يا ناس ياهوووووه
الحب ليه بتفلسفوه؟
طول عمرنا من وقت سنين المراهقه وكل واحد فينا بتتحرك جواه مشاعر ميعرفش معناها ايه او رايحه فين
احاسيس جميله رقيقه بتدينا كل يوم شعور ممتع ورائع نصحى الصبح ونسمع البلابل بتغرد والعصافير بتزقزق وعندنا طاقه تكفى بلد
ونقعد نغنى اغانى عبد الحليم ونجاة
اغانى الحب يعنى
طيب هو احنا كنا فى الوقت ده عايشين قصة حب
اعتقد لا
بالنسبه ليا انا شخصيا
بس ساعتها كنا بنحب الحب نفسه
يعنى بمعنى ان احنا كنا بنمشى نحب على روحنا
طاقة حب جميله عاليه عندنا مش عارفين نوجهها فين ؟
فيه الى لازم يدور على اتجاه يوديها فيه لحسن يطرشق من كتر الحب ولا حاجه
وتلاقيه يمشى ورا بنت زميلته فى المدرسه ويحطلها جوابات فى الكتاب
او يقعد زنهار لبنت الجيران الاموره الى ادامه ويراقبها زى ظباط المخابرات
وفيه الى الخيال يسرح بيها وتعيشها مع ممثل عامل دور حلو فى مسلسل ولا فيلم
فيه بقى النوع التانى الى بيحوش طاقة الحب دى ويكتمها لغاية ما يجى الوقت المناسب والشخص المناسب علشان يطلعها
النوع ده بيكون عملى او بيكون الحب عنده مش مجرد نظره واغنيه وتنهيده يعنى بيكون نوع ناضج اكتر
يعنى كده من الاخر كان مفهوم الحب عندنا سهل ومش معقد
عارفين ومتاكدين ان الى هنحبه اكيد اكيد هنرتبط بيه
ودى بقى اكبر خدعه بنكون عايشين فيها
يعنى للاسف لما ببص حواليا بلاقى ان معظم قصص الحب بتنتهى نهايه غير الىى احنا حاطينها فى دماغنا
يعنى الاتنين مش بيرتبطوا بعض من الاصل
وايه
مش علشان مثلا ان الولد هو على ابن الجنانينى والبنت هى البرنسيسه انجى فالحب مستحيل
لا
ده الاتنين بيكونوا من نفس المستوى الاجتماعى والثقافى
الاتنين متعلمين وولاد ناس كويسين
يعنى فرص الارتباط سهله
لكن برده مفيش فايده
طيب ايه بقى الى بيخلى القصص دى تفشل رغم انها بتحمل كل مقومات النجاح؟
وده يجرنا لسؤال هنلاقى عليه نفس الاجابه
ليه قصص الحب زمان كانت بتنجح ودلوقتى لا؟
دلوقتى اكبر مشكله بتواجه الشباب خصوصا الذكزر منهم هى ان محدش فيهم عنده الاستقلاليه الكامله انه يتجوز الى بيحبها
يعنى الواحد من دول يتخرج من الكليه معندوش لا مشروع ولا وظيفه ولا شقه
وتلاقيه طبعا بيعتمد على مين فى الحاجات دى كلها
على اهله
وطبعا اهله بما انهم عقليه متفتحه قوىى قوىىى هيقولوا له
ازاى نوافق انك تتجوز واحده مشيت معاها ؟
ولو عايز تتجوزها يا حبيبى ابقى روح اصرف عليها انت احنا ملناش دعوه بيك
لازم تتجوز العروسه الى مامتك اختارتهالك بنت مؤدبه ومحترمه وعمرها ما عرفت ولد
ابتساااااااااااااااااااااااااااااااامه بقى
قال يعنى البنت الى اختاروها كانو بيراقبوها من اول ما اتولدت وعرفوا اذا كانت تعرف اولاد ولا لا
او البنت الى الولد اختارها سمعتها مثلا سابقاها فى جمهورية مصر العربيه كلها
فطبعا نوع من السيطره بيمارسه الاهل وبيستخدمه فيه عدم قدرة الشباب على تحقيق اى حاجه
طبعا هم الاهل هنا بيكونوا فاكرين انهم بيعملوا كده علشان مصلحة الابن وصعب جدا انهم يقتنعوا بغير كده
ولو جبتلهم الف عقل على عقلهم مش هيقتنعوا
انا والدى ووالدتى الاتنين اتجوزا عن حب والحمد لله اتجوزوا
وده لان الاتنين اعتمدوا على نفسهم فى كل حاجه
الشقه والجهاز وكل حاجه
لكن دلوقتى صعب قوىى قوىى ان اتنين يكافحوا زى زمان لان العيشه بقت صعبه قوىى قوىى
والى ممكن تحققه زمان فى سنه دلوقتى محتاج عشر سنين علشان تعمله
وبالتالى فالشباب مش هيقدروا انهم يخرجوا من عباية الاهل ابدا مهما عملوا
ده غير ان كمان مفهوم الحب بيوصل للاهل بطيقه للاسف غلط
حب يعنى خطيئه
وده طبعا بسبب الافلام والملسلسلات الهادفه الى احنا بنشوفها فى تلفزيونا العربى
يعنى انك بتحب واحده يعنى ماشى معاها يعنى انتم الاتنين تستاهلوا الرجم بالحجاره
ده غير حتى لو الاهل معندهمش مشكله تلاقى المشكله فى الاتنين الحبيبه
الشاب ممكن يكون مش عايز يتحمل مسئولية الاختيار ويروح لمامته علشان تجوزه اهو لو حصل مشكله بعد الجواز يلاقى حد تانى يلومه بدل اما يلوم نفسه
البنت تلاقيها من النوع الفافى الى مش عايز يشقى ولا يكافح ولا يتعب عايز كل حاجه ع الجاهز ويمكن كمان يكون فوقيها الحب كادو
يعنى الحب عندها بيتكيف على حسب متطلباتها هى
وحتى لو الاتنين دايبين فى بعض ومستعدين يفحتوا الصخر علشان يعيشوا وسوا ده فى حد ذاته جميل بس الاصعب لما هم الاتنين بيرسموا صوره ورديه لكل حاجه وان كل حاجه سهله مادام الحب موجود وده للاسف غلط لان اى مشكله صعبه بتقابلهم بينصدموا ويحسوا ان كل شئ راح وانتهى والحب عندهم صورته بتتهز وممكن يضيع وينتهى
انا شخصيا بقى عندة شك كبير مش فى وجود الحب لان طول ما ربنا موجود فالحب اكيد هيكون موجود
الشك الى عندى بقى فى قدرة الناس على الحب والاهم قدرتهم على الاحتفاظ بالحب ده
للاسف الحب مبقاش مجرد عاطفه جميله بين اتنين
بقى حاجه مكلكعه معقده بنتفنن ان احنا ندخل فيها كا شئ يفسدها ويعقدها اكتر واكتر
على راى صباح
الحب ليه بتعقدوه
نور الفتارين انطفى
.jpg)
