما تصل الى بعض الناس كانها فكره بسيطه يعنى مجموعه من الافراد من الجنسين تقع بهم الطائره على جزيره غريبه ومحاولتهم مواصلة الحياه عليها بغض النظر عن كونها صالحه للعيش عليها ام لا . فالفيلم يحمل بداخله ماهو اهم من ذلك بكثير . وهذه الاهميه تزداد بالذات مع كل الاحداث التى يعيشها العالم العربى بوجه عام ومصر بوجه خاص.

فالديكتاتور ليست صناعه فرديه بل هى صناعه شعبيه جماهيريه

معادلة تخليق الديكتاتور ليس معادله فرديه فالمعادله لابد ان يكون لها طرفين وكاذب ومخدوع من يقول عكس ذلك

فالديكتاتور لا يصنع نفسه بنفسه ولا ينصب نفسه ديكتاتور على الناس بالغصب والقوه . بل الناس هى من تختاره وتكبره وتعظمه وتعطيه حقوق اكثر مما تعطيها لنفسها . بل وترضخ له بمنتهى البساطه والسهوله والانصياع تحت مسمى( ان الى ملوش كبير بيشترى له كبير ) او على حد قولى انا ( الى ملوش ديكتاتور ينفخله ديكتاتور)

وعلى الطريقه الديكتاتوريه يقوم باقناع الناس ان كل ما يحدث هو فى مصلحتهم اولا ومصلحة الوطن ثانيا وان كل ما هو حقهم من خيرات وثروات فى ايدى امينه تستثمرها وتعيدها اليهم فى شكل ارباح .

والحقيقه ان كل ما هو حقهم ينقلب بقدرة الديكتاتور الى مال خاص . واعطائهم منه بالقطاره تدريجيا حتى يشعر الناس انه ليس فعلا من حقهم وان الديكتاتور يتفضل عليهم منه ويجب على كل فرد منهم ان ينحنى له شكرا وتبجيلا لانه لم يتركهم يجوعوا ويتشردوا . فمدام الناس تجد قوت يومها فالى الجحيم اى شئ اخر .

وتتضح هذه الفكره العبقريه اكثر مع كلمات الشاعر المهموم بمشاكل الناس العبقرى سيد حجاب والملحن الرائع عمار الشريعى وصوت عبقرى التمثيل احمد زكى

هيلا هيلا وهيلا هيلا مع بعضينا تهون الشيله

هيلا هيلا وهيلا ليصه سكتنا طويله وعويصه

هيلا هيلا وهيلا هوبا ابنوا بكره هتاخدوا البمبه

بتقيموا البنيان بعرقكم وبتشقوا فى الشمس الحاميه وبتبنوا بيت الى سرقكم وحكمكم بالصدفه العاميه

طول عمرنا كده غيرنا لغيرنا نبنى لناس تحصدنا وتجنى الظلمه تكسر مناخيرنا ونعيش عمرنا ضهرنا محنى

هيلا هيلا وفى عز شقانا بايدينا بنينا وعلينا والاجره تمره عجفانه وكمان مستكترها علينا

فكره واقعيه دائمه ولن تنتهى عبر عنها المخرج والمؤلف (وهما فى الحقيقه واحد) بدون فزلكة ولا حشو ولا تشدق بالوطنيه وحب مصر على غرار خالد يوسف وغيره من مخرجى هذه الايام . الذين لا تتحمل مشاهدة افلامهم لاول مره ولا تجد فيها جديد . فى حين ان فيلم البدايه وغيره من افلام اخرى لمخرجين عباقره انتهى زمانهم كلما شاهدت افلامهم مره بعد مره تجد فيها الجديد والجديد

بوجى وطمطم جاى فى رمضان ..... هييييييييييييييييييييييييييه

2009-07-26T14:33:00.000-07:00

يارب بس ميمسخهوش زى المغامرين الخمسه

عــــيــــــد مـــيــــلاد توأمتى .......cindrelaa

2009-07-24T11:33:00.000-07:00

كان امبارح

كنت عايزه اعمل الموضوع من قبل كده بس للاسف نفسى مقفوله عن المدونه وقعدت ادور على حته تانيه احتفل فيها لفيت لفيت وبرده ملقتش غير المدونه دى

مش عارفه ليه هى بتحب تسمى نفسها سندريلا
مع ان هى احسن مليون مره من سندريلا
واقوى مليون مره منها
سندريلا كانت سلبيه وضعيف وهبله وعبيطه
كانت مستنيه امير علشان يخلصها من الغلب الى هى فيها
لكن سندريلا توأمتى مش محتاجه امير علشان يحققلها احلامها
هى تقدر تحققها بنفسها من غير اما تستنى حد
ويابخت الامير الى هتكون من نصيبه

مش عايزه اقولها غير انك اكتر واحده بتفهمنى بعد اختى
واكتر واحده برتاح معاها هى ومروه ميل وايمان سما مصر
وان انتم التلاته السبب فى انى لسه بدخل ع النت من اصله

مش عارفه ليه فى كل عالم جديد بدخله بندمج فيه شويه وبعدين احس انه غريب عنى وانا مش بنتمى للعالم ده
وان فى كل عالم فيه شلل ومجاميع انا مقدرش اكون فيها
اكيد العيب فيا انا

لكن معاكم انتم التلاته بحس ان انتم شلتى الى مش هقدر اخرج منها والى بحس انى بنتمى ليها

ربنا يكتبلك الخير يا توأمتى ويكون نصيبك احسن من سندريلا مليون مره

Now In Theaters

2009-07-19T12:14:00.000-07:00

Sense And Sensibility

2009-06-16T15:42:00.000-07:00

" الموت كان هو الحاجه الوحيده الى هتصالحنا على بعض "

سييييييدىىىىىىىى سييييييييييييييييدىىىىىىىى

اهئ اهئ اهئ

ايه ده ؟ بتنهنهى ليه ؟ فيه حاجه بتوجعك ؟

بعيط على النهايه السوده دى ! صعبان عليا قوىى

هو مين ده ياختى الى صعبان عليكى ؟ المهندز ! ياختى فى ستين داهيه

حرام عليكى . انتى مبتحسيش

انا الى مبتحسيش ولا انتى الى ما بتفهميش . ده واحد كان واطى وماشى على كيفه . وغرر ببنت مسكينه ملهاش ذنب

ايوه . بس الحب غيره وخلاه انسان تانى

ماشى وحتى لو حصل يا عبيطة اخواتك هو ينفع انه يتجوز اخت الى اتسبب فى قتلها . يعنى يضيع هنادى وبعدين يتجوز امنه

اه . ليه لا ؟ الحى ابقى من الميت والحب قادر على كل شئ

والله العظيم انتى هبله ومانتش فاهمه حاجه . هى كل حاجه عندك سهله كده . طيب تعرفى ان طه حسين فى القصه الاصليه كان هيعمل زى مانتى عايزه كده بس بركات خلاه يغير النهايه

منه لله . ليه بس؟

علشان بيفهم ياختى . الحياه مش بتمشى زى مانتى عايزه افهمى بقى يعنى الحياه بينهم مستحيله

هتفضلى طول عمرك معدومة الاحساس

وانتى هتفضلى طول عمرك هبله وعبيطه

______________________________

الله . الواد احمد عز ده زى القمر . ياخرابى على عينيه

امممم اه . لطيف . تمثيله حلو

الا الواحد ممكن يلاقى فارس احلامه شبه الواد ده ؟

هتفرق فى ايه ؟ اهى الرجاله كلها شكل بعض

لا طبعا ده احمد عز. امير الرومانسيه

يا سلام ياختى . هو انتى يا بت فاكره ان الفنانين بيكونوا بنفس الشخصيات الى انتى بتشوفيها فى الافلام؟

واضح ان عندك تخلف عقلى متوسع ومنتشر . انتى فاكره يعنى انه هينزل فيكى حب وغرام لما يشوفك . مش تبطلى الاحلام الى انتى عايشه فيها دى

وبعدن مش كل واحد حلو تشوفيه تقعدى تحبيلنا فيه . كده غلط على صحتك ياماما

يعنى حتى الاحلام مستخسرينها فيا . اعمل ايه بس يا ربى فى العالم المادى الى انا عايشه فيه ده ؟

خلى احلامك على ادك . بلاش تشطحى . وبعدين بطلى تمشى تحبى على روحك . زهقتينى

امال اسمها احلام ازاى

هى الحياه كده

ييييييه . هتفضلى طول عمرك معدومة الاحساس

وانتى هتفضلى طول عمرك هبله وعبيطه

___________________________________

فين رويات عبير وزهور الى كانت فى الكرتونه تحت

روايات ايه ؟ اه . وديتها لبتاع الفول والطعميه الى جنبنا

اييييييييييييييييه ؟ مييييييييييييين؟

فيه ايه ؟

فيه ايه . توزعى كنوزى على بتوع الفول والطعميه

ايه . اهو بعمل خير . يعنى هم لازمتهم ايه؟ دى المره الوحيده الى حسيت ان لهم لازمه. الله يكون في عون الى هعرف يقرا الكلام الى فيهم . اكيد هيجيله استبحس فى مخه

ازاى تعملى كده فى حاجتى . يعنى انا لو اخدت كتبك الى انتى مصدعه دماغنا بيها واديتها لبتوع اللب هتفرحى؟

ايه جاب الى انا بقراه للسخافه الى انتى بتقريها . يا بنتى افهمى . الحاجات دى زمانها راح وانتهى . انا كده قلبى عليكى . عايزه اعالجك من الوهم الى انتى عايشه فيه . ده انتى لو قلتى للواد حماده ابن اخوكى الى عنده 3 سنين انك لسه بتقرى الحاجات دى هيزفك تريقه وانتى رايحه وانتى جايه

مش احسن من الكتب الكئيبه الى انتى بتقريها اوفات عصيبه والجريمه والعقاب . حسبنا الله وانعم الوكيل

بس هقول ايه؟ مانتى متفهميش فى المشاعر والاحاسيس زى باقى البشر

هتفضلى طول عمرك معدومة الاحساس

وانتى هتفضلى طول عمرك هبله وعبيطه

_________________________________

لما النسيم بيعدى بين شعرك حبيبتى بسمعه بيقول اهات

بعد ما ادى وبعد ماخد بعد ماهد وبنى واحتد شد لحاف الشتا من البرد

عارفه مش عارف ليه متونس بيكى وكانك من دمى على راحتى معاكى وكانك امى مش عارف ليه

عم بطاطا لذيذ ومعسل عمره ما طاطا لغير الله لما الدنيا بتقسى يمثل انه خلاص سلم لقضاه

يانسمه هلى شدى الستاير الشوق غالبنى والقلب حاير

امايا ياما شدى الضفايير شدى رباطها عصبينى

اه من عيناه دنا والله ما حب القلب سواه

والى بينا نص فرحه نص حاله نص راحه

هتفضلى طول عمرك معدومة الاحساس

وانتى هتفضلى طول عمرك هبله وعبيطه

________________________________

هيييه . ايه رايك فى العريس؟

كويس . زى ما بيقولوا كده مفيهوش عيب

طيب ما خلاص خلصينا واخلصى

ياسلام . هقولك زى غاده عادل فى شقة مصر الجديده اتجوز واحد علشان بس مفيهوش عيب

يادى الافلام الى انتى عايشلنا فيها . بطلى تحشريها فى كلامنا . مادام كويس جربى

اجرب ايه ؟ هى جيبه هجربها . انا محستش ناحيته باى احاسيس خالص

يادى الخيبه . انتى لحقتى . انتى لسه شاييفاه النهارده . بكره تحبيه وتموتى فيه

لا يا ماما لا مش انا . انا معرفش اعود نفسى على حاجه . انا مادام محستش من الاول انسى

يا بنتى فوقى بقى وانزلى للواقع شويه . هى الحياه كده . مش معقول هتفضلى مستنيه الحب علطول كده

واكيد هييجى

وافرضى مجاش . هتفضلى طول عمرك راهنه نفسك عليه

وهفضل مستنياه

طيب ياختى خليكى . لغاية ما يعدى عليكى الزمن وتلاقى نفسك بح ساعتها الحب هيبقى ينفعك قوىى؟

ماهو انتى عمرك ما هتفهمينى . لانك هتفضلى طول عمرك معدومة المشاعر

وانتى هتفضلى طول عمرك هبله وعبيطه

_____________________________

تفتكرى مين فينا الصح

اكيد انا

وليه ميكونش انا

القلب بيحقق السعاده

والعقل بيحقق الاستقرار

طيب هو ينفع استقرار من غير سعاده

يعنى السعاده الى تنفع من غير استقرار

القلب هو الى بيغذى الجسم

العقل هو الى بيتحكم فيه

مش عارفه مع انى ماشيه مع قلبى بس لسه ملقتش الى انا عايزاه

وانا شرحه . واضح ان احنا الاتنين غلط

تفتكرى هفضل طول عمرى هبله وعبيطه

تفتكرى هفضل انا طول عمرى معدومة المشاعر

من اعماق خنقتى

2009-06-15T08:45:00.000-07:00

هى بس النيه

قبل زيارة الرئيس الامريكى باراك اوباما الناس صحيت لقت الشارع الى هى عايشه فيه اتسفلت

لالا

مش جن طالع من مصباح علاء الدين

ولا ساحر من الى كانوا بيدربوا هارى بوتر

ولا alien طالع من افلام سبيلبيرج

دول بشر والله زيى وزى باقى الناس

اه والله شفتم لما بننوى على حاجه بنعمل ايه ؟

بنصنع المعجزات

ده لما بننوى

ماهى مشكلتنا فى النيه

ومش النيه الى بالى بالك بتااعت مصر الى بتضمنااااا نبض الحياه فى قلبنااااااااااااا نوهب عشانها حياتنا لو كنا بنحبها

لا النيه الى من جوا القلب

النيه الى بيصدقها العمل

واهم من ده كله النيه الى يبقى وراها قوه واهتمام

وتقريبا النيه دى مش هتطلع الا مع كل زياره للرئيس الامريكى

باى باى عمرو خالد . اهلا وسهلا ....

بصراحه كنت هكتب هيفا وهبى

بس اولا ااتكسفت ان احط اسمها جنب اسمه

ثانيا وده الاهم ان الموضوع اوسع من هيفا ولا غيرها

يعنى كان ممكن باى باى عمرو خالد

اهلا وسهلا بكل شئ فاسد ملوش قيمه

والفساد مش بس فى الفن علشان احط اسم هيفا

الفساد الى فى كل حاجه

وللاسف بقينا بنرحب بيه ونقوله تعالالى لااااااااااااااااا تبعد بعيد وخدنى لحنانك خدنى عن الضمير وابعدنى

عمرو خالد قالوله باى باى للمره الكام............ مش فاكره والله المره الكام

هى الكام يا جماعه؟

هقول ايه ولا ايه

من كلام وحيد حامد وصولا لتعليقات زعيم الكوميديا الفز عادل امام مرورا باراء الاعلامى الوطنى القدير مفيد فوزى

عمرو خالد بيتكلم باسم الدين ليه ؟

وبيطلع يحلل الحرام والحلال ليه ؟

هو دارس

متعلم فى الازهر

ده على اساس ان وحيد حامد واخد ماجيستير فى الشريعه والفنان القدير عادل امام واخد كورسات فى الفقه والتشريع

انا مش بزايد على تدين حد على فكره انا اكتر واحده عارفه ان الاعمال بالنيات وان العبره بالخواتيم

بس بتكلم عن الناس دى الى بتناقض نفسها

يعنى لو السؤال الى بيتوجه لعمرو خالد انت بتتكلم فى الدين بامارة ايه ؟ يبقى المفروض يتوجه سؤال زيه للى فوق انتم بتحكموا على عمرو خالد بامارة ايه؟

بتطلوا علينا تتشدقوا بالحريه واحترام الاخر وانتم ابعد ما يكون عن ذلك

مجرد شعارات تقولوها ادامنا عشلان تبانوا متحضرين بس للاسف والله مفقوسين

ده حتى ادنى نوع من انواع احترام الاخر فى الكلام عنه معملتهوش ونازلين تريقه وتقليد

طبعا ماهى البلد فاتحه دراعاتها ليكم وطارده الى زى عمرو خالد

دى لازم تكون النتيجه الحتميه

للاسف الحقيقه الواضحه الى زى الشمس والى المسئولين مش فاهمينها او بيستهبلوا عنها هى ان عمرو خالد مش محتاج مصر

مصر هى الى محتاجاه من غير تهويل ولا تحيز

انا تابعت الشخص ده من اول ما ظهر

لا عمرى حسيت ان هو بيفتى

ولا بيعاند الشيوخ الكبار

ولا بيتكلم فى كلام ملوش فيه

بيحكى قصص

طيب ما يحكى

ولا هو المفروض يطلع يترقص

والله لو كان عمل كده مكانش اتهاجم الهجوم ده

انا لمست ودخلت فى مشروع من مشاريعه والى للاسف كان مصيره برده الالغاء وعرفت اد ايه الراجل ده صاحب رساله بجد

وانا بقوله خليك بعيد ياعم

انا لو منك معبرش الى هنا تانى

انت مش بتخبط دماغك فى حيطه

انت بتخبطها فى الجبل الى غرق تيتانيك

انسى ياعمرو

ولو انى عارفه ان انت مش هتعملها .

عيد ميلاد النكسه

فيه حد يحتفل بالنكسه

اه

انا

فيه حاجه

لا لا مش قصدى

النكسه كانت فى الشهر ده من كام يوم

النكسه الى الحمد لله فوقنا بعدها وقدرنا نجيب حقنا

دلوقتى بقى لو نبص هنلاقى نفسنا عايشين كل يوم فى نكسه

اه ماهى النكسه مش معناها ان احنا نحارب وننهزم بس

لا

دى نكسات الحرب ممكن تكون اتفه بكتير من نكسات العقل الى احنا بقينا عايشين فيها

ع الاقل نكسات الحرب بنفوق منها

لكن نكسات العقل بقت عامله زى الادمان على المخدرات

عاملين دماغ يعنى

احلى دماغ والله

ومش عارفين نفوق

عباره يغرق فيها الف

قطر يتحرق فبه الف

قمح فاسد ...... قلوب فاسده ..........عقول فاسده ..........والاخطر ضمائر فاسده

وكل يوم نقول

احنا بس محتاجين نكسه علشان نفوق

ياربى

هو فيه نكسات اكتر م الى بنشوفه ولا لازم يكون فيه دبابات ورشاشات ومدافع علشان نحس بيها

اوباما ... يصنع المعجزات

بستعجب قوىى من الناس الى اتصدمت من خطاب اوباما

وبستعجب برده من الناس الى فرحت بيه

طيب احنا ايه علاقتنا ؟

مستنيين منه ايه؟

اذا كان احنا مش بنعمل لنفسنا حاجه ؟

هو هيعملنا

اذا كان حكامنا مش طايقين بعض وكل يوم بالبلدى كده فارشين الملايه لبعض

وقاعدين نزايد على وطنية بعض

يبقى مستنيين ايه من واحد اكيد مصلحته ومصلحة بلاده اهم من كل شئ

متهيألى لما نعمل لنفسنا قيمه وكيان ووجود الاول

نبقى نستنى غيرنا يعملنا حساب

الحجاب وسنينه

مش عارفه صناع الدراما من كتاب ومؤلفين وممثلين مالهم ومال الحجاب

ليه كل تصويرهم للبنات المحجبات ينحصر فى واحده من دول

واحده معقده نفسيا عايزه تتجوز وخلاص

واحده جوزها مزواج وبيتكلم باسم الدين وفارض عليها الحجاب

واحده ملهاش رابط وماشيه على كيفها وواخده الحجاب ساتر لاعمالها

واحده متخلفه متعرفش حرف ال ب من طبق الفول

طيب والله انا محجبه ومش واحده من دول خالص

انا عاديه عايشه حياتى عادى زى باقى مخاليق ربنا

مش حاسه ان طالعلى قرن ولا ناب ولا حاجه

لا فيه راحل قاهرنى

ولا عندى مشكله نفسيه

ولا ماشيه على طول شعرى

ده انا حتى الى صحيت ولبسته من نفسى

يعنى محدش مسكلى الفرفر علشان البسه

لا وكل واحد من دول يطلع ماسك فى قافية الفنانه المحجبه و يقولك هى ينفع الواحده تطلع محجبه وهى قاعده مع جوزها فى الشقه ؟ احنا لازم نصور الواقع

طيب هو الواقع ان كل بنات مصر غير محجبات حضرتك؟

ياسيدى طلعها محجبه زى الواقع وابقى قلعها الحجاب فى البيت وانت بتصور

احنا مش هنعترض

الموضوع مش عن الدراما والممثلات المحجبات

انا نفسى بس برده ان الناس الى بتتكلم بالحريه والتحضر تراعى ادنى قدر من الحريه

ومن الاخر تخليها فى حالها

وملهاش دعوه بالحجاب والى اتحجبوا

عايزين يطلعوا البنات لابسين بكينى ولا من غير خالص

يعملوا الى هم عايزينه

بس يخلوهم فى حالهم وبلاش يحشروا نفسهم فى كل حاجه بمناسبه وبدون مناسبه

نحن حقا نعيش فى مجتمع منافق

المهندس شريف

كل اما اتابع حكاية الراجل ده واد ايه انه كان محترم ومتدين وابن ناس على حد قول زملائه وجيرانه

بيركبنى الفزع والخوف وساعات الشفقه عليه
وبسأل نفسى هى احوال الناس مكن تتبدل 180 درجه كده من اتجاه لاتجاه تانى خالص
من اسره ناجحه وغنيه ومرتاحه ل 4 جثث
والادهى والامر
هو ممكن اليأس يوصل بالانسان انه يفقد ايمانه بكل الى عاشه لا ويفقد ايمانه بربنا نفسه
استغفر الله
ربنا ما يكتب علينا كده
ويحسن خواتمنا جميعا
بس لازم نعرف
ان الايمان الحقيقى بيبان وقت الشده

يارب

2009-06-03T12:48:00.000-07:00

" اللهم انى اشكو اليك ضعف قوتى و قلة حيلتى و هوانى على الناس انت رب المستضعفين و انت ربى الى من تكلنى؟ الى بعيد يتجهمنى ؟ ام الى عدو ملكته امرى؟! ان لم يكن بك على غضب فلا ابالى اعوذ بنور وجهك الذى اضاءت له الظلمات و صلح عليه امر الدنيا و الاخرة من ان تنزل بى غضبك او يحل على سخطك لك العتبى حتى ترضى و لا حول ولا قوة الا بك

ايها المجتمع ...... shame on you

2009-05-30T11:28:00.001-07:00

.......: معرفتيش . قريبتى جوزها قرر انه يرجعلها . طبعا بعد ما بهدلته فى المحاكم ورفعت عليه قضيه رجع وبيقول حقى برقبتى
.......: طيب كويس الحمد لله . انا كان نفسى يحصل كدا من زمان . كانت هتروح فين ب 3 عيال وبعدين فرصتها فى الجواز كده معدومه
........: بصراحه هو بهدلها وضيع كرامتها عالاخر . بس انا قلتلها لما سالتنى لازم تفكرى كويس . اهللك مش راضيين انك ترجعى بس اهلك دول مش هينفعوكى
........: انا شخصيا لو بنتى قررجوزها انه يرجعلها دلوقتى لو فات التانيه الى ساب بنتى علشانها مش هقولها لا .؟!

ده باختصار حوار دار ادامى النهارده
هو اكيد مدارش ادمى انا بس
دى حاجه بتحصل كل يوم وكلام بيتكرر كل ساعه
دى مطلقه
يعنى سكاند هاند
لا
تينس هاند او اقل
ونظام لوى دراع على اتنهاز فرص
انتى مطلقه
يبقى خلاص حياتك انتهت
لا
لا
حياتك مرهونه بالافندى الى طلقك
لو جابه كيفه انه يرجعك ويسترعليكى يبقى كويس قوىى
لو مجابوش بقى يبقى تروحى تحفرى ليكى قبر فى اى حته وتدفنى نفسك وعيالك فيه

ايه يعنى مطلقه
انا مش قادره استوعب وافهم
ايه المجتمع الى احنا عايشين فيه ده
ايه سياسة الكيل بمكيالين دى
وقال زعلانين علشان العالم بيتعامل معانا بنفس الطريق
طيب اذا كان رب البيت بالدف ضارب
ايه الفرق بين راجل مطلق وست مطلقه
حد يقولى يا ناس

الحقيقه بقى الى انا وصلتلها ان احنا بنعيش فى مجتمع تحت درجات التخلف
لا
تحت
تحت
تحت
درجات التخلف

بنحكم على ناس بعقوبات فى حاجات هم ملهمش ذنب فيها
واحده تتطلق
تبقى سلعه رخيصه لازم تستنى الى يحن عليها ده اذا جه
واحده جوازها يتاخر
تبقى عانس متساويش فى سوق البنات 3 مليم
واحد فقير
يبقى ابن ستين ......
ونتعامل معاه بتعال وقرف وخصوصا لو بيشتغل شغلانه احنا كعقول مسطحه بنقول عليها مش اد كده
واحد مجهول الاب
نتعامل معاه كان هو الى غلط
هو الى ارتكب الفاحشه ولازم نبص باعلى درجات الازدراء
واحده اغتصبت
تبقى هى الى ماشيه على حل شعرها وبتغمز للرجاله وتقولهم تعالو اغتصبونى الله يخليكم
ونسيب الجناه ونمسك فيها هى

مجتمع عايش بازدواجيه منقطعة النظير
مجتمع عايش علشان كل فرد فيه يدور على نقظة ضعف فى التانى ويذله ويستغله
نصلى كويس قوىى
نصوم ميه ميه
نحج ونزكى
لكن جوهر الدين
روح الاسلام الى بتقول ولا تزروا وازرة مثل اخرى والانسان هيتحاسب بعمله
دى منعرفهاش

ليه احنا بنعمل فى بعض كده
ليه الكبت الى جوانا نطلعه على بعض
ونرجع نسال نفسنا
ليه فيه حكام ظلمين
ليه فيه عبارات بتغرق
ليه فيه قطورات بتتحرق
ليه فيه قمح فاسد وانفلونزا طيور وخنازير
ليه والف ليه
والاجابه عليها واحده
لو كان الخير فعلا جوانا
لو كان عندنا استعداد ان احنا نساعد بعضينا بدل ما نذل بعضينا

اكيد اكيد كان الامر اختلف

نجوم .............و نجووووووووووووووم

2009-05-26T12:41:00.000-07:00

حلقه واحده
حلقه واحده من برنامج الطبعه الاولى للاستاذ احمد المسليمانى خلتنى احس بجبال التفاهه الى احنا بقينا عايشين وسطيها وببحور الهيافه الى احنا قايمين نايمين نشرب منها
البرنامج قبل كده تكلم عن العالمه العظيمه سميره موسى
لكن بما ان انا اعرف عن الشخصيه العظيمه دى كتير فمهتمش قوىى
من اسبوع كده اتذاعت خلقه من البرنامج اتكلم فيها عن الدكتور يحيى المشد
طبعا انا فى دماغى ان يحيى المشد ده عالم وخلاص
جهل بقى بعيد عنكم
لما الاستاذ احمد ابتدى يروى قصة حياته الى انتهت بااغتياله
انتبهت قوىى
حسيت بهزه جوايا
وقف كده لو سمحت
لحظه
احنا عندنا شخصيات عظيمه كده
او كان عندنا
هل يا ترى حد تانى من جيلى او الجيل الى بعد جيلى يعرف الراجل ده
يعنى لو جيبت ابن عمى الى فى تالته اعداى وقولتله تعرفى مين هو يحيى المشد هيعرفه زى ما بيعرف تامر حسنى ولا عادل امام
وسؤال بقى اهم نط فى دماغى
ايه هو بقى مفهوم النجوميه من وجهة نظر المجتمع الى احنا عايشين فيه
متهيالى عندنا
لازم علشان تكون نجم يبقى تبقى حاجه من التلاته
يا مغنى
يا مثل
يا لعيب كوره
هم دول النجوم بس من وجهة نظرنا
وللاسف مش ده احنا السبب فيه
السبب فى الاعلام الى مورهوش غير الفن والفنانين
انا والله مش بتفه من دور حد
ولا بتريق على حد
لكن لما اسمع عن حرب بين منتج واسرة ليلى مراد علشان مسلسل بيتعمل عنها
وانا من عشاق فن ليلى مراد على فكره
ولما يتعمل مسلسل عن سعاد حسنى ولا عبد الحليم حافظ ولا غيره وغيره

ليه عندنا محدش بيهتم انه يعمل سيرة حياة عالم من العلماء الى قضوا حياتهم فى خدمة مصر وماتوا برضه بسبب حبهم لمصر
بلاش كده
ليه لما تيجى ذكرى فنان مطرب ولا ممثل يقعد التلفزيون يعيد ويزيد فى اعماله ويجيب تاريخ حياته ويمجده كانه فتح عكا ولا انتصر فى عين جالوت
والناس الى عاشت وماتت فى سبيل هدف ورساله يتنسوا بالشكل المهين ده
لا ذكرى ولا احتفال ولا حتى كلمه

منتهى الظلم والافترا صراحه
مش معقول تكون هايفه اشهر من سميره موسى
فى مصلحة مين وعلشان ايه ان نجومنا الحقيقه نورها ينطفى بايدنا احنا
اكيد فى مصلحة اى حد الا احنا
احنا الى غرقنا للاسف فى مسلسل مستمر من السخافه والسطحيه مش عارفين نتخلص منه
او مش عايزين نتخلص منه

اسرائيل عمرها مافكرت تغتال مغنى ولا ممثل ولا رقاصه
وده ان كان يدل على وحشية العالم دى فهو برده يدل على بعد نظرهم واعترافهم بالقيم والنجوم الحقيقيه الى احنا مش قادرين نعترف بيهم
اسرائيل وصلت للحقيقه الى احنا مش عارفين نوصلها ولا هنوصله طول ما اهتمامنا هيفضل منصب على حد واحد واتجاه معين

ومش عارفه احنا هنفضل نايمين فى العسل كده لامتى ولا على راى يسوف شعبان فى الضوء الشارد
عايمين فى مية البطيخ

يوميات مواطنه مفروسه !!!!

2009-05-10T13:35:00.001-07:00

هطق من الغيظ

فى الشغل الاقى بيروقراطيه ما بعدها بيروقراطيه واستهبال ما زيه استهبال واستخفاف بارواح الناس لابعد الحدود . يعنى واحده ست غلبانه من فئات الشعب الدرجه العاشره عامله عمليه ومخيطه جرح فى بطنها وعندها ولدين فى عمر الزهور الاتنين عندهم صرع . طبعا ده ابتلاء من عند ربنا وربنا هيجازيها على صبرها لان ربنا مش بينسى حد . المشكله دلوقتى فى البشر الى انعدمت من قلوبهم الرحمه وانتهت من حياتهم كلمة انسانيه اللى ماسكين اسوا قطاع فى البلد أو اسوأ السئ فى البلد وهو قطاع الصحه . الست بظروفها الى ما يعلم بيها الى ربنا دى تيجى وتروح 3 مرات علشان تاخد العلاج لاولادها علشان سوء تنظيم وتسوية حسابات وعالم لا بتحس ولا بتفهم لا وياريتها لاقيه العلاج اصلا ده العلاج غير متوفر ولسه هتلف عليه بره ده اذا لقته اصلا والست من خنقتها ياعينى اخدت جنب وقعدت تبكى من غير ما تتكلم ولا تشكى . حراااااااااام والله هم مش الى عايشين فى البد دى بنى ادمين ولا خرفان وهيدبحوها ع العيد .

يعنى العالم معدومة الضمير مش عارفه ان كل حاجه سلف ودين . وان الارض كرويه والدنيا دواره . ولا هم فاهمين انهم ضد الميه ضد النار ضد الحشره ضد الفار لا عمرهم هيمرضوا ولا هيشوفوا بؤس فى حياتهم .

مش هقول غير حسبى الله ونعم الوكيل . مش عارفه الواحد المفروض يتحمل الى بيشوفه ده ازاى . وجع فى القلب وارتافع فى الضغط وغيره وغيره

ولا تعامل افراد الحكومه مع الموظفين الى فيها . على طريقة لو معملتش الى هنقولها عليه هنحط السيخ المحمى فى صرصور ودنك . يعنى نظام اوعى اوعى ترضى ضميرك على حساب البيروقراطيه والكلام اللى على الورق . ضميرك ايه وبتاع ايه ؟ ده انت لو مشيت وراه هنعمل ونسوى فيك . انت وظيفتك هنا انك تقرف المريض . لازم تكرهه فى حياته وفى اليوم الى اتولد فيه والمفروض كمان انك تدفعه لللانتحار علشان نخلص منه ومن قرفه وعلشان كمان نقل عدد الشعب شويه ماهو انفلونزا الخنازير لوحدها مش كفايه برده وبعدين احنا ايه عرفنا انها هتوصل مصر . مش لازم نعمل حسابنا ولا ايه ؟ . ونظام بقى مادام الناس مش لاقيه شغل يبقى لازم نذلك ونذل الى جابوك يعنى انت لو سبت الحا كومه هتلاقى شغل تانى فين

كل ده وتحس انك متكتف نفسك تعمل حاجه ومش عارف تعمل ايه ؟ تحس انك عايش بنظام جعلوه فانجعل هتعمل يعنى هتعمل وابقى ورينى شطارتك . يجيلك السكر ولا الضغط ولا حتى يطق لك عرق فى ستين سلامه.وللاسف كل ده تاثيره غلط على اى انسان نفسه يكون ايجابى بس مش عارف .

نيجى بقى للبيت ولقعدة البيت . يعنى حتى التلفزيون الى هو وسيله للترفيه بقى وسيله لحرق الدم متمثله فى الفنان العظيم الى انا بعزه جدا ومش عارفه طلع لنا منين الاستاذ تامر حسنى . تقلب على اى قناه تلاقيه فى خلقتك ؟يعنى ممكن لو دخلت المطبخ فتحت الحنفيه تلاقيه نازل منها

يا اغنيه يا اعلان تحفته الفنيه الجديده عمر وسلمى تو مش عمر وسلمى اتنين . لا تو . على وزن نورماندى تو

لا والادهى انه طلع مع المفتش كرونبو . يعنى تخيلوا معايا كرنبوا وتامر ومى عز الدين والسبكى فى اعلان واحد وفزوره اسخف من السخافه الى المفروض انها بتختبر غباء الشعب المصرى وفى الحقيقه هى بتختبر قدرة الشعب المصرى على التحمل والصبر . ازاى هتتحمل سخافة التلاته دول مع سخافة كرونبو منقطعة النظير

نيجى بقى لاعلان الفيلم منتهى السخافه والهيافه والاستفزاز . حاجه تعل بصراحه . استخفاف واستظراف قال يعنى المفروض ان احنا نضحك ونقول يا خفة دمك يا تيمو يا ملك الجيل . والمشكله برده انه مصمم على موضوع قلع القميص .واستعراض العضلات . ارحمنى يارب. تكونش فاكر روحك رشدى اباظه

ولا الاغانى . ياربى . مش عارفه اتكلم اقول ايه بس ! الله يرحمك يا فن بجد

كله كوم ومحبين تامر والمدافعين عنه دول كوم تانى . انا بحترم جدا اراء الاخرين ولولا اختلاف الاذواق لبارت السلع . بس مش توصل لدرجة ان اى حد يجيب سيرته ولا يعلق عليه يبقى حقودى غلاوى معقد مش فاهم فى الفن . ولا الجمله الى دايما بيكتبوها قبل ما تنزله حاجه جديده ( الصفعه التيموريه على الساحه الفنيه )

صفعة ايه مش فاهمه بصراحه . كأن تامر هيقدم تحفته الفنيه الاطلال ولا قارئة الفنجان . ولا هيعمل الجزء التانى من فيلم الارض ولا شئ من الخوف . ده اذا كان الجزء الاول من الفيلم قال حاجه يبقى عمر وسلمى تو يمكن يقول حاجه

وبعدين صفعة على الساحه الفنيه من اى ناحيه . الساحه الفنيه الى فيها الموهوبين الى زى احمد السقا واحمد حلمى وكريم عبد العزيز و احمد عز . تامر هيعمل صفعه ودول كلهم موجودين.

بس بصراحه فعلا عندهم حق . هى فعلا صفعه . بس صفعه على وش الفن

الجرايد بقى . اهم خبر يتصدر الصحف بعد موضوع انلفونزا الخنازير . فرح هايفه .هتتجوز مين . هتعمل الفرح فين . هتلبس ايه . فستانها بكذا الف ولا مليون جنيه . فرحها هيتكلف ترليون جنيه

احنا مالنا يا بشر

ماتتجوز ولا تعمل الى هى عايزاه

هيفيد الشعب فى ايه انه يعرف تفاصيل جوازها

خلاص بقت هايفه دلوقتى الى بتتصدر الصحف . هى المثل والقدوه والاهتمام

ده على اساس ايه

انها مطربه

ولا حتى فنانه

انا شخصيا لا اعترف بيها كفنانه

ومش انا لوحدى طبعا لانها حقيقه واضحه وضوح الشمس

لانها معندهاش اى موهبه غير الدعايه الغير عاديه لنفسها ودى بصراحه الحاجه الوحيده الى هى فالحه فيها .

محدش بقى يقلى اصلها زى القمر وحلوه وسنيوره

مع انى مش بشوفها كده بس هعديها واقول لولا اختلاف الاذواق لبارت السلع

هو المفروض ان احنا نهتم بواحده لمجرد انها حلوه وزى القمر . على كده المفروض ان احنا نروح نحدف مواهب زى شيرين عبد الوهاب وامال ماهر بالطوب ماهم على الرغم من موهبتهم الرائعه مش حلوين ولا زى القمرات

ونروح نشيل امثال هايفه وماريا فوق الاعناق . ماهى بالحلاوه والجمال والدلع بقى

للاسف لما ييجى الفن الهابط يطغى على الفن الراقى ويمسحه ويكون الى بيقدموه ملء السمع والبصر يبقى اكيد فيه حاجه غلط

اكيد فيه حاجه غلط

وعلشان كده وعلشان كمان مضلمهاش على محبى الفن الراقى . اقولهم اسمعوا جنات الى البومها مكسر الدنيا والى اثبتت ان الفن الراقى اقصر طريق لقلوب الناس

تحيه لجنات ولاحترمها لجمهورها قبل احترامها لنفسها

من غير ليه ؟

2009-04-22T14:28:00.000-07:00

ليه 11 فى الميه بس مش راضيين عن اداء الحكومه عام 2008 . امال الاضرابات دى مين الى بيعملها؟

والاعتصامات دى مين الى بينفذها ؟

يكونش الشعب المصرى بيمشى وهو نايم !!!

ليه الناس بتمسى بناتها هنادى ومش بتسمى امنه ؟.مع ان امنه هى بطلة الفيلم وهى الشخصيه العاقله القويه وهنادى هى الضحيه الهبله الى دفعت تمن سذاجتها

يمكن علشان امنه هى الى عرفت تاخد حقها؟

فتش عن القهر

ليه الناس بتتعامل مع البنت على انها ازازة دوا لها تاريخ صلاحيه وانتهاء؟ . تخيلوا اول ما البنت تتولد المفروض الاب والام يكتبوا فى شهادة الميلاد انتاج 1980 صالح لمدة 25 سنه من تاريخ الانتاج ويمكن كمان ترج جيدا قبل الاستعمال

ليه كل الناس الى انا بشوفهم بيقعدوا يشتموا فى هايفه وهبى ؟ مع ان بيقعدوا ادامها ناس كتير وهى بتغ..... قصدى بتعمل اى حاجه تانيه غير انها بتغنى

تفتكروا دى ازدواجيه ولا مهلبيه ولا ملوخيه

ليه مع ان تامرحسنى غنى اعتذرى للى هييجى بعدى . ولو وقفتى تتنططى ودماغك خليها تاكلك . البنات بتحبه وبتموت فيه ؟

واضح ان القط ميجبش الا خناقه فعلا

ليه عندنا فى مسلسلاتنا وافلامنا العربيه دايما الخادمه بتقول يا ستى ويا سيدى ؟. هو مش المفروض انهم محتاجينها زى ما هى محتجالهم ولا هم بيدفعولها فلوس لله

قنعره فارغه

ليه نشوف واحد طيب وذوق فى الزمن ده بنتنح ونفتح بقنا ونحس كاننا شايفين كائن خرافى من فيلم سيد الخواتم او كان الاستاذ اى تى نزل بنفسه وشرفنا على كوكب الارض؟

حاجه غريييييييييييييييييييييبه

ليه الاكتئاب بقى عندنا سياسه وفلسفه والحزن بقى روتين يومى مش قادرين نسيبه؟ . هو فيه حقيقه طبيه تثبت انا الاكتئاب بيفتح ماسم الوش وينوره وان الحزن بيدى هيبه ووقار ؟. على كده انصحكم انكم تكتئبوا 3 مرات قبل الاكل وانكم تعيطوا وتتشحتفوا ساعتين قبل النوم وانتم هترجعوا 30 سنه لورا

ليه محدش عارف ياخد حقه فى البلد الا لما يعمل اضراب او اعتصام ؟ مصطفى كامل قال لو لم اكن مصريا لوددت ان اكون مصريا واحنا المفروض لو لم اكن مضربا لوددت ان اكون معتصما

وعجبى

ليه كل قصة حب انا عرفت اطرافها فشلت او فى طريقها للفشل . واضح ان انا الى فقر ونحس

حكاية ولد

2009-03-19T12:26:00.000-07:00

صندوق ذكرياتى مليان حاجات كتيير كتيير

من كل صنف ولون

وكل حاجه فيهم كنت بهد بيها الدنيا

انا الشجاع الشجيع

انا الفارس المغوار

انا البطل الرهيب

*******************

كوره

بجرى

جوووووووووووووووووووووووووون

الله عليك يا معلم

والله معلم

انت راجع معفر كده ليه ؟ مش قلتلك ارحم نفسك م الكوره شويه

ارحم نفسى ! ازاى ده انا الحريف انا كابتن الفريق

انا الاول وبس

********************

مسدس

بوم

انا مكنتش عايز مسدس

انا كنت عايز سيف

سيف بتار زى صلاح الدين

اركب الحصان زى الفارس واموت اعدائى يمين وشمال

ماهو انا فارس

بس من غير حصان

ياترى مين يجيب لى حصان

******************

جوابات

لسه ريحتها فيها

هجيبلك حته من السما

هلف الدنيا طولها وعرضها وهجيبلك خاتم سليمان

افركيه اتمنى

بس اوعى تتمنى حد غيرى

انا فارس احلامك الى جاى من بعيد

كل حياتى تحت امرك يا اميرتى

ماهو انا اميرك وانتى اميرتى

********************

صور

ضحكه من القلب

عيون فيها امل

لمه فيها دفا

ايدينا فى ايد بعض بس يترى كنا بنبص على ايه؟

*********************

دموعى

لما سيبتينى

لما عرفت انك هتكونى لحد غيرى

لما خلاص سلمت ان انا مش اميرك ولا انتى اميرتى

مفيش فارس بيكون متقيد

مش قادر اروحلك واقولك ليه مصبرتيش عليا؟

مش انتى قلتى ان انتى ليا؟

انا ذنبى ايه؟

غصب عنى

والله غصب عنى

ربنا يوفقك

********************

قصاقيص جرايد

بطل قعدتك ع القهوه ودورلك على شغله تنفعك

وظايف

بس للاسف ملقتش وظيفة فارس

ادور عليها فين؟

***********************

حبل

متكتف

متقيد

لازم احرر نفسى

مش هفضل كده طول عمرى

حد يساعدنى

يفكنى

يارب

لازم احاول لوحدى

اهو

قربت افكه

قربت

...............

حكاية بنت

2009-03-18T13:59:00.000-07:00

مبرووك مبرووك

جالك بنت زى القمر

الحمد لله يامن انت كريم يارب

كان نفسى اجيبلك ولد يشيل اسمك ويكون ضهرك وسندك فى الدنيا

استغفرى الله بنتى دى هتكون ب 100 راجل

****************************

هاهاهاها

يابت تعالى هنا مش عارفه امسكك

شكلك هتطلعى بت مش على بعضك . ياترى الزمن مخبيلك ايه؟ . قال يا مخلفه البنات يا شايله الهم للممات

************************************

(يا ملاك يا جنيه ياست الحسن يعجبنى توهانك فى احلامك يعجبنى شد الخصر بحزامك يعجبنى اخدك للكتب بالحضن)

جوايا حنين لشئ غريب

جميل

بعيد

جوايا فرحه مش عارفه ليه

الله الدنيا حلوه قوىى زى ماقال فريد الاطرش

************************************

(راسمه ايه حبيبتى فى صفحة الكراس راسمه بنت حلوه بتجرى م الحراس راسمه ايه حبيبتى فى دفتر الاحلام راسمه قلب نونو بيعشق الايام .... ليه الصبايا ليه اجل حكايه ليه)

عايزه اغنى

عايزه اطير

قلبى بيرفرف

بيحن لانسان مجهول

لسه مقابلتوش بس عارفاه وعارفه انه جاى اكيد

اكيد هقابله

ان شاء الله هقابله

*********************************

الف مبروووك

ياااااااااااااه بنتى خلاص كبرت وهتدخل الجامعه دى طلعت اشطر من اخواتها الصبيان

يارب اعيش لغاية اما اشوفك استاذه فى الجامعه

لازم احقق لوالدى كل الى هو عايزه

انا بنت ب 100 راجل واكتر

*******************************************

( فى بلد البنات كل البنات ماشيه وظابطه فى ايدها الساعات وقبل تقفل بيبان البيوت وقبل ما ينزل ظلام الحارات فى بلد البنات بتجرى تروح)

كنتى فين لغاية دلوقتى يا هانم

الساعه لسه مجاتش 9 وانتى عارفه ان المحاضرات بتخلص متاخر

انتى مش واثقه فيا وفى اخلاقى

طبعا واثقه يا بنتى بس للاسف مش واثقه فى الناس

خوف

**********************************

(مش عارف ليه بتونس بيكى وكانك من دمى على راحتى معاكى وكانك امى)

ياترى لما هييجى هيقولى كده

هيغازلنى بالشكل ده

ولا هيقول جسمك حلو وعينيك دباحه

يعنى اعمل ايه ابخر جسمى علشان الناس تبطل تبصله

مفيش حد يبص ابعد واعمق من كده

هو انا كنت بحلم احلام خرافيه ؟

********************************

(قبل ما تحلم فوق احلم وانت فايق قبل ماتطلع فوق انزل للحقايق)

كل الى فات عدى عليا كانه حلم

وفى نفس الحلم كنت بحلم ييجى مليون حلم

لازم افوق

ولا استنى شويه

**********************************

(امر الهوا قلبى ميشلش غير واحد)

النهارده عايزاكى على سنجة عشره

ليه يعنى؟

ليه يعنى؟ علشان العريس الى جاى يشوفك يا فالحه النهارده ولا انتى نسيتى ؟

بس ياماما انا قلت انى مش هتجوز بالطريقه دى ومش هقف ادام واحد علشان يعاينى ويقلب فيا

اهى دى الطريقه الى ماشيه واذا كان عاجبك . اديكى خلصتى الكليه وقعدتى فى البيت وراكى ايه تانى تعمليه

فوقى بقى من احلامك دى وبطلى اغانى وافلام اجنبى

افوق

تانى افوق

**********************************

( انا كل ما بندهلك بتزيد المسافات يغرق صوتى ويهلك فى بحور الاوقات والايام بتفوت يدبل ورق التوت وتدور الفراشات على الضى المكسور)

انت فين

اتاخرت ليه

انا بقالى كتير مستنياك

مستنيه كل حاجه انا حلمت بيها فيك

هتيجى ولا لا

ولا هفضل احلم كده ولا ايه ؟

هفضل محتاره مشدوده زى الوتر بين حاجتين

يارب

********************************

( يا موجه يا زرقا دى المركبه سارقه احلامى وياكى)

اجمل حاجه فى الدنيا انى اعيش فى عالم فاضى بعيد عن الناس

بيت صغير ع البحر

وجنينيه فيها ورد وفل وياسمين

اصحى اقطف الورد واضمه وابيعه فى المحل الى حنب البيت

ياااااااااااااه

مااحلى العيشه وسط الورود

اعيش وسط حكايات الحب الى مقدرتش اعيشه

انا مش عايزه اكتر من كده

هو فيه ابسط من كده؟

حلم بسيط لكنه صعب

ليه صعب؟

مش عارفه

********************************

-لو مش هتحلم معايا مضطر احلم بنفسى

- امتى الاقى شغل

- الى ادك اتجوزوا وخلفوا

- ياترى هتيجى امتى ولا انت مش جاى

- زمن الاحلام عدى وفات

- لو بطلنا نحلم نموت

موجز الانباء

2009-01-26T12:22:00.000-08:00

1- تحت شعار (نيم ضميرك تعش سعيدا ) قررت وزارة الشئون الاجتماعيه بالتعاون مع وزارة الصحه والسكان البدء فى اعطاء دورات تدريبيه لموظفى جميع الحكومات والوزارات فى كيفية تنييم الضمير الانسانى والسيطره على الافكار الهدامه الى تؤدى يصاحبها( ورا الشمس )على حد تعبير الوزراه وذلك بعد الشكوى الغير عاديه من( لماضة )الموظفين اصحاب الضمير الحى مع رؤسائهم والتى لا تؤدى فقط الى تعطيل الانتاج فى المؤسسات الحكوميه ولكن ايضا تؤدى الى وقف حال الموظفين الذى قاموا فى السابق بعملية استئصال الضمير فى المركز الصحى التابع لوزارة السكان

ويقول الخبير المسئول عن اعطاء الدورات التدريبيه انها دورات اجباريه على كل الموظفين ومن لديه اى اعتراض( فبالسلامه يا باشا) . وانه يشرف على هذه الدورات مجموعه من اعظم معدومى الضمير على مستوى العالم وان هدف هذا المشروع الارتقاء بالمجتمع والنهوض بالامه

وان وزارة الصحه والسكان كانت من اوائل الوزارات التى شجعت على هذا المشروع نظرا للمآسى التى يتعرض لها الموظفين من اصحاب الضمير من ارتفاع فى ضغط الدم والسكر وتصلب الشرايين و انفجار المراره والضغط الشديد على اعصابهم لدرجة دفعت ببعظهم الى الانتحار والبعض الاخر الى دخول العباسيه .

2- تعلن شركة الانتاج العريقه السبكى فيديو فيلم عن البدء فى تصوير الجزء التانى من الملحمه الانسانيه العظيمه (عمر وسلمى) وذلك بنفس ابطال الجزء الاول المطرب الاسطوره وهبة الله للغناء المصرى والعربى وفتى الشاشه الاول ملك الجيل وكل جيل( تامر حسنى) بالاشتراك مع فيديت الشاشه الجديده النجمه العظيمه (مى عز الدين) بالاشتراك مع مجموعه من الوجوه الجديده الصاعده الواعده فى عالم الغناء والتمثيل والطبخ والمسح والكنس

وقد قررت الشركه عمل جزء تانى نظرا للنجاح العظيم الذى حققه الجزء الاول وخصوصا مشاهد تامر حسنى والقميص وكذلك للالحاح الشديد من الجمهور . كما انه يوجود اكتر من مشروع فى عمل جزء تالت ورابع وبذلك يتفوق الفيلم على الملاحم العالميه ذات الاجزاء مثل الاب الروحى وسيد الخواتم . والى عايز يتفرج على الفيلم يروح يحجز من دلوقتى قصدى والحضور باسبقية الحجز

3-حصل المفتش العظيم كرومبو على مبلغ 10 ملايين جنيها من الشركة المصريه لمدينة الانتاج الاعلامى وذلك مقابل موافقته على بطولة مسلسل( كرومبو .ذنبه على جنبه) وذلك بعد مفاواضات دامت اكتر من شهرين بين الشركه المنتجه وبين المفتش العبقرى وافق خلالها اخيرا على خوض تجربة التمثيل بعد النجاح الفظيع الذى حققته حلقات المفتش كرمبو المعروضه على كل القنوات . ويقول المخرج انه سيتم البدء فى تصوير المسلسل عقب انتهاء المفتش من حل القضية المستعصيه والتى دوخت الحكومه لمدة سنتين (مين السبب فى غرق عبارة السلام- ممدوح اسماعيل- ولا ممدوح اسماعيل- ولا ممدوح اسماعيل ) واكد المخرج ايضا ان المسلسل سينافس مسلسلات النجوم الكبار مثل يحيى الفخرانى ونور الشريف

هذا ولم يتم الاستقرار على البطله التى سوف تقف فى دور البطوله امامه حيث رفضت جميع بطلات السينما والتلفزيون اداء دور تانى بعد ممثل ناشئ وتقول بعض المصارد انه هناك امل فى موافقة النجمتان العالميتان مينى ماوس والبطه ديزى على البطوله امامه

4- بسبب ارتفاع حالات الطلاق فى مصر نتيجه لكليبات هايفه وروبى وغيرهما . قام المجلس القومى لحقوق المراه بشن حمله شنيعه على الازواج المصريين متهمين اياهم بانهم (عينهم فارغه وميملهاش الا التراب ) . وطالب المجلس بضرورة الوصول الى حل جذرى لهذه المشكله وطبعا هذا الحل ليس له علاقه بوقف الكليبات او وقف اشباه المطربات عن الغباء قصدى الغناء وتصوير الكليبات حيث ان ده (عشم ابليس فى الجنه وفى المشمش الاحمر ومن اول المستحيلات) . حيث انه بعد سؤال هؤلاء اشباه المطربات عن هذا الخبر كان الرد القاطع (واحنا مالنا الرجاله بتحبنا يعنى نموت نفسنا علشان احنا حلوين قولوا للستات لما تعرفوا تملوا عين رجالتكم ابقوا طالبونا ان احنا نختفى هاهاهاهاها ). ومع هذا الكلام فقد تم التعاون من قبل احدى هؤلالء اشباه المطربات باعطائنا عنوان ورقم تليفون طبيب التجميل المتسبب فى هذه الكارثه الانسانيه وسيتم مهاجمة معقل الطبيب فى اقرب وقت ممكن

5- فى لفته كريمه من فنانين الوطن العربى تم تنظيم قافله تحمل عشرات النسخ من سيديهات (الحلم العربى- القدس هترجع لنا- الضمير العربى ) وغيرها من الاغانى التى تتحدث عن القضيه الفلسطينيه وسوف يتم ارسال القافله الى اخواننا فى غزه وذلك للرفع من معنويات الشعب المكلوم اثر الحرب الشنيعه التى شنها العدو الصهيونى على فلسطين. كذلك تم ضم الفيديوهات الخاصه بالقمه العربيه الى القافله حتى يشعر الشعب المناضل يتضامن الشعوب العربيه مع القضيه الفلسطينيه . ورغم صعوبة مشاهدة هذه الفيديوهات ليس فقط لعدم توافر اجهزة الكمبيوتر ولكن لعدم توافر الكهرباء من اساسه فان الامل كبير فى الشعب الفلسطينى القادر على فعل المستحيل اى كان وفى اى مكان من تمكنهم من التغلب على هذه المشكله البسيطه

الى هنا سيداتى انسانى ينتهى موجز الانباء وسنوافيكم يالتفاصيل كامله

..............غزه ....................

2009-01-13T12:34:00.000-08:00

كان نفسى من زمان اكتب عن الى بيحصل فى غزه . بس كانت دايما ايدى تيجى عند الكتابه وتتشل ومعرفش اكتب اى شئ
بصراحه مش عارفه اقول ايه ؟

اه
جمله واحده سمعتها من جريح فلسطينى من شويه وقسمت قلبى نصين
المذيع بيساله انت اصابتك ايه ؟
رد بمنتهى البساطه : بتر فى الطرفين .... الحمد لله

كان لازم بس احط الصوره دى
مع انى بشمئز من شكل العلم ومن شكل الطاقيه الى بيحطوها على راسهم ومن شكل الدقن الى بيربوها ومن كل حاجه واى شئ يمت لاسرائيل والصهيونيه بصله بس كان لازم احطها

كان لازم كمان احط الصوره دىدى صورة صلاح الدين الايوبى الى لقيتها ع النت
كان حلمى انى اشوف صلاح الدين الى هيطلع ويجمعنا حواليه بس واضح انه هيظهر بعد اما اموت ب500 سنه

واخيرا ملقتش غير اخر قصيده للرائع فاروق جويده علشان تعبر عن الى جوه جوايا

ارحل وعارك فى يديك

كل الذي أخفيته يبدو عليك
فاخلع ثيابك وارتحل
اعتدت أن تمضي أمام الناس
دوما عاريا
فارحل وعارك في يديك

لا تنتظر طفلا يتيما بابتسامته البريئة
أن يقبل وجنتيك
لا تنتظر عصفورة بيضاء
تغفو في ثيابك
ربما سكنت إليك

لا تنتظر أما تطاردها دموع الراحلين
لعلها تبكي عليك
لا تنتظر صفحا جميلا
فالدماء السود مازالت تلوث راحتيك

وعلي يديك دماء شعب آمن
مهما توارت لن يفارق مقلتيك
كل الصغار الضائعين
علي بحار الدم في بغداد صاروا‏..‏

وشم عار في جبينك
كلما أخفيته يبدو عليك
كل الشواهد فوق غزة والجليل
الآن تحمل سخطها الدامي

وتلعن والديك
ماذا تبقي من حشود الموت
في بغداد‏..‏ قل لي
لم يعد شيء لديك

هذي نهايتك الحزينة
بين أطلال الخرائب
والدمار يلف غزة
والليالي السود‏..‏ شاهدة عليك
فارحل وعارك في يديك
الآن ترحل غير مأسوف عليك‏..‏
‏
***‏
ارحل وعارك في يديك
انظر إلي صمت المساجد والمنابر تشتكي
ويصيح في أرجائها شبح الدمار
انظر إلي بغداد تنعي أهلها
ويطوف فيها الموت من دار لدار
الآن ترحل عن ثري بغداد

خلف جنودك القتلي
وعارك أي عار
مهما اعتذرت أمام شعبك
لن يفيدك الاعتذار
ولمن يكون الاعتذار ؟

للأرض‏..‏ للطرقات‏..‏ للأحياء‏..‏ للموتي‏..‏
وللمدن العتيقة‏..‏ للصغار ؟‏!‏
لمواكب التاريخ‏..‏ للأرض الحزينة
للشواطيء‏..‏ للقفار ؟‏!‏
لعيون طفل مات في عينيه ضوء الصبح
واختنق النهار ؟‏!‏

لدموع أم
لم تزل تبكي وحيدا
صار طيفا ساكنا فوق الجدار ؟‏!‏
لمواكب غابت
وأضناها مع الأيام طول الانتظار ؟‏!‏
لمن يكون الاعتذار ؟
لأماكن تبكي علي أطلالها

ومدائن صارت بقايا من غبار ؟‏!‏
لله حين تنام
في قبر وحيدا‏..‏ والجحيم تلال نار ؟‏!!‏
‏
***‏
ارحل وعارك في يديك
لاشيء يبكي في رحيلك‏..‏
رغم أن الناس تبكي عادة عند الرحيل
لاشيء يبدو في وداعك
لا غناء‏..‏ ولادموع‏..‏ ولاصهيل
مالي أري الأشجار صامتة
وأضواء الشوارع أغلقت أحداقها

واستسلمت لليل‏..‏ والصمت الطويل
مالي أري الأنفاس خافتة
ووجه الصبح مكتئبا
وأحلاما بلون الموت
تركض خلف وهم مستحيل
اسمع جنودك

في ثري بغداد ينتحبون في هلع
فهذا قاتل‏..‏ ينعي القتيل‏..‏
جثث الجنود علي المفارق
بين مأجور يعربد
أو مصاب يدفن العلم الذليل
ماذا تركت الآن في بغداد من ذكري
علي وجه الجداول‏..‏

غير دمع كلما اختنقت يسيل
صمت الشواطئ‏..‏ وحشة المدن الحزينة‏..‏
بؤس أطفال صغار
أمهات في الثري الدامي
صراخ‏..‏ أو عويل‏..‏
طفل يفتش في ظلام الليل

عن بيت تواري
يسأل الأطلال في فزع
ولا يجد الدليل
سرب النخيل علي ضفاف النهر يصرخ
هل تري شاهدت يوما‏..‏
غضبة الشطآن من قهر النخيل ؟‏!‏
الآن ترحل عن ثري بغداد
تحمل عارك المسكون
بالنصر المزيف
حلمك الواهي الهزيل‏..‏
‏
***‏
ارحل وعارك في يديك
هذي سفينتك الكئيبة
في سواد الليل ترحل
لا أمان‏..‏ ولا شراع
تمضي وحيدا في خريف العمر‏..‏
لا عرش لديك‏..‏ ولا متاع
لا أهل‏..‏ لا أحباب‏..‏ لا أصحاب
لا سندا‏..‏ ولا أتباع

كل العصابة فارقتك إلي الجحيم
وأنت تنتظر النهاية‏..‏
بعد أن سقط القناع
الكون في عينيك كان مواكبا للشر‏..‏
والدنيا قطيع من رعاع
الأفق يهرب والسفينة تختفي
بين العواصف‏..‏ والقلاع

هذا ضمير الكون يصرخ
والشموع السود تلهث
خلف قافلة الوداع
والدهر يروي قصة السلطان
يكذب‏..‏ ثم يكذب‏..‏ ثم يكذب
ثم يحترف التنطع‏..‏ والبلادة والخداع
هذا مصير الحاكم الكذاب
موت‏..‏ أو سقوط‏..‏ أو ضياع
‏
***‏
ما عاد يجدي‏..‏
أن تعيد عقارب الساعات‏..‏ يوما للوراء
أو تطلب الصفح الجميل‏..‏
وأنت تخفي من حياتك صفحة سوداء
هذا كتابك في يديك فكيف تحلم أن تري‏..‏
عند النهاية صفحة بيضاء
الأمس مات‏..‏

ولن تعيدك للهداية توبة عرجاء
وإذا اغتسلت من الذنوب
فكيف تنجو من دماء الأبرياء
وإذا برئت من الدماء‏..‏ فلن تبرئك السماء
لو سال دمعك ألف عام لن يطهرك البكاء
كل الذي في الأرض
يلعن وجهك المرسوم
من فزع الصغار وصرخة الشهداء
أخطأت حين ظننت يوما
أن في التاريخ أمجادا لبعض الأغبياء‏..‏
‏
***‏
ارحل وعارك في يديك
وجه كئيب
وجهك المنقوش فوق شواهد الموتي
وسكان القبور
أشلاء غزة والدمار سفينة سوداء
تقتحم المفارق والجسور
انظر إلي الأطفال يرتعدون
في صخب الليالي السود‏..‏
والحقد الدفين علي الوجوه
زئير بركان يثور

وجه قبيح وجهك المرصود
من عبث الضلال‏..‏ وأوصياء الزور
لم يبق في بغداد شيء‏..‏
فالرصاص يطل من جثث الشوارع
والردي شبح يدور
حزن المساجد والمنابر تشتكي
صلواتها الخرساء‏..‏
من زمن الضلالة والفجور
‏
***‏
ارحل وعارك في يديك
ما عاد يجدي أن يفيق ضميرك المهزوم
أن تبدي أمام الناس شيئا من ندم
فيداك غارقتان في أنهار دم
شبح الشظايا والمدي قتلي
ووجه الكون أطلال‏..‏ وطفل جائع
من ألف عام لم ينم
جثث النخيل علي الضفاف

وقد تبدل حالها
واستسلمت للموت حزنا‏..‏ والعدم
شطآن غزه كيف شردها الخراب
ومات في أحشائها أحلي نغم
وطن عريق كان أرضا للبطولة‏..‏
صار مأوي للرمم‏!‏
الآن يروي الهاربون من الجحيم
حكاية الذئب الذي أكل الغنم
‏:‏ كان القطيع ينام سكرانا
من النفط المعتق
والعطايا‏..‏ والهدايا‏..‏ والنعم

منذ الأزل
كانوا يسمون العرب
عبدوا العجول‏..‏ وتوجوا الأصنام‏..‏
واسترخت قوافلهم‏..‏ وناموا كالقطيع
وكل قافلة يزينها صنم
يقضون نصف الليل في وكرالبغايا‏..‏
يشربون الوهم في سفح الهرم
الذئب طاف علي الشواطيء
أسكرته روائح الزمن اللقيط

لأمة عرجاء قالوا إنها كانت ـ ورب الناس ـ من خير الأمم‏..‏
يحكون كيف تفرعن الذئب القبيح
فغاص في دم الفرات‏..‏
وهام في نفط الخليج‏..‏
وعاث فيهم وانتقم
سجن الصغار مع الكبار‏..‏
وطارد الأحياء والموتي
وأفتي الناس زورا في الحرم
قد أفسد الذئب اللئيم

طبائع الأيام فينا‏..‏ والذمم
الأمة الخرساء تركع دائما
للغاصبين‏..‏ لكل أفاق حكم
لم يبق شيء للقطيع
سوي الضلالة‏..‏ والكآبة‏..‏ والسأم
أطفال غزه يرسمون علي
ثراها ألف وجه للرحيل‏..‏
وألف وجه للالم
الموت حاصرهم فناموا في القبور
وعانقوا أشلاءهم
لكن صوت الحق فيهم لم ينم
يحكون عن ذئب حقير

أطلق الفئران ليلا في المدينة
ثم اسكره الدمار
مضي سعيدا‏..‏ وابتسم‏..‏
في صمتها تنعي المدينة
أمة غرقت مع الطوفان
واسترخت سنينـا في العدم
يحكون عن زمن النطاعة
عن خيول خانها الفرسان
عن وطن تآكل وانهزم
والراكعون علي الكراسي
يضحكون مع النهاية‏..‏

لا ضمير‏..‏ ولا حياء‏..‏ ولا ندم
الذئب يجلس خلف قلعته المهيبة
يجمع الحراس فيها‏..‏ والخدم
ويطل من عينيه ضوء شاحب
ويري الفضاء مشانقا
سوداء تصفع كل جلاد ظلم
والأمة الخرساء
تروي قصة الذئب الذي خدع القطيع‏..‏
ومارس الفحشاء‏..‏ واغتصب الغنم
‏
***‏
ارحل وعارك في يديك
مازلت تنتظر الجنود العائدين‏..‏
بلا وجوه‏..‏ أو ملامح
صاروا علي وجه الزمان
خريطة صماء تروي‏..‏
ما ارتكبت من المآسي‏..‏ والمذابح
قد كنت تحلم أن تصافحهم
ولكن الشواهد والمقابر لا تصافح
إن كنت ترجو العفو منهم

كيف للأشلاء يوما أن تسامح
بين القبور تطل أسماء‏..‏
وتسري صرخة خرساء
نامت في الجوانح
فرق كبير‏..‏
بين سلطان يتوجه الجلال
وبين سفاح تطارده الفضائح
‏
***‏
الآن ترحل غير مأسوف عليك
في موكب التاريخ سوف يطل وجهك
بين تجار الدمار وعصبة الطغيان
ارحل وسافر‏..‏
في كهوف الصمت والنسيان
فالأرض تنزع من ثراها
كل سلطان تجبر‏..‏ كل وغد خان
الآن تسكر‏..‏ والنبيذ الأسود الملعون
من دمع الضحايا‏..‏ من دم الأكفان

سيطل وجهك دائما
في ساحة الموت الجبان
وتري النهاية رحلة سوداء
سطرها جنون الحقد‏..‏ والعدوان
في كل عصر سوف تبدو قصة
مجهولة العنوان
في كل عهد سوف تبدو صورة
للزيف‏..‏ والتضليل‏..‏ والبهتان
في كل عصر سوف يبدو
وجهك الموصوم بالكذب الرخيص
فكيف ترجو العفو والغفران
قل لي بربك‏..‏
كيف تنجو الآن من هذا الهوان ؟‏!‏
ما أسوأ الإنسان حين يبيع سر الله للشيطان
‏
***‏
في قصرك الريفي‏..‏
سوف يزورك القتلي بلا استئذان
وتري الجنود الراحلين
شريط أحزان علي الجدران
يتدفقون من النوافذ‏..‏ من حقول الموت
أفواجا علي الميدان
يتسللون من الحدائق‏..‏ والفنادق
من جحور الأرض كالطوفان
وتري بقاياهم بكل مكان
ستدور وحدك في جنون
تسأل الناس الأمان
أين المفر وكل ما في الأرض حولك
يعلن العصيان ؟‏!‏

الناس‏..‏ والطرقات‏..‏ والشهداء والقتلي
عويل البحر والشطآن
والآن لا جيش‏..‏ ولا بطش‏..‏ ولا سلطان
وتعود تسأل عن رجالك‏:‏ أين راحوا ؟
كيف فر الأهل‏..‏ والأصحاب‏..‏ والجيران ؟
يرتد صوت الموت يجتاح المدينة
لم يعد أحد من الأعوان
هربوا جميعا‏..‏
بعد أن سرقوا المزاد‏..‏ وكان ما قد كان
ستطل خلف الأفق قافلة من الأحزان
حشد الجنود العائدين علي جناح الموت
أسماء بلا عنوان

صور الضحايا والدماء السود‏..‏
تنزف من مآقيهم بكل مكان
أطلال بغداد الحزينة
صرخة امرأة تقاوم خسة السجان
صوت الشهيد علي روابي القدس‏..‏
يقرأ سورة الرحمن
وعلي امتداد الأفق مئذنة بلون الفجر
في شوق تعانق مريم العذراء
يرتفع الأذان
الوافدون أمام بيتك يرفعون رؤوسهم
وتطل أيديهم من الأكفان
مازلت تسأل عن ديانتهم

وأين الشيخ‏..‏ والقديس‏..‏ والرهبان ؟
هذي أياديهم تصافح بعضها
وتعود ترفع راية العصيان
يتظاهر العربي‏..‏ والغربي
والقبطي والبوذي
ضد مجازر الشيطان
حين استوي في الأرض خلق الله
كان العدل صوت الله في الأديان
فتوحدت في كل شيء صورة الإيمان
وأضاءت الدنيا بنور الحق
في التوراة‏..‏ والإنجيل‏..‏ والقرآن
الله جل جلاله‏..‏ في كل شيء
كرم الإنسان

لا فرق في لون‏..‏ ولا دين
ولا لغة‏..‏ ولا أوطان
‏'‏خلق الإنسان علمه البيان‏'‏
الشمس والقمر البديع
علي سماء الحب يلتقيان
العدل والحق المثابر
والضمير‏..‏ هدي لكل زمان
كل الذي في الكون يقرأ
سورة الإنسان‏..‏
يرسم صورة الإنسان‏..‏
فالله وحدنا‏..‏ وفرق بيننا الطغيان
‏
***‏
فاخلع ثيابك وارتحل
وارحل وعارك في يديك
فالأرض كل الأرض ساخطة عليك

انا شفتكم كده .....

2008-12-11T14:31:00.000-08:00

كان نفسى من زمان اكتب عنكم بس مكنتش عارفه اعبر ازاى عن الى الى نفسى اقوله
مشكلتى انى مش بعرف انظم وانسق كلامى زى ما بقول لاصحابى دايما انا بدخل ادلق الكلام واطلع
بس بعد كده فكرت هو انا لازم يعنى افحص وامحص واعدل
هو مش المفروض انى اكتب وخلاص وحتى ان خانى التعبير اكيد هتاخدونى على قد عقلى وتطنشوا لانكم عارفين قد ايه انا غليانه فى حكاية الكتابه دى
يووووووووووووووووووه بقى
انا هطلع الى جوايا وخلاص واريح نفسى

احب ابتدى بالشباب الاول صحيح هم بيقولوا ladies first لكن انا مزاجى كده بقى

dr .lecter
اعتقد وافتخر انا محمد هو النسخه المذكره منى وخصوصا الحاجه الشديد انه يغير يعمل حاجه مهمه يصلح وضع غلط بس للاسف حاسس انه متكتف بالف قيد وقيد والحياه والناس مش مديينه الفرصه يا عينى . نفسه يعمل حاجه بيحبها بس مش عارف يبتدى منين ولو ابتدى خايف لا ميكملش او الظروف تقف فى طريقه . متمرد بس شايف الى حواليه ابرد من التلج علشان كده حماسه بيندلق عليه شلال ميه ساقعه طب هيعمل ايه ؟ بيحب احمد خالد توفيق زيى طبعا وتقريبا الى بيحي خالد توفيق بيتحول تدريجيا لنسخه من اشهر شخصياته رفعت اسماعيل علشان كده بقول انه نسخه منى
فيه حلم فى باله انا عارفاه ربنا يحققه له ان شاء الله

kabbary
اول ما الاقى الاسم ده ع الماسنجر ادامى بحس انه داخل بيبتسم ابتسامه عريضه وبيقول here i'm وتحس انك هتسمع اغنيه الحياه حلوه بس نفهمها

متفائل ربنا يديم عليه تفاؤله يارب ويمنع عنه عينى وعين كل الى بيقروا عليه صحيح هو ساعات تفاؤله ده بيشلنى لانى مش عارفه هو بيجيبه منين وايه فى الحياه يخلينا نحبها بس الى فهمته انه وصل للفلسفه زى ما عم جاهين بيقول حبة ايمان مع حبة رضا وشوية امل مع رشة طموح واهم من ده كله انه بيحاول يساعد غيره من الناس الى محتجاله يعنى مش عايش علشان ياكل ويشرب وبس وانا شايفه ان دى اهم حاجه تخلى الانسان مبسوط وراضى ده غير ان عنده طاقة تحمل ربنا يديمها عليه يارب

الفارس الملثم

الموسوعه الدينيه التاريخيه المتنقله ولغاية دلوقتى مش قادره افهم ازاى شاب عنده 21 سنه عنده ماشاء الله كل المعلومات دى وفيه ايه فى اهم حاجه فى حياتنا (انا مش بقر والله ) بس بجد الولد ده عبقرى واكيد بيقرا فى الدين بحب علشان كده الحاجت دى محفوره جوه دماغه
لما بشوف معلوماته الغزيره دى انى ادى حباية الرز ده انا داخله فى ال28 سنه ومعدنيش المعلومات دى فخور قوىى بدينه ودى حاجه رائعه لان اكبر نعمه انعمها علينا ربنا هو الاسلام اعتقد انه كل يوم بيصحى بيدعى الدعوه دى ربنا يديمها عليينا وعليه

ماجا

مش فاهمه ازاى ماجا وكبارى اصحاب يعنى زى ما كبارى متفائل دوما فاحمد بحسه دايما حزين انا عارفه هو حزين ليه وعلى ايه اكتر حاجه فهمتها جواه ان هو انسان حساس والناس الحساسه دى اكيد بتتعب فى الحياه جدا مع ان الرسول عليه افضل الصلاة والسلام بيقول يدخل الجنه اناس قلوبهم كافئدة الطير . لكن للاسف الناس الى حوالينا مش شايفين كده . انا عارفه انه بيحب بلده جدا رغم ان الى بيبان غير كده . لكن الحدق يفهم ان حب بلده بيقطر من كل كلمه من كلامه حتى لو كانت سخط او غضب فهو سخط وغضب الحبيب لما يزعل من او على حبيبته واتمنى انه يشوفها قريب زى ما هو عايز بالظبط

باسم
شخصيه واضحه قوىى مفيهاش كلام يعنى من كلامه تفهم دايما هو عايز ايه ونفسه فى ايه . بحس ناحيته باحساس اخوه غير عادى
مش عارفه ليه ؟ مع ان الاحساس ده بحس ناحية كل الناس بس لما بتخيل لو كان ليا اخ اعكنن عليه واقرف فى عيشته واتحكم فيه كان اكيد هيكون حد زى باسم بس هو ميستهلش بصراحه انه يكون مجنى عليه ويبقى اخويا لانى انا كنت هكون اخت غلثه للغايه وهطلع عقدى فيه
ربنا ينجحه ويحقق الى نفسه فيه

مسلم
اول ولد اكلمه ع النت مع انى كنت رافضه الموضوع ده بس مش عارفه حسيت ان حازم مش هيكون زى الشباب الى بيدخلوا يشتغلوا البنات خصوصا انى حسيت بتشابه غريب بينه وبين ابن خالتى الى اسمه برده حازم فى كل حاجه فى كلامه متدين محترم عنده طموح بس الدنيا مش مدياله فرصه بيتفهم غلط كتير لانه ساعات بيدخل شمال بس هو والله طيب جدا ومش بيكون قاصد اى حاجه وحشهالى يعرفه هيفهم ويعرف كده

صبرى سراج
عمرى ما كلمته بس من قرايتى لمواضيعه حسيت انه انسان هادى وراسى على راى سعاد حسنى بيعرف كويس هو عايز يقول ايه و بيحط كل كلمه فى مكانها ودايما كلامه بيكون فى الجون حقيقه يعنى بيرشق زى ما بيقولوا هو صحفى واكيد هو صحفى ممتاز لانه واضح انه فعلا موهوب ومش بيقول اى كلام بحس انه ابن بلد زى مطربه المفضل محمد فؤاد الى بحس انه وهو بيغنى كانه قاعد فى وسط الناس وبيحكيلهم

relove
انا سيبتك للاخر لانى بعترف ان اكيد اقرب حد ليا من الشباب هو محمد بحس كانه فعلا ابنى علشان كده هو دايما بيقولى ياامى (كشفت السر يا محمد) اى خبر مفرح الاقيه داخل يدور عليا علشان يفرحنى واوى حاجه مضايقاه بيدخل يحكيهالى بمنتهى البساطه وده دليل على كمية الطيبه الى فيه لانه ايه عرفه انى كويسه ولا انى مش هروح اقول السر ده لحد تانى . رومانسى قوىى يعنى من النوع الى بيحب على روحه يمكن لان لسه سنه صغير وانا اعرف ان الشباب فى السن ده بيكون عنده العواطف اوفر حبيتين انا كنت اده فى وقت من الاوقات وعارفه ويمكن هو طبيعته كده وعلشان كده انا عارفه انه هيتعب كتير فى حياته لان الناس مشاعرها تبلدت مع الالم مع الاسف

نيجى بقى للبنات الطف الكائنات

founon
حاله من الوقار والتهيب بتحصلى لما بتكلم معاها بحس كانى بتكلم مع استاذتى فى الجامعه او مدرستى فى المدرسه . فنون هى الانسانه الى لو اتعدلت اتمنى اتحط جوه القالب الى هى طلعت منه . مش عارفه اعد جواها ايه لانه مثال للبنت المصريه المسلمه بكل ما فيها واحسن حاجه فيها هى ثقتها فى نفسها واعتزازاها بكيانها بصراحه انا لو كنت ولد كانت اكيد هتكون فتاة احلامى . مميزه فى كل شئ طيبه وتحس انها اخت لكل حد فينا . اكيد الى بيحتاج لها مش بترده ابدا . بيقولوا عليها زى القمر . بس اهم حاجه النور الى انا بشوفه جواها

امل
الغائبه الحاضره الاستاذه المميزه تحس وانت بتقرا لامل انك غرقت فى بحر من المشاعر والاحاسيس وانك رحت دنيا تانيه . هى بتحاول دايما تبان فى صورة البنت الجاده قوىى لكن انا شايفه جواها بركان مشاعر واحاسيس لو اتوزعت ع الدنيا مش هتكفيها وتفيض . امل فعلا حساسه ولو بينت غير كده . موهوبه لدرجه لا يتخيلها عقل وحاسه ان مجال الادب عندنا هيخسر كتير لو متبناش الموهبه الرائعه دى انا شخصيا لما بقرالها بحس انى مش عايزه اقوم من مكانى وبين السطور والحروف هتلاقى الاحاسيس الرائعه تدخل جواك وتخليه تتنح وتقول الله . نفسى اشوفها كاتبه عظيمه باذن الله

بنت مصريه
ياخرااااااابى عليها . البنت دى مش ممكن حاله من الانبهار بتجيلى لما بشوفلها موضوع ماشاء الله عليها مفكره سياسيه واجتماعيه من الطراز الاول . بنت ب100 راجل زى انا ما بقول انا لو عندى بنت زيها هقولها روحى يا بنتى قلبى وربى راضيين عليكى انا واثقه فى كل الى انتى هتعمليه ومش هخاف عليكى ابدا فى حياتى لان انتى ميتخافش عليكى . شخصيه جبااره جبااره ايه ده . نفسى اروح ابخرها من عين الحسود الى يندب فيها رصاصه (بلدى قوى انا ) بجد الى عنده افكارك وثقتك فى نفسك لازم كل يوم لما يصحى ويبص فى المرايا يقول الحمد لله ان انا كده

houba
الرقه تمشى على قدمين . انا شفتها كده فيها كتير منى بقول عليها توامتى التانيه بعد سندريلا بس الحمد لله ربنا انعم عليها بالرقه الى مش عندى لما باجى اتخيلها بحس انى شايفه واحده لابسه ابيض وطايره على الارض مش ماشيه زينا . عندها طموح وحاولت وبتحاول نفسها تكون زى ماهى عايزه بس للاسف برده الناس والظروف مش مدينها فرصه وكاتمين على نفسها بالقوىى . نفسى اشوفها بتحقق الى هى عايزاه وتكون سعيده . فراشه هى زى ما دايما بتحط صورتها

sahari
متمرده جدا جدا جدا . متحمسه جدا جدا جدا لكن طيبه جداجدا جدا . انا شفت صورتها حسيت بالطيبه الى جواها . وجواها كمان طاقة حب غير عاديه انا عارفه كده ومتاكده انا مش هبله . صحيح هى بتبان غير كده لكن مين قال ان كل الى بنشوفه صح مشكلتها انها محتاجه المكان الصح الى تطلع فيه الطاقه دى لكن بما ان المكان ده لسه متوجدش لان برده الظروف ملطشه معاها محاوطه نفسها بحاجز علشان متتعبش فى حياتها . بس انا شايفه انها قويه جدا جدا جدا وربنا يحقق لها كل احلامها

مملكة الاحزان
يا بنات اسكندريه . زى اى بنت اسكندرانيه بنشوفها فى التلفزيون جدعه جدعه جدعه . واكيد حلوه بس مش لابسه ملايه لف . واثقه من نفسها ومن الى كتبه ربنا ليها وان اكيد بكره احلى من النهارده . رومانسيه اه لكن بافراط لا . اعتقد انها وصلت للمعادله المهببه الى معظم البنات مش قادرين يوصلولها بين العقل والقلب . واتمنى ان احساسى يكون صح وان قراراتها تكون نابعه من عقلها وقلبها

انغام
البت دى بحبها مش عارفه قوى كده ليه مع انى عمرى ماتكلمت معاها وقلبل اساسا لما بتدخل بس بحسها بسيطه قوىى ودمها خفيف موت
هى عايشه بره ورغم كده محافظه على تقاليدها واحترامها لنفسها بشكل رائع . بحس انها بتتعامل بطبيعتها من غير تكلف ولا تصنع ولا تظاهر ودى احلى حاجه فى البنى ادم

لينو
برده الرقه تمشى على قدمين . اعتقد انها شبه اميرات الحواديت .حالمه وجميله ورمانسيه بتفكرنى بشخصية ست الحسن الى كانت مسافره علشان تدور على اخوها الشاطر حسن فاكرين المسلسل ده الى كان بيتعرض واحنا اطفال ابرياء . اهى الشخصيه دى هى لينو
بحس انها منفصله عن ارض الواقع زيى ونفسها تعيش فى قصة خياليه لان الواقع للاسف بايخ ورخم وتافه . علشان كده بحسها قريبه منى رغم انى عمرى ما كلمتها الا من خلال المواضيع . يارب احلامها تصبح حقيقه دايما

جنى
مع انك مش هنا بس كان لازم اكتب عنك يا اكتر انسانه محترمه انا شفتها فى حياتى . انسانه عاقله مش بتشيل ضغائن لحد متفاهمه لاقصى الحدود صبوره على الناس الى اقصى حد عمرها ما غلطت فى حد او جرحته . ربنا يخليلها اسرتها ويكتبلى اشوفها فى يوم من الايام لما احج

mail
مروه حبيبتى نسخه بالكربون من اختى اميره حتى فى الشكل يعنى اخلص من اختى فى البيت الاقيها فى وشى ع النت . اهم اوجه التشابه هو الرومانسيه المفرطه والحنين والاحتياج غير العادى للحب فى مجتمع لا يعترف الا بالماده والجسد وبس . عندها طاقة حب بس للاسف مهدره مش لاقيه لها منفذ تطلعها فيه . مستنيه الانسان المناسب الى تقدر تطلع الطاقه دى معاه بس الظروف مش مساعداها ابدا علشان كده بييجى عليها وقت وتكتئب وتنعزل وتشكى لى بس انا مش بعرف اقولها ايه لان للاسف بكون حاسه بيها . ربنا يديها حلمها

samamasr
الانسانه الى رجعتلى الثقه فى الجنس البشرى تانى وان الاصل فى الانسان الخير مش الشر بعد صراع مرير مع شخصيات مستفزه ايمان جت وحسستنى ان الطيبه لسه موجوده . الناس الى عايشه على الفطره لسه موجوده . ان القلوب البيضه الى مش مليانه الا كل الحب والخير للناس موجوده . ان العقول النضيفه الى مش بتفكر الا بالخير للى حواليها لسه موجوده .ان الانسان ممكن يعيش من غير لا ضغائن ولا كره ولا حقد رغم ان الظروف خارجه عن ارادته بس لسه عنده الثقه فى الله تعالى . حاجه واحده بس غلط فيها هى انها مش عارفه قيمة نفسها مع ان الى زيها لازم يكون هو الغرور ذاته . لكن ازاى غرور ازاى وهى ايمان

cindrella
طبعا كان لازم اختم بيكى يا اقرب الناس ليا . اليزابيث توامتى اللى شبهى فى كل حاجه . مش عارفه اكتب عنك ايه . هو الواحد يعرف يكتب عن نفسه . انتى انا بكل بساطه ووضوح .انا بكل افكارى ومشاعرى وكيانى . عمرى ما شفت حد شبهى للدرجه دى . عمرى ما ارتحت لحد بالدرجه دى مع انى مشفتوش . عمرى ما تخيلت ان تكون my best friend انسانه عمرى ما شفتها وجها لوجه ولا بصيت فى عينيها .لو كان حد قالى كده قبل ما اقابلك كنت قلتله انت اهبل يا بنى لكن فعلا ربنا قادر على كل شئ . انا بدين ليكى بكتير قوىىى . كفايه انك اكتر واحده برتاح معاها . كفايه انى لما بكون زعلانه او متضايقه بدخل ع الماسنجر يمكن الاقيكى موجوده علشان اكلمك واشكيلك همى . كفايه ان بحس بيكى وانتى بتحسى بيا ودى مش مبالغه احنا فعلا بنحس ببعض وبنفهم بعض من غير ما نشوف بعض . انية حياتى ان اقابلك بس انا فعلا حاساكى معايا فى كل حته ومع كل فكره .

انتى حسستينى وكلكم حسستونى ان فيه ناس كتير شبهى عايشين زيى ومهمومين بالى انا مهمومه بيه وان انا مش حاله شاذه زى ما الناس بتقولى
حمد لله

خدعوك فقالو !!!!!! (1-المرأه مشكله صنعها الرجل)

2008-11-15T11:05:00.000-08:00

المرأه مشكله صنعها الرجل

المرأه مشكله صنعتها التقاليد الباليه والعادات المنقرضه والتربيه الغلط الى بتركب الولد فوق دماغ البنت ويدلدل رجليه
المراه مشكله صنعتها النظره السطحيه والتفكير الجاهل الى اختزل المراه من كيان وعقل وروح واحساس الى مجرد كائن مخلوق للفرجه ووعاء لحمل الاطفال وصوره تتعلق على الحيط
المراه مشكله صنعتها الانانيه والافترا والجبروت

لو كل الحاجات دى كانت من الراجل بس
يبقى فعلا المراه مشكله صنعها الرجل

لو نيجى كده نفكر مع بعض
لو واحده وقعها نصيبها مع راجل مفترى ظالم ابن ستين............. طلع عينيها وعين اهلها وكرها فى حياتها
لو جينا نبص لتاريخ الراجل ده وتربيته هنلاقى ان زى ما رباه راجل رباه برده واحده ست
فيه ستات كتيره انا بشوفهم (وخلوا بالكم من كلمة ستات دى) بيربوا اولادهم الصبيان على انهم احسن من كل الناس
وانهم كنز او وليمه بنات الناس عايزه تلتهمها
وعشان انت احسن من كل الناس يبقى تديهم بالجزمه
اوعى يا وله تخلى واحده ست تركبك .لازم تديها فوق دماغها .ده انت راجل ابن راجل

سيبنا من دى
لما شاب كده حليوه يحب يخطب يعمل ايه ؟
يروح لمامته (الى هى برده واحده ست) شوفيلى عروسه يا ماما
تقوم مامته قايمه زى الاسد من عرينه وتفضل تلف من بيت لبيت ومن شغل لشغل علشان تدور لابنه على ميرفت امين ولا ليلى علوى علشان كده تملى عينه لا وفيه شروط كمان لازم العروسه تكون معدتش ال25 سنه علشان تعرف تخلف
امال مين الى هيشيل اسم العيله
طبعا فى خلال رحلة البحث المضنيه دى ممكن تروح بيت متعجبهاش البنت وتفقع كلمتين وتبص بامتعاض كانها شافت كلب جربان وتروح خارجه
ده غير برده انها فى اثناء رحلة البحث دى ممكن تاخد معاها كل ستات العيله (برده ستات) علشان يتفرجوا ويعاينوا البضاااعه
والبنت الغلبانه يا عينى مكسورة الجناح لاحول لها ولا قوه ماهى كمان مغصوبه من واحده ست( امها اكيد)
مفكرتش انها فى يوم من الايام كانت بنت زيها وكانت ممكن تتحط فى موقفها
مفكرتش ان ممكن بنتها العزيزه برده تتحط فى موقفها وتبقى فرجه وفرصه للتريقه
ازاى واحده ست تقبل على واحده من بنات جنسها الاهانه دى
مش عارفه
بس شاطرين عاملين نفسنا احزاب وجماعات والراجل هو سبب تعاسة المرأه وجنس واطى لازم ينباد
ده فين ده

لما تيجى ام على بنتها وتغصب عليها انها لازم تقايل العريس يعنى لازم تقابل العريس
وتجيب العيله وعيلة العيله علشان يدوها كلمتين فى عضمها وجلدها ولحمها علشان توافق تقابله
ولما اكيد البنت هتوافق علشان تريح دماغها مش اكتر وتشوفه وتحس انها شافت عفريت وتقول لا مش هتجوزه
تفضل الام تقرف فيها وتطلع عينيها( زى الدبه كده الى قتلت صاحبها من الحب) وتقولها هتبورى هتعنسى جنبى انتى لامتى هترفضى
انتى فاكره نفسك لسه صغيره الى ادك اتجوزوا وخلفوا وبقية الموشح الاندلسى الى كل بنت عارفاه وحافظاه زى النشيد الوطنى
لغاية يا اما البنت ترضخ للامر الواقع وتتجوز واحد هى مش طايقاه وتعيش اتعس لحظات حياتها معاه
يا اما تصمم على موقفها وتقول لاااااااا والف لااااااااااااااااااا وتفضل بعد كده تعيش ايام التبيط والكلام الى يدبح والتريقه من الى رايح والى جاى

البنت لما بتقبل على نفسها انها تتجوز علشان تقول انها اتجوزت وخلاص وترضى بقى باى حد
ممكن ترضى بواحد عمرها ما شافته ولا عرفته واحد جاى اسبوعين اجازه وعايز اى عروسه يشيلها معاه ويسافر
ولا ترضى بواحد اقل منها فى المؤهل علشان معاه فلوس وعلشان قطر الجواز ميفوتهاش وبعد كده تاخد على دماغها زى ما تاخد
البنت الى اتجوزت لما تمسك البنت الى زيها لكن كانت ضحية الطلاق وتقعد وهى رايحه وهى جايه تتغمز وتتلمز عليها باشنع الكلام
حرسوا يا جماعه منها محدش يكلمها (ده على اساس انها طاعون ولا ايدز) اوعوا تدخلوها بيوتكم اصلكم متعرفوش ان المطلقات دول ميه من تحت تبن وممكن تخطف جوزك وتتجوزه وتتعامل على انها رخيصه من الستات قبل الرجاله

لما ست تقبل انها كل يوم تتهان على ايد جوزها وتنضرب وتجرجر من شعرها وتسكت لمجرد ان المركب تمشى ومتاخدش لقب مطلقه وميحصلهاش الى حكيت عنه فوق

واخيرا والمصيبه الكبيره
ازاى عايزين الرجاله تعاملنا على اننا كيان وعقل وروحنا واحنا نفس بنرخص نفسنا بنفسنا
يعنى لما تطلع اشكال زى هيفا ولا دانا ولا روبى ولا باقى البلاوى المتلتله الى احنا بنشوفها فى الفيديو كليب تتعرى وتقلع وترقص رقص اقل ما يقال عنه انه مقرف
ا ىواحده من دول ميقلش ذنبها عن ذنب الراجل الى بيتحرش ببنت او بيتعرض لها
طيب جسمها وهى حره فيه تعمل بيه الى هى عايزاه ان شالله حتى تروح تعرضه فى السوق السوده
لكن ليه محدش فيهم فكر ان الى بيعملوه ده اهانه لكل جنس الستات
مش بيحسوا فى كل لحظه بيعملوا فيها كده اد ايه هم مرخصين جنسهم
مش عارفين ان الست دى لو مكنتش زى الجوهره الغاليه مكنش ربنا امرها بالاحتشام والاحترام
ليه يحولوها من حاجه غاليه لحاجه رخيصه مبتذله كل هدفها انها تجرى الرجاله وراها علشان يبصوا عليها والى ما يشترى يتفرج
ولا لما تيجى واحده زى ايناس الدغيدى بتتكلم قال باسم حرية المراه وهى اقل حاجه بتعملها انها بتسئ لجنس المراه كله
انا لو وزير ولا قاضى كنت عملت عقوبه للناس دى علشان تخاف وتبطل وتريحنا
نفسى اروح لكل واحد فيهم واصرخ بعلو صوتى واقول
كفاااااااااااااااااااااااااااااااااايه
ارحموووووووووووووووووووووووووووووونا

تفتكروا بعد ده كله ينفع نعيش فى دور الضحيه الغلبانه وان الجنس الاخر هو بس السبب فى الى احنا فيه

المرأه فعلا مشكله
لكن صنعها الرجل والمراه والمجتمع معا

صفحه بيضاء!!!!!!!!!!!!!!!!!!!!!

2008-10-26T16:42:00.000-07:00

احنا جيل غلبان
دى حقيقه بقت واضحه وضوح الشمس ومفيش فيها اى شك
والغلب ده مش بسبب اللى شايفينه من فقر وومرض وسرقه وكوسه واحباط ويأس ومراره وبس
للاسف الوضع بقى اخطر من كده بكتير
مشكلتنا كشباب ان احنا كلما بيزيد عندنا الوعى والثقافه كل ما بتزيد خيبة املنا وصدمتنا
ساعات كتير بنتمنى ان تكون عقولنا انضف من الصينى بعد غسيله علشان منفهمش حاجه فى اى حاجه ولما منفهمش عمرنا ما هنفكر فى حقوقنا ابدا هنعيش وخلاص واهى دنيا وعيشه والسلام
لكن لما بتربى جوانا ان احنا بشر ولنا حقوق وعلينا واجبات مفيش اى حلول وسط ممكن تنفع مع اللى زينا
لازم هنفكر
ولما نفكر لازم هنقول لا اكتر ما نقول نعم
كلمة نعم سهله وبسيطه
لكن كلمة لا بتهز الجبال

ده غير بقى مشكله تانيه اخطر واكبر
ان احنا للاسف مش قادرين نلاقى قدوه لينا نتجمع حواليها ونتعلم منها
وطبعا بما ان احنا جيل مش بيفوت فسفوسه
وحاشرين نفسنا فى كل حاجه حتى التاريخ
فالتاريخ اللى احنا مدمنينه زى ماهو مصدر فخر واعتزاز لينا
بقى اكبر عنوان لخيبة الامل الى جوانا
وازاى ميكونش جوانا خيبة امل واحنا بنقرا عن الناس الى قبلنا الى كانوا شايفين قدوتهم بتتحرك ادامهم وتاكل وتشرب وتنفس

مش مجرد كلمات وسطور زى الى احنا بنقراها
بشر من لحم ودم
ابتداء من سيدنا محمد عليه افضل الصلاة والسلام
مرورا بابو بكر وعمر بن الخطاب والخلفاء الراشدين والصحابه
مرورا على الفاتحين العظام زى صلاح الدين الايوبى
انتهاء بالمناضلين الثوريين زى احمد عرابى ومصطفى كامل وسعد زغلول

يااااااااااااااااه
الناس الى قبلنا كانوا قد ايه محظوظين
ييجوا كده يتفرجوا علينا ويشوفوا
يشوفونا واحنا بنفتش حتى عن صباع قدوه مش لاقيين
ونضطر نلجا للكتب ونعيش معاها احلامنا ونقول اكيد جايه فى السكه بس اتاخرت شويه فى زحمة المواصلات
او تكبر الخيبه اكتر ونلاقى القدوه فى الناس الى بينطوا ادامنا فى التلفزيون ليل ونهار واللى الاعلام مظبطنها معاهم اخر تظبيط
تمشى فى الشارع تلاقى الشباب لابسين تى شيرتات عليها صوة تامر حسنى ولا البنات ماشيين يقلدوا حركات هيفاء المبتذله

حتى لما ربنا بيفتح علينا بحد ممكن نلاقى فيه الامل
الكبار بتوعنا يفضلوا يشوهوا فى صورته ويطلعوا عينه لغاية اما يسلم ويقول حقى برقبتى لان للاسف الناس دى مش عايزه يكون لينا قدوه
من مصلحتها ان احنا نفضل ضايعين

لما نيجى بقى نبص للاجيال الى جايه بعدنا دى ممكن تكون الحاجه الوحيده الى تحسسنا ان احنا مش منحوسين قوىى يعنى
طيب على الاقل احنا عندنا تاريخنا وابطال تاريخنا اللى احنا بنقرا عنه ونفخر بيه ونشوف فيه بارقة امل

لكن الاجيال الى جايه دى هتعمل ايه؟
هتلاقى ايه فى كتب التاريخ تقراه عننا؟
ياترى مؤرخين عصرنا ده بيكتبوا عننا ايه علشان الى جايين بعدنا يقروه؟
ايه الى احنا شايفينه فى حياتنا يستحق انه يتسجل فى كتب التاريخ؟
ولا تاريخنا هو كمان هيفضل جامد متحجر على اللى قبلنا وبس؟

سؤال صعب
الاجابه عنه سهله بس مؤلمه قوىىى
مكن تلاقى كلمة للاسف مع نهاية كل سطر
او تلاقى علامة استفهام كبيره وعلامة تعجب اكبر

ولو حظنا افضل من كده
ممكن يسيبوا الصفح بيضاء
ساعتها يمكن يكون عندنا امل
ونحاول نملى الصفح دى من اول وجديد

هنقدر نملاها
بس مين الى هيبتدى؟

انا والراديو

2008-10-21T08:53:00.000-07:00

اكتر وقت بنسى فيه نفسى وهمومى وانا معايا كتاب وبسمع الراديو
بغرق فى عالم تانى بتوه فيه عن احزانى ومتاعبى وبحس انى فى دنيا تانيه غير اللى انا عايشاهاوبيعدى عليا الوقت من غير ما احس بيه خصوصا لو كان الكتاب ده عن اشخاص زى ما حفروا اسمهم فى ذاكرة التاريخ حفروه فى قلوب كل الناس وخصوصا لو كان الصوت اللى طالع من الاذاعه صوت عبد الوهاب الرخيم (افضل صوت جه فى التاريخ) وبتمنى ان الوقت يقف بيا فى اللحظه دى وميعديش.
يا سلاااااااااااااام احلى مزاج

اعرف غنوتك من برجك
ده اسم برنامج سخيف سمعته فى الاذاعه وفكرة البرنامج ده لو كانت له فكره بتقوم على ان المستمع بيبعت للشخص ضيف البرنامج اللى انا معرفش هو بيشتغل ايه اساسا يقوله على برجه والضيف يستنتج ايه الاغنيه اللى هو بيحبها
يا حلاوه يا ولاد
ده غير بقى كلام من نوعية انت من مواليد برج ايه مش عارفه سنه كام وكوكب اورانوس داخل فى كوكب زحل فهتحصل حاجات محزنه
واخر فرصه للارتباط لبرج الدلو كانت فى شهر 6 وضاعت عليهم بس السنه الجايه هتكون فيه فرصه كبيره وطبعا لازم كل جمله تنتهى بجملة ان ده علم وان اولا واخيرا الله اعلم
سبحان الله
للدرجه دى الناس بقت فاضيه او يمكن يائسه ومستنيين واحد من خريجين مدارس هارى بوتر ولا تبع الاخوات هاليويل علشان يمسك الكره الزجاجيه ويقولهم ايه الى هيحصل وايه اللى مش هيحصل
هم مش عارفين ان الفرح والحزن والحب دول من عند الله
قاعدين ومكلفين خاطرهم ومضيعين وقتهم وفلوسهم على اس ام اس
فعلا اصحاب العقول فى راحه
طيب انا مثلا برج الجدى ياترى اغنيتى المفضله ايه
اكيد بحبك يا حمار ماهى كلها حيوانات منتجه

سمعت فى الاذاعه اغنيه طمنى لمحمد فوزى والى يعرفنى هيعرف عنى انى مدمنة قديم بكل ما فيه من افلام واغانى ومسرحيات بحس بنشوه غير عاديه لما بشوف ادامى حاجه ابيض واسود وبتسلطن كده لما بسمع محمد رشدى ولامحمد فوزى ولا عبد الوهاب ولا غيرهم طالع من الراديو من غير مؤثرات ولااجهزه حديثه تحس كده انا الصوت طالع نقى شفاف مغسول فى الغساله الفول اوتوماتيك
المهم فى اغنية فوزى لقيت المطرب العبقرى بيغنى الاغنيه من غير اى موسيقى والكورال اللى معاه كل واحد فيهم قايم مكان اله موسيقيه معينه بقيت اسمع وبقول سبحان الله ع الموهبه والعبقريه .ياترى لو جيبنا مطرب من بتوع الايام دى وشيلنا من حواليه كل المبانى والاعمده الى بيحطها جنبه وهو وبيغنى وقولناله اعمل زى محمد فوزى كده اعتقد ان ابلغ رد هيعمله ان الارض هتنشق وتبلعه

ابله فضيله صوتها حلو قوىى فى الاذاعه الله يرحم ايامك
كان نفسى الاقى الدنيا ابيض واسود زى ما كنتى بتحكيلنا بس لللاسف فيه الوان نسيتى تقولى لنا عليها

انا قلبى دليلى
لكن قالى مش هتحبى

كلام جميل قوىى

2008-10-08T11:43:00.000-07:00

ياخالق الليل والقمر

يارازق الدود فى الحجر

قوينى ع اللى ما يتقدرش

واهدينى للى ينقدر

ضاقت عليا اقول الله

ضحكت شويه اقول الله

ازعل شويه واضحك شويه

واتعب شويه وارتاح شويه

مانا زى غيرى من البشر

تلمح عيونى شمس مش موجوده

تلمع عيونى بضحكه مش محدوده

يارازق الطير والبشر والدوده

فيضك غزير زى المطر

الدنيا تشقى اقول الله

تزيد فى رزقى اقول الله

مهموم شويه فرحان شويه

ماشى شويه قاعد شويه

لاتفيد ذكاوه ولا حذر

الدعاء من السنه المطهره

2008-08-31T10:22:00.001-07:00

( اللهم انا نسألك موجبات رحمتك وعزائم مغفرتك والسلامة من كل إثم والغنيمة من كل بر والفوز بالجنة والنجاة من النار )

( اللهم اجعل أوسع رزقك علي عند كبر سنى وانقطاع عمرى )

( اللهم اغفر ذنبي ووسع لي في دارى وبارك لي في رزقي )

( اللهم إني اسألك من فضلك ورحمتك فإنه لا يملكها الا أنت )

( اللهم إني أعوذ بك من التردي والهدم والغرق والحرق وأعوذ بك أن يتخبطني الشيطان عند الموت وأعوذ بك أن أموت في سبيلك مدبراً وأعوذ بك أن أموت لدغاً )

( اللهم إني أعوذ بك من الجوع فإنه بئس الضجيع وأعوذ بك من الخيانة فإنها بئست البطانة )

( اللهم إني أعوذ بك من العجز والكسل والجبن والبخل والهرم والقسوة والغفلة والعيلة والذلة والمسكنة وأعوذ بك من الفقر والكفر والفسوق والشقاق والنفاق والسمعة والرياء وأعوذ بك من الصمم والبكم والجنون والجذام والبرص وسيء الأسقام )

( اللهم إني أعوذ بك من الفقر والقلة والذلة وأعوذ بك من أن أظلم أوأُظلم )

( اللهم إني أعوذ بك من جار السوء في دار المقامة فإن جار البادية يتحول )

____________________________________________________

( اللهم إني أعوذ بك من قلب لا يخشع ومن علم لا ينفع وأعوذ بك من هؤلاء الأربع )

(اللهم إني أعوذ بك من يوم السوء ومن ليلة السوء ومن ساعة السوء ومن صاحب السوء ومن جار السوء في دار المقامة )

(اللهم إني أسألك الجنة وأستجير بك من النار) (ثلاث مرات)

(اللهم فقهني في الدين )

( اللهم إني أعوذ بك أن أُشرك بك وأنا أعلم وأستغفرك لما لا أعلم)

( اللهم انفعني بما علمتني وعلمني ما ينفعني وزدني علماً )

( اللهم إني أسألك علماً نافعاً ورزقاً طيباً وعملاً متقبلاً)

( اللهم إني أسألك يا الله بأنك الواحد الأحد الصمد الذي لم يلد ولم يولد ولم يكن له كفواً أحد أن تغفر لي ذنوبي إنك أنت الغفور الرحيم )

( اللهم إني أسألك بأن لك الحمد لا اله الا أنت بديع السموات والارض يا ذا الجلال والإكرام يا حي يا قيوم إني أسألك الجنة وأعوذ بك من النار )

( اللهم إني أسألك بأني أشهد أنك أنت الله لا اله الا أنت الأحد الصمد الذي لم يولد ولم يكن له كفواً أحد )

( رب اغفر لي وتب علي إنك أنت التواب الغفور)

________________________________________________________

(اللهم بعلمك الغيب وقدرتك على الخلق احيني ما علمت الحياة خيراً لي وتوفني اذا علمت الوفاة خيراً لي اللهم إني أسألك خشيتك في الغيب والشهادة وأسألك كلمة الحق في الرضا والغضب وأسألك القصد في الغنى والفقر وأسألك نعيماً لا ينفد وأسألك قرة عين لا تنقطع وأسألك الرضا بعد القضاء وأسألك برد العيش بعد الموت وأسألك لذة النظر إلى وجهك والشوق إلى لقائك في غير ضراء مضرة ولا فتنة مضلة اللهم زينا بزينة الإيمان واجعلنا هداة مهتدين )

( اللهم ارزقني حبك وحب من ينفعني حبه عندك اللهم ما رزقتني مما أحب فاجعله قوة لي فيما تحب اللهم مازويت عني مما أحب فاجعله فراغاً لي فيما تحب )

( اللهم طهرني من الذنوب والخطايا اللهم نقني منها كما ينقى الثوب الابيض من الدنس اللهم طهرني بالثلج والبرد والماء البارد )

(اللهم إني أعوذ بك من البخل والجبن وسوء العمر وفتنة الصدر وعذاب القبر )

(اللهم رب جبرائيل وميكائيل ورب إسرافيل أعوذ بك من حر النار ومن عذاب القبر )

( اللهم ألهمني رشدي وأعذني من شر نفسي)

(اللهم إني أسألك علماً نافعاً وأعوذ بك من علم لا ينفع )

(اللهم رب السموات السبع ورب الأرض ورب العرش العظيم ربنا ورب كل شيء فالق الحب والنوى ومنزل التورات والإنجيل والفرقان أعوذ بك من شر كل شيء أنت آخذ بناصيته اللهم أنت الأول فليس قبلك شيء وأنت الآخر فليس بعدك شيء وأنت الظاهر فليس فوقك شيء وأنت الباطن فليس دونك شيء اقضى عنا الدين واغننا من الفقر)

(اللهم ألف بين قلوبنا وأصلح ذات بيننا واهدنا سبل السلام ونجنا من الظلمات إلى النور وجنبنا الفواحش ما ظهر منها وما بطن وبارك لنا في أسماعنا وأبصارنا وقلوبنا وأزواجنا وذرياتنا وتب علينا إنك أنت التواب الرحيم واجعلنا شاكرين لنعمك مثنين بها عليك قابلين لها وأتممها علينا )

(اللهم إني أسألك خير المسئلة وخير الدعاء وخير النجاح وخير العمل وخير الثواب وخير الحياة وخير الممات وثبتني وثقل موازيني وحقق إيماني وارفع درجاتي وتقبل صلاتي واغفر خطيئتي وأسألك الدرجات العلى من الجنة اللهم إني أسألك فواتح الخير وخواتمه وجوامعه وأوله وظاهره وباطنه والدرجات العلى من الجنة آمين . اللهم إني أسألك خير ما آتي وخير ما أفعل وخير ما أعمل وخير بطن وخير ما ظهر والدرجات العلى من الجنة آمين . اللهم إني أسألك أن ترفع ذكري وتضع وزري وتصلح أمرى وتطهر قلبي وتحن فرجي وتنور قلبي وتغفر لي ذنبي وأسألك الدرجات العلى من الجنة آمين اللهم إني أسألك أن تبارك في نفسي وفي سمعي وفي بصري وفي روحي وفي خلقي وخلقى وفي أهلي وفي محياي وفي مماتي وفي عملي فتقبل حساني واسألك الدرجات العلى من الجنة آمين )

(اللهم جنبني منكرات الأخلاق والأهواء والأعمال والأدواء )

(اللهم اقنعني بما رزقتني وبارك لي فيه واخلف علي كل غائبة لي بخير)

(اللهم حاسبني حساباً يسيراً )

الادعيه من السنه المطهره

2008-08-31T10:04:00.000-07:00

( اللهم آتنا في الدنيا حسنة ، وفي الآخرة حسنة ، وقنا عذاب النار )

( اللهم اني أعوذ بك من فتنة النار وعذاب النار ، وفتنة القبر ، وعذاب القبر ، وشر فتنة الغنى ، وشر فتنة الفقر ، اللهم اني اعوذ بك من شر فتنة المسيح الدجال ، اللهم اغسل قلبي بماء الثلج والبرد ، ونق قلبي من الخطايا كما نقيت الثوب الأبيض من الدنس ، وباعد بيني وبين خطاياي كما باعدت بين المشرقو المغرب. اللهم اني اعوذ بك من الكسل والمأثم والمغرم )

(اللهم اني اعوذ بك من العجز والكسل والجبن والهرم والبخل واعوذ بك من عذاب القبر ومن فتنة المحيا والممات) .

( اللهم اني اعوذ بك من جهد البلاء ، ودرك الشقاء ،وسوء القضاء وشماتة الاعداء )

( اللهم اصلح لي ديني الذي هو عصمة امري ، واصلح لي دنياي التي فيها معاشي ، واصلح لي آخرتي التي فيها معادي ، واجعل الحياة زيادة لي في كل خير ، واجعل الموت راحة لي من كل شر )

( اللهم اني اسألك الهدى ، والتقى ، والعفاف ، والغنى )

( للهم اني اعوذ بك من العجز والكسل والجبن والبخل والهرم وعذاب القبر اللهم آت نفسى تقواها وزكها انت خير من زكاها . انت وليها ومولاها . اللهم اني اعوذ بك من علم لا ينفع ومن قلب لا يخشع ومن نفس لاتشبع ومن دعوة لا يستجاب لها )

( اللهم اهدني وسددني اللهم اني اسألك الهدى والسداد )

_________________________________________________

( اللهم اني اعوذ بك من زوال نعمتك وتحول عافيتك وفجاءة نقمتك وجميع سخطك )

( اللهم اني اعوذ بك من شر ما عملت ومن شر مالم اعمل )

( اللهم اكثر مالى وولدى وبارك لي فيما اعطيتنى ) ( واطل حياتي على طاعتك واحسن عملى واغفر لي)

( لاإله إلا الله العظيم الحليم لا إله إلا الله رب العرش العظيم لا إله الا الله رب السموات ورب والارض ورب العرش الكريم )

( اللهم رحمتك ارجو فلا تكلني الى نفسى طرفة عين واصلح لي شأني كله لا إله إلا انت )

( لا إله إلا انت سبحانك اني كنت من الظالمين )

( اللهم اني عبدك ابن عبدك ابن امتك ناصيتي بيدك ماضي في حكمك عدل في قضاؤك اسألك بكل اسم هو لك سميت به نفسك أو انزلته في كتابك أو علمته احدا من خلقك أو استأثرت به في علم الغيب عندك ان تجعل القرآن ربيع قلبي ونور صدري وجلاء حزني وذهاب همي )

( اللهم مصرف القلوب صرف قلوبنا على طاعتك )

( يا مقلب القلوب ثبت قلبي على دينك )

( اللهم اني اسألك العافية في الدنيا والآخرة )

( اللهم احسن عاقبتنا في الأمور كلها واجرنا من خزي الدنيا وعذاب الآخرة
)

_________________________________________________

( رب اعني ولا تعن علي وانصرني ولا تنصر علي وامكر لي ولا تمكر علي واهدني ويسر الهدى الي وانصرني على من بغى علي ربي اجعلني لك شكاراً لك ذكاراً لك رهاباً لك مطواعاً اليك مخبتاً اواهاً منيباً رب تقبل توبتي واغسل حوبتي واجب دعوتي وثبت حجتي واهد قلبي وسدد لساني واسلل سخيمة قلبي )

( اللهم انا نسألك من خير ما سألك منه نبيك محمد صلى الله عليه وسلم ونعوذ بك من شر ما استعاذ منه نبيك محمد صلى الله عليه وسلم وانت المستعان وعليك البلاغ ولا حول ولا قوة إلا بالله )

( اللهم اني اعوذ بك من شر سمعي ومن شر بصري ومن شر لساني ومن شر قلبي ومن شر منيي )

( الله اني اعوذ بك من البرص والجنون والجذام ومن سيء الاسقام )

( اللهم اني اعوذ بك من منكرات الأخلاق والأعمال والأهواء )

( اللهم انك عفو كريم تحب العفو فأعفو عني )

( اللهم اني اسألك فعل الخيرات وترك المنكرات وحب المساكين وأن تغفر لي وترحمني واذا أردت فتنة قوم فتوفني غير مفتون واسألك حبك وحب من يحبك وحب عمل يقربني الى حبك )

( اللهم اني اسألك من الخير كله عاجله وأجله ما علمت منه وما لم أعلم وأعوذ بك من الشر كله عاجله وأجله ما علمت منه وما لم أعلم . اللهم اني اسألك من خير ما سألك عبدك ونبيك وأعوذ بك من شر ما استعاذ بك منه عبدك ونبيك . اللهم اني اسألك الجنة وماقرب اليها من قول أو عمل وأعوذ بك من النار وما قرب اليها من قول أو عمل واسألك أن تجعل كل قضاء قضيته لي خيراً )

( اللهم احفظني بالإسلام قائماً واحفظني بالإسلام قاعداً واحفظني بالإسلام راقداً ولا تشمت بي عدواً ولا حاسداً . اللهم اني اسألك من كل خير خزائنه بيدك واعوذ بك من كل شر خزائنه بيدك )

( اللهم اقسم لنا من خشيتك ما تحول به بيننا وبين معاصيك ومن طاعتك ما تبلغنا به جنتك ومن اليقين ما تهون به علينا مصائب الدنيا اللهم متعنا باسماعنا وأبصارنا وقواتنا ما أحييتنا واجعله الوارث منا واجعل ثأرنا على من ظلمنا وانصرنا على من عادانا ولا تجعل مصيبتنا في ديننا ولا تجعل الدنيا أكبر همنا ولا مبلغ علمنا ولا تسلط علينا من لا يرحمنا )

( اللهم اني أعوذ بك من الجبن وأعوذ بك من البخل وأعوذ بك أن أُرد إلى أرذل العمر وأعوذ بك من فتنة الدنيا وعذاب القبر )

( اللهم اغفر لي خطيئتي وجهلي وإسرافي في أمري وما أنت أعلم به مني اللهم اغفر لي هزلى وجدى وخطئي وعمدي وكل ذلك عندي )

( اللهم إني ظلمت نفسي ظلماً كثيراً ولا يغفر الذنوب إلا أنت فاغفر لي مغفرة من عندك وارحمني انك أنت الغفور الرحيم )

( اللهم لك أسلمت وبك أمنت وعليك توكلت واليك أنبت وبك خاصمت . اللهم إني أعوذ بعزتك لا اله الا أنت أن تضلني . أنت الحي الذي لا يموت ، والجن والانس يموتون)

رمضان كريم............ياريت نفتكر بعض بالدعاء

2008-08-29T14:28:00.000-07:00

الدعاء من الكتاب المجيد

( ربنا ظلمنا انفسنا وان لم تغفر لنا وترحمنا لنكونن من الخاسرين )
(رب انى اعوذ بك ان اسئلك ما ليس لى به علم والا تغفر لى وترحمنى اكن من الخاسرين )
( رب اغفر لى ولوالدى ولمن دخل بيتى مؤمنا وللمؤمنين والمؤمنت )
( ربنا تقبل منا انك انت السميع العليم ) ( وتب علينا انك انت التواب الرحيم )
( رب اجعلني مقيم الصلوة ومن ذريتى ربنا وتقبل دعاء )
( ربنا اغفر لى ولوالدى وللمؤمنين يوم يقوم الحساب )
( رب هب لى حكماً وألحقنى بالصلحين * واجعل لى لسان صدق في الآخرين * واجعلنى من ورثة جنة النعيم ) ( ولاتخزنى يوم يبعثون )
(رب هب لى من الصلحين )
( ربنا عليك توكلنا واليك انبنا واليك المصير )
(ربنا لا تجعلنا فتنة للذين كفروا واغفر لنا ربنا انك انت العزيز الحكيم )
( رب اوزعنى ان اشكر نعمتك التى انعمت على وعلى والدى وان أعمل صالحاً ترضه وادخلنى برحمتك في عبادك الصالحين )
( رب هب لى من لدنك ذرية طيبة انك سميع الدعاء )
( رب لاتذرنى فرداً وانت خير الوارثين )
( لا اله الا انت سبحنك انى كنت من الظلمين )
( رب اشرح لى صدرى * ويسر لى امرى * واحلل عقدة من لسانى * يفقهوا قولى )
( رب انى ظلمت نفسى فاغفر لى )
( ربنا ءامنا بما انزلت واتبعنا الرسول فاكتبنا مع الشهدين )
( ربنا لا تجعلنا فتنة للقوم الظلمبن * ونجنا برحمتك من القوم الكفرين )
( ربنا اغفر لنا ذنوبنا واسرافنا في امرنا وثبت اقدامنا وانصرنا على القوم الكفرين)
( ربنا ءاتنا من لدنك رحمة وهيىء لنا من امرنا رشدا )
( رب زدنى علما )
( رب اعوذ بك من همزات الشيطين * واعوذ بك رب ان يحضرون )
( رب اغفر وارحم وانت خير الرحمين )
( ربنا ءاتنا في الدنيا حسنة وفي الآخرة حسنة وقنا عذاب النار )
( سمعنا واطعنا غفرانك ربنا واليك المصير )

_____________________________________________________________
( ربنا لاتؤاخذنا ان نسينا او اخطأنا ربنا ولاتحمل علينا اصراً كما حملته على الذين من قبلنا ربنا ولا تحملنا مالا طاقة لنا به واعف عنا واغفر لنا وارحمنا انت مولنا فانصرنا على القوم الكفرين )
( ربنا لا تزغ قلوبنا بعد اذ هديتنا وهب لنا من لدنك رحمة انك انت الوهاب)
( ربنا ما خلقت هذا بطلا سبحنك فقنا عذاب النار * ربنا انك من تدخل النار فقد اخزيته وما للظمين من انصار * ربنا اننا سمعنا منادياً ينادى للايمن ان ءامنوا بربكم فئامنا ربنا فاغفر لنا ذنوبنا وكفر عنا سيئاتنا وتوفنا مع الأبرار * ربنا وءاتنا ما وعدتنا على رسلك ولا تخزنا يوم القيامة انك لاتخلف الميعاد )
( ربنا ءامنا فاغفر لنا وارحمنا وانت خير الرحمين )
( ربنا اصرف عنا عذاب جهنم ان عذابها كان غراما * انها ساءت مستقرا ومقاما )
(ربنا هب لنا من ازوجنا وذريتنا قرة اعين واجعلنا للمتقين اماما )
( رب اوزعنى ان اشكر نعمتك التى انعمت على وعلى والدى وأن أعمل صلحا ترضه واصلح لى في ذريتى انى تبت اليك وانى من المسلمين )
( ربنا اغفر لنا ولإخواننا الذين سبقونا بالايمن ولا تجعل فى قلوبنا غلاً للذين ءامنوا ربنا انك رءوف رحيم )
( ربنا اتمم لنا نورنا واغفر لنا انك على كل شيء قدير )
( ربنا اننا ءامنا فاغفر لنا ذنوبنا وقنا عذاب النار )
( ربنا ءامنا فاكتبنا مع الشهدين )
( رب اجعل هذا البلد ءامنا واجنبنى وبنى ان نعبد الاصنام )
( رب انى لما انزلت الى من خير فقير )
( رب انصرنى على القوم المفسدين )
( ربنا لاتجعلنا مع القوم الظلمين )
( حسبى الله لا إله إلا هو عليه توكلت وهو رب العرش العظيم )
( عسى ربى ان يهدينى سواء السبيل )
( رب نجنى من القوم الظلمين )

_________________________________________________________________

يوميات مواطنه مفروسه !!!!!!!!!!!!!!!

2008-08-27T09:47:00.000-07:00

حجاب آخر زمن
هو المفروض ان الحجاب فرض ولا موضه؟
ده السؤال اللى بينط جوه عقلى لما بمشى فى الشارع واشوف البنات وحجاب البنات ولبس البنات اللى عمره ما يتماشى مع فكرة الحجاب من اساسها
يعنى لما الاقى واحده لابسه بلوزه بودى وجينز ضيق او جيبه ضيقه والاقيها حاطه فوق راسها طرحه هل ينفع اقول عليها محجبه من الاساس؟
لما اشوف بنت رابطه 25 طرحه فوق بعض وحاطه 33 كيلو مكياج بدرجه تلفت الانتباه والنظر ده يتسمى حجاب؟
فى رايى الشخصى والمتواضع والى بيخلى البنات اللى حواليا بيقلوا عليا معقده ان الحجاب كفرض الهدف منه انه يغطى عورة المرأه من فوق لتحت يعنى من الشعر لغاية القدمين بطريق غير ملفته للانتباه
لكن للاسف بنات الايام دى بقوا شايفين الحجاب من منظور ضيق زى خرم الابره شايفين انه الحجاب مجرد انها تغطى شعرها والباقى بقى مش مهم ملوش لازمه
احب اقول للبنات دى واضح ان انتم عندك misunderstanding وبتخلوا بعض الناس تطلع تقول ان الحجاب مش فرض
ماهو طبعا لما حد يشوف واحده عامله كده ماهو لازم يقول علي الحجاب مش فرض
فايدة الحجاب ايه انها تغطى شعرها وتبين كل حاجه تانيه بصراحه ساعتها قلة الحجاب احسن وافضل .
__________________________________________________

مهند ونور وعجائب الامور
الناس مبقاش ليها سيره الا ننوس عين مامته مهند هيموت (يارب قادر على كل شئ)وست الحسن والجمال نور هتعمل ايه من بعده
مسلسلات الدنيا خلصت مبقاش فاضل الا نور ومهند نقعد نتفرج عليهم وعلى 377 حلقه وهم بيتخانقوا ويتصالحوا .بيمرضوا ويخفوا
بيقولوا نسبة تسمية المواليد بمهند ونور بقت عاليه فعلا اصحاب العقول فى راحه فى راحة ايه لا دى ضايعه خالص
سؤال بقى
ايه الميزه فى المسلسل ده بيخلى الناس عامله عليه كده؟
يعنى نور دى الى بيقولوا عليها حلوه اقل واحده عندنا احلى منها مليون مره
ولا مهند الا لما بشوفه بحس انى مش طايقه نفسى
المسلسل مليان باحداث متقنعش واحد عنده تخلف عقلى
يبقى ازاى الامه العربيه بتتفرج عليه ومبسوطه قوىىى كده حتى لما عرفوا حقيقة البطل المره برده مفيش فايده
بصراحه فيه مثل بيوصف الحاله الى احنا فيها دى
مكسب الهبل ع المجانين
___________________________________________________
احنا التلامذه .........قصدى الاساتذه

ساندوتشاتك فى شنطتك مطوتك فى جيبك الى يقولك غششنى قطعه
كل واحد والده او والدته من الى اختاروا مهنة التدريس علشان يشتغلوا فيها ويبتهدلوا على اخر ايامهم المفروض يصحى كل يوم يقولهم كده
مش عارفه ابو ضحكه جنان وزير التعليم بيعمل فى المدرسين كده ليه؟
هل هو حقد ونفسنه منهم ؟طيب على ايه؟يكونوا بيقبضوا اكتر منه؟
ولا كان فيه مدرس معقده وهو تلميذ و بيقوله انت فااااااااااااااااااااااااااشل فاااااااااااااااااااااشل فاااااااااااااااااااااااااااشل فكبر وهو شايل العقده دى جواه وبيطلعها على كل المعلمين دلوقتى ؟
ياخويا مستخسر قوىىى فيهم الفلوس امنعها عنهم بكرامتهم بدل ما تبعزق فيهم وتذل فى الى خلفوهم
وكل شويه تطلع تهفهم تصريح جديد من تصريخاتك وانت مبتسم قوىىىىى للحياه مش عارفه على ايه
واضح ان اللى بيذل الناس ويقعد على نفسهم بيكون مبسوط ع الاخر.
____________________________________________________
تااااااااااااااااامر
معجبات تامر حسنى فى لبنان افترشوا الارض وقعدوا يحدفوه بالورد والدهب
هقول ابه ؟لا تعليق على الخيابه والتفاهه الى حنا وصلنا ليها
انا كتبت كتير عن تامر حسنى وناس كتير هتفتكر انى بكره وبهاجمه ع الفاضيه والمليانه
لكن ناس كتير متعرفش ان انا كنت من اول معجبات تامر حسنى وكنت شايفه انه اكتر واحد يقدر يحمل رسالة الفن الراقى من الجيل ده
بس ايه ؟ تامر حسنى انا شكلى هحبك ولا ايه وحبيبى وانت بعيد وتقولى اوصفهالك وهى ايه الحياه وحضن الغريب وبعيش
مش تامر حسنى اعتذرى للى هيجى بعدى و اكتر حاجه بحبها فيكى هى دى ولو وقفتى تتنططى
بصراحه مش عارفه الوم مين فى الى وصله ده
الومه هو
ولا الوم المنتجين والمؤلفين والملحنين الى وراه
انا شايفه ان اول حد يتلام هو جمهوره الى اى حاجه بقى بيعملها على قلبه زى العسل
واى حد تانى يعمل اى حاجه تانيه حتى لو كانت جيده يبقى فاشل مادام هو مش تامر
للاسف الجمهور مش قادر يصارح نفسه بالحقيقه ومش عايز ينجح حد تانى غيره رغم ان اى حد فكر كويس هيعرف ان تامر هو الخسران فى الآخر .بس ده لما نبطل التعصب الاعمى والتعاطف اللى لا محل له من الاعراب .

هذا الفيلم احبه

2008-08-23T08:46:00.000-07:00

hum tum (انا وانت)

هو: انسان مستهتر بتاع بنات ملوش اى هدف فى الحياه معندوش اى التزام ناحية اى شئ مرح وجذاب وطيب وجدع والشئ الوحيد اللى ممكن يجذبه فى المراه جسمها وشكلها ومش شايف اى حاجه تانيه فيها تستحق الاهتمام لان المراه عمرها ما هتكون زى الرجل ابدا وان اى بنت يتصادق اى ولد بس علشان توقعه فى شباكها (رغم انه طول الوقت حاسس ان هو ميستهلش ان البطله تكون ليه لانه مش بتاع التزام وعيل زى ما بيقول على نفسه!!!!)

هى: انسانه جاده ملتزمه لدرجة ممكن تصل للتعنت لها هدف فى الحياه والتزامات شايفه انها لازم تقوم بيها رغم اى ظروف جميله وجذابه لكن دايما بتحاول تدارى ده لانها برده شايفه ومتاكده ان الرجل مش بيشوف فى المراه الا مجرد جسد والمراه بالنسبه لها كيان وشخصيه قبل ما تكون جسد حسنة النيه وبتتعامل معاه على اساس ده وفى الاخر بتكتشف غير كده
الاتنين بيتقابلوا ويتجادلوا ويتصالحواويفترقوا وهم متخانقين على مدى 9 سنين بيتشا بينهم نوع من الشد واالجذب ورغم الاختلاف الشديد بينهم بيكتشفوا ان كل واحد فيه بينتمى للتانى وميقدرش يستغنى عنه

فيه جمل عجبتنى جدا زى الكلام الى قاله زوج البطله للبطل
(نحن نحتاج للنساء اكتر من ما يحتاجوننا لان بداخل كل منا طفل لا يريد ان يكبر)
وزى الجمله الى قالتها البطله للبطل لما علق على زواج اتنين اصدقائه وانهم مختلفين جدا عن بعض
(كلما اختلفت الاشكال كلما كان هذا مفيدا للعلاقات الانسانيه انها تصحح اخطاء زوجها انه يعوض عيوب زوجته)

________________________________________

sleepless in seattle

قصه رقيقه جدا عمرى ما شفت ارق منها
اتنين بيفصلوا بينهم ولايات وبلاد لا عمرهم شافوا بعض ولااتكلموا مع بعض لكن كان كل واحد فيهم بيدور على التانى من غير ما يعرف
البطله هنا نموذج مثالى للمراه اللى خلقها ربنا الحاجه اللى شدتها فى البطل هى اكتر حاجه المراه بتدور عيها فى شريك حياتها وهى الاخلاص والوفاء
البطل مخلص لزوجته الى توفت اخلاص غير عادى ورغم انها ماتت الا انها عايشه معاه فى كل لحظه (فين الرجل الى كده) ودى الحاجه الوحيده الى عرفتها البطله عنه ورغم كده خلتها تتعلق بيه من غير ما تعرف عنه اى شئ وبيخليها كمان تسافر وتقطع الولايات علشان تقابله يمكن تكون هى اللى بيدور عليها زى ما هى كانت بتدور عليه.
__________________________________________
while you were sleeping

البطله فضلت طول حياتها بتددور على حاجه وطلعت عايزه حاجه تانيه خالص او زى ما كانت بتقول طول الفيلم (الحياه لاتمشى كما نخطط لها)
وتكتشف ان فيه فرق كبير قوىى بين الانجذاب الخارجى والانجذاب الروحى الى عن قرب
هى اتعلقت بالبطل الاول علشان هو شبه والدها اللى كانت بتحبه بس بتكتشف انه شبهه من الخارج بس وده لما بتقابل البطل الحقيقى فى حياتها وتكتشف انه هو ده الى كانت بتدور عليه وان هو فعلا اللى شبه والدها بس فى الشخصيه والتصرفات.ده غير ان احساسها دايما بالوحده بحكم انها عايشه طول عمرها مع قطه خلاها تدور على الدفء والحب الى قدرت تشوفه فى عيله مترابطه بتحب بعضها وتلاقيه مع شخص قدر انه بمنتهى البساطه يحقق لها كل احلامها حتى لو كانت مدينه جوه بيت زجاجى
________________________________________________
you've got amail

هل ممكن الحب يتولد عبر السلوك والاجهزه بين اتنين كل اللى بيجمع بينهم حروف بتنكتب على جهاز والحروف تترجم لمشاعر واحاسيس .
البطل والبطله فى الحياه العمليه مش طايقين بعض وكل اما يتقابلوا يتخانقوا لكن عبر شبكة الانترنت بيكون الوضع مختلف تماما طيب ايه السبب؟
يمكن لان كل واحد فيهم لما بيدخل يتكلم مع التانى بيكون على طبيعته هو من غير تكلف ولا تصنع ولا ادعاء كل واحد بيحكى عن نفسه للتانى من غير تزييف ولا تاليف
افتكر كده
اعتقد ان الفيلم ده حاله فرديه لان مش كل اتنين بيدخلوا يتكلموا على النت بيكونوا على طبيعتهم من غير تكلف فيه ناس كتير بتدخل تتكلم وهى جواها اغراض تانيه
علشان كده قصة الفيلم مينفعش تتطبق الا على اتنين فعلا نيتهم سليمه .مش داخلين لغرض معين

ملحوظه: رغم ان الناس الى بره دى معندها ربع المشاعر والاحاسيس الى عندنا الا انهم للاسف بيقدروا يقدموا القصص الرومانسيه صح من غير تصنع ولا تكلف بيعملوها بمنتهى البساطه وتحس بيها فى الحركات والتصرفات فى حين ان عندنا الرومانسيه بتقدم بطريقتين
يا شوية كلام حب سخيفه مرصوصه جنب بعض ماتحسش باى كلمه فيها
يا شوية مشاهد مبتذله مؤرفه بيقولوا عليها فى ضرورات الدراما لان مفيش حب من غيرها (خدوعك فقالوا) ده على اساس ان اى حد شاف الافلام اللى قلت عليها دى يقدر يطلع فيها مشهد واحد خارج ورغم كده فى منتهى الرقه والرومانسيه وانا شايفه ان المشاهد دى اصلا بتفسد المشاعر الانسانيه.

2008-08-16T08:43:00.000-07:00

بنات

بنات بنات
فى بلد البنات كل البنات
ماليه جيوبها سكر نبات
فى بلد البنات كل البنات
ماشيه وظابطه فى ايدها الساعات
وقبل ما تقفل بيبان البيوت
وقبل ما ينزل ظلام الحارات
فى بلد البنات بتجرى تروح
بنات بنات
فى بلد البنا كل البنات
لما بتضحك بترقص قلوب
لما تغنى تاخدنا الآهات
بنات بنات

بنات بنات
فى بلد البنات كل البنات
تحلم تضوى زى النجوم
بتحلم ترفرف زى الرايات
بنات بنات
بتقدر تعاند وتقدر تثور
لكن ساعات بترمى الساعات
دق الساعات بيجرح حاجات ويخنق حاجات
فى بلد البنات كل البنات
بنات بنات
فى بلد البنات كل البنات
ماليه جيوبها سكر نبات
بنات بنات
_____________________

شدى الضفاير

امايا يامه امايا يامه
شدى الضفاير شدى رباطها عصبينى
لو قادره ياما لو قادره ياما
تقيديها قيديها وقيدينى
شعورى موجه عماله تلعب عماله ترقص فوق جبينى
شعورى شوق وبشوقى حايره
مااناعارفه ماشيه ماانا عارفه طايره
وكلام فى سرك وبقولها مره
عذاب بحسه عذاب وثوره
امايا يامه جوايا ليه
امايا يامه جوايا ايه
جوايا حيره جوايا ضلمه
جوايا طير قلقان فى عشه
لا انا قادره اشيله ولا قادره اهشه
وكلا فى سرك بقولها مره
عذاب بحسه عذاب وثوره
امايا يامه امايا يامه
شدى الضفاير شدى رباطها عصبينى
لو قادره يامه تقيديها قيديها وقيدينى
________________

ياامه

يامه خدينى فى صحبتك يامه
يا مه خدينى فى حضنك الدافى
انا لسه فاكره كلمتك يامه
لكنه حمل تقيل على اكتافى
يامه نهار غربه وليل احزان
غيراللى عشته معاكى واللى كان
نبع الحنان خدنى ودانى
طب فين اروحله فين اروح تانى
يامه خدينى فى صحبتك يامه
يامه خدينى فى حضنك الدافى
انا لسه فاكره كلمتك يامه
لكنه حمل تقيل على اكتافى
يامه ولا بكدب ولا بضطر
لكنى مش لاقيه لحياتى بر
عايشه الحياه بالروح وانا ذنبى
هو انى فاتحه للبشر قلبى
يامه خلاص مش عارفه اعمل ايه
ولا شئ فى نفسى بطلبه والاقيه
ابكى تجف دموعى يامايا
وادعى ياريتك تبقى ويايا
يامه خدينى فى صحبتك يامه
يامه خدينى فى حضنك الدافى
انا لسه فاكره كلمتك يامه
لكنه حمل تقيل على اكتافى

2008-08-08T09:04:00.000-07:00

رضى الله عنها

مش عارفه ليه لما بكون مخنوقه ومتضايقه بتيجى على بالى هى علطول
بحس انى عايزه اجرى عليها واترمى فى حضنها واقعد اعيط وهى تطبطب عيا
لانى انا بحس دايما انها كانت طاقة حنان وحب وايمان رهيبه تكفى نساء العالم كله على مر التاريخ والزمان

اللهم بلغنى الشهاده

دايما بدعى الدعاء ليا مفيش غيره
حلم حياتى فعلا انى اموت شهيده وبقولها بكل صراحه انا بحسد كل شهيد من فجر التاريخ وبقوله ياريتنى اكون مكانك

سؤال؟

يا ترى انا الصح ولا الناس هى اللى صح؟
اكيد مينفعش امشى العالم زى ما انا عايزه
لكن معنى كده انى استسلملهم واتنازل عن مبادئ ؟
بصراحه مبقتش عارفه اعمل ايه
لا قادره اعيش باللى انا فيه
ولا قادره امشى زى ما الناس عاوزه
عمرى عدى وهيفضل يعدى وفى الاخر هكتشف نفسى انى كنت اكبر غلطانه

هم يضحك وهم يبكى وهم يفرس !!!!!!

2008-08-03T11:40:00.000-07:00

ياختى جميله

والله صورتك خساره فى الموضوع

واحده (هيفا) بمليون دوولار
______________

على طريقة كلما تعرى اكتر تكسب اكتر فالست (هايفه) اخيرا هتتعطف وتتكرم
وتحن على السينما المصريه الغلبانه اللى محتاجه مواهب جباااااااااره زيها
وهتمثل فيها مع مخرج الفظائع (خالد يوسف) وهتتواضع وتاخد اجر مليون دولار
اعلى اجر فى تاريخ السينما
يعنى هتاخد اكتر من عادل امام نفسه
وليه متاخدش يعنى
هى مش احسن من يسرا وليلى علوى ومنى زكى وحنان ترك
واجدع من احمد زكى والسقا وكريم وحلمى
ويمكن كمان احسن من فاتن حمامه وشاديه والسندريلا نفسهم

فعلا الله يرحمك يا فن
الست (هايفه) بتعمل ايه فى حياتها علشان تاخد مليون دولار
يعنى لا موهبه لا فى الغنا ولا التمثيل ولا البتنجان بالبشاميل حتى
كل اللى حيلتها خدته من عند دكتور تجميل شاطر
ازاى واحده زى دى بتهين فى كل لحظه قيمة المراه وتختزلها لمجرد جسد بيتعرى ويتلوى تاخد مليون دولار
بس اعدين يفلقونا ويقلولونا عايزين نقنن استخدام النجوم العرب الموهوبين اللى زى هند صبرى وسلاف وغيرهم
اه
ماهو تقريبا عايزين يفضوا الساحه الفنيه لامثال (هايفه ) وغيرها
السؤال بقى
اذا كانت ست الستات بتيجى تعمل فيديو كليب 5 دقايق وكمان اقل بتسوى فيه هوايل الهوايل؟
امال لما تيجى تعملنا فيلم ومع واحد زى خالد يوسف هتورينا ايه؟
مش هقول غير ربنا يستر
ويرحمنا من اللى عايزين ينشروا الاباحيه باسم الفن
وعجبى

هع هع هع هع
_______

(السبب الرئيسى فى موت الضحايا لا يرجع الى غرق العباره بل الى الارهاق العام واحتقان الزور والكدمات )

مش عارفه كل اما اسمع الجمله دى بسخسخ من الضحك لدرجة انى بحس ان انا معنديش دم
طيب اعمل ايه يا ناس؟
ما الجمله دى على قدر ما تحمل من استفزااااااااز ما بعده استفزااااااااااااااااااز
واستخفاااااااااااااااااااااااف بعقول الناس ما بعده استخفاااااااااااااف
بتحسسنى ان احنا شعب متخلف عقليا ولا بسين طاسه فوق دماغنا وعمالين نقول اصل انا عندى شعره ساعه تروح وساعه تيجى
طيب انا راضيه ذمة القاضى اللى قرا الكلام ده على الناس
انا عايزاه كده يجيب اى دبانه طايره فى الهوا ويقولها الكلام ده ويقنعها بيه
قال الناس ماتت من الاجهاد العام
طبعا يستهالوا ونص
اذا كان العباره غرقت بيهم فوق الارض ومش فى الميه وعلى اجدعها جزيره فيكى يا كره يا ارضيه
وع الجزيره دى ميه وخضره ومنتجعات سياحيه ومستشفيات وصيدليات مليانه برادورال وانتيبيوتيكس
ده غير المسرح المكشوف اللى كان بيغنى عليه عمرو دياب وتامر حسنى
يبقى ازاى الغرقى معدومين الادب والاخلاق دول يموتوا وعايزين يجيبوا الذنب ع الراجل المسكين الغلبان صاحب العباره
والله ده حرام
بجد فعلا يستاهلوا اللى يجرالهم

ما تيجوا نرقص!
________

وزارة الثقافه بتاعتنا هتنظم مهرجان للرقص الشرقى لتنشيط السياحه فى مصر
وسعمونىىىىىىى احلى سلام لراقصات مصر كلهم نااااافر نااااااافر
مصر تحولت من بلد الحضاره والاهرانات والتاريخ لمهد الرقص الشرقى
انا شايفه بقى بما انهم شالوا الاهرامات من عجائب الدنيا السبع
يحطوا بدالها فيفى عبده ولا دينا على الاقل منبقاش خرجنا من المولد بلا حمص
اهى كلها عجايب

عجايب