الخميس، 29 مايو، 2008

بحبك يا بنت الذين !



ايوه بحبك
ببساطه بحبك
بموت فى ترابك وسماكى
بموت فى كل حته فيكى من فوقك لغاية تحتك
ساعات كتير بتخنق منك وبحس انى بكرهك ومش طايقه اعيش فيكى
ساعات كتير ادعى عليكى واتمنى انى اسيبك واهرب واشوفلى بلد تانيه اعيش فيها
لكن هل يا ترى كل المشاعر دى طالعه من قلبى من جوه جوه قلبى
كل كلمه من الكلام ده انا فعلا حاسه بيه وعايزاه بجد ؟


مش عارفه ليه حالى معاكى بيكون ملخبط
ساعه فرح وساعه حزن
ساعه امل وساعه يأس
ساعه حريه وساعه خوف
مشاعر حيرانه مضطربه مش لاقيه لها بر ترسى عليه
كل اما احس انك خلاص هتاخدى بايدى وتريحينى من حيرتى الاقى احساسى طلع كداب
كل اما احس انى خلاص هحقق احلامى بيكى وليكى الاقى نفسى نزلت على جدور رقبتى

مش عارفه اذا كنتى انتى اللى سايبانا ولا احنا الى سيبناكى ؟
مش عارفه اذا كنا احنا السبب ولا انتى ؟


لكن اوقات كتير افكر
ازاى اكون مش بحبك وانا اعشق تاريخك وحضارتك وانا بقرا عنهم فى الكتب واقول بفخر هى دى بلدى
ازاى اكون مش بحبك وانا كل سنه قلبى ينتفض بين ضلوعى فى ذكرى 6 اكتوبر وتحرير سينا وذكرى كل انتصاراتك واتمنى انى كنت عايشه فى الوقت ده
ازاى اكون مش بحبك ونظرتى لاعدائك نظرة تقزز واشمئزاز جدير بيها اى صرصور او تعبان
ازاى اكون مش بحبك وانا بتابع بكل حماس متش كوره بين فرقك وبين فريق اى دوله تانيه وانط فوق مع كل جون ليكى وارقع بالصوت مع كل جون فيكى
ازاى اكون مش بحبك وانا بكره كل حاجه وحشه بتحصلك وتحصل لشعبك وتنيمه حاطط ايه على خده وشايل هم بكره
ازاى اكون مش بحبك وانا كل اما افكر ابعد عنك احس انى روحى بتنسحب منى ومش قادره اتنفس
ازاى اكون مش بحبك وانا اتمنى كل يوم ان ربنا يزيح عنك الظلم وياخد بايدك وايدنا معاكى لمستقبل افضل واجمل

واخيرا

ازاى اكون مش بحبك وانا بموووووت فيكى






تخاريف بعد منتصف الليل !!

بيقولوا عليا معقده ! كتير قالوا كده وانا والله مش كده كل مشكلتى انى نفسى كل حاجه تمشى صح فى البيت فى الشغل فى الصداقه فى الحب . كل حاجه لو مشيت بطريقه صحيحه وعادله محدش هيبقى عنده مشاكل

لكن المشكله انى دايما كفة ميزان اعلى من التانيه . حد بيشتغل اكتر من التانى .حد صريح اكتر من التانى. حد بيحب اكتر من التانى.والاخيره دى بقى مشكله لوحدها .قال عايزنا نحب قال ! نحب ازاى؟ ايه اللى يعرفنا ان اللى احنا هنحبه هيبادلنا نفس الشعور ولو بادلنا ياترى هيحبنا قد ما بنحبه ولا لا . اكيد لا ؟ يبقى ليه يكون عندنا نقطة ضعف حد يستغلها فينا . الضعف شئ وحش بشع . الواحد ممكن يكون ضعيف فى حاله واحده بس ادام ربنا لان ساعتها الضعف هيكون منتهى القوه ولان ربنا عمره ما بيستغل ضعف حد .دايما يساعد الانسان عشان يخرج من ضعفه ويقويه

لكن الناس يا سلام عليهم لما بيلاقوا حد ضعيف بيركبوه ويبهدلوه


فيه ناس كتير بتلومنى عشان انا مش بلبس زى باقى البنات ومش بتزوق زى باقى البنات ومش بفكر فى الحاجات الى بتفكر فيها كل البنات طيب هو انا لازم اغير نفسى عشان اعجب انا عاجبانى طبيعتى مادام مفيهاش حاجه تغضب ربنا ولا تضايقنى يبقى ليه اغيرها ؟

حاجه غريبه على راى حليم وشاديه
ليه الناس بتبص دايما لبره ؟ ليه بيهتموا بالقشره الخارجيه ؟ ليه مفيش حد فيهم عنده نظره ثاقبه تقدر تدخل جوه الانسان وتكتشف الحلو والوحش من غير ما يتاثروا بالشكل الخارجى

نفسى اقابل حد يفهمنى بجد يشوف الى جوايا مش اللى بره

بس يا ترى هل الحد ده موجود ولا .................... ربنا وحده الى يعلم



الجمعة، 23 مايو، 2008

الـــيـــزابـــيـــــــث

مغرمه انا قوىى بالشخصيه دى (elizabith) وبالروايه دى (pride and prejudice)
حاسه قوى ان الشخصيه دى شبهى فى حاجات كتير قوىى
التمرد
الكبرياء
العناد
ممكن عشان كبريائها وكرامتها تدوس على مشاعرها واحاسيسها لان دول عندها اهم من كل شئ
عنادها ساعات بيخليها تتسرع وتحكم على الناس بسرعه وتاخد فكره عنهم ممكن تكون غلط
لو حد غلط فيها مره واحده سواء كان قاصد او مش قاصد بتحس انه جرحها جرح عمره ما هيطيب ابدا
ممكن عنادها يزيد عن الحد ويخليها تضيع حاجات جميله قوىى من ايدها
الحب بالنسبه ليها مش زى باقى الناس
نظرتها للحب والحياه غيرهم
وده بيخلي اللى حواليها يحسوا انها مش طبيعيه وانها هى اللى غلط وانها مختلفه
لكن هى بتحس ان هى الصح وان الى حواليها هم الى مش طبيعين ومختلفين
عموما كل شخصيات الفتاه فى روايات جين اوستين بتأسرنى لانى كنت بحس فيها ان البنت مش مجرد جسم جميل
او وجه اجمل لااااااااااااااااا البنت ارقى من كده البنت عقل وقلب وشخصيه قبل كل شئ

لكن تظل شخصية اليزابيث لها مكانه كبيره فى قلبى لانها ببساطه شبهى

الثلاثاء، 13 مايو، 2008

حــــــــتــــــــــة حــــــــــــــاــــــــــــــــــم



أما أنا يا ابني شفت لك
امبارح حتة حلم
أغرب من أغرب فيلم

شُفت ل
ك الديك بطاقية حمرا و جلابية
واقف بيكلّم شمس الصبحية
يا شموسة يا ام ضفاير دهبية
دهبِك فالصو.. قُصّيه و ارميه

الشمس انكسفت خالص

بقى لونها أصفر خالص
زي لمونة من الدهب الخالص
و انعص
رت خالص
و قالت له بصوتها الدهبي
تقصد إيه؟

قال لها

لو سبتي السما و نرلتي السوق
الناس حيبصوا لك من تحت لفوق
و يقولو
ا
و دي تنفعنا بإيه؟

لو كنتي جنيه
كنت اشتري بيكي مصاصة و بالون اتنطط بيه
لو كن
تي جنيه أو حتى قرش نحاس
مش كنتي بقيتي مفيدة لكل الناس؟


فكرّت الشمس الدهبية شوية
و قالت
للديك
إنت ولا فاهم حاجة يا ديك

و عامل لي فكيك
ده لولايا عليك
ما كنت طلعت من البيضة

و لا كنت اتعلّمت الغنا و المزازيك

و لولايا على الناس و الدنيا
ما كان
تش الأيام البيضا تصبح بيضا
ولا كانت أرض الناس تولد فاكهة
و سنابل و فاصوليا
و لا ورد ندوّبه في كلونيا

الديك ا
لمتكلّم .. بلّم
و جري يا فكيك من غير ما يحيّي و لا يسلّم

و صحيت و انا باصرخ و اتكلّم
خدوا كل فلوسي .. ورق و دهب و نحاس
و سيبوا لي الشمس يا ناس
سيبوا لي الشمس يا ناس
سيبوا لي الشمس يا ناس

من ورا ستارة الليالي
شمس بكرة جايّة تاني

إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة

شمس
بكرة جايّة جايّة
بكرة أجمل م النهارده




شُفت يوم عصفورة نونو
لسه طالعة م
ن أودتها
ريشها كان مبلول و لونه
لون غناها و صوصوتها

قمت قُلت ف عقل بالي
بقى دي جناحها يشيلها؟
سِبتها و مشيت في حالي

بعد مدة قلت آجي لها


قال لي واحد من جيرانها
ياه دي طارت ليها مدة
قلت معنى طيرانها
بكرة أجمل م النهارده




شُفت مرة مهرة سمرا
نونو ماسكة ف ديل مامتها
قُلت بكرة حتبقى حرة
تجري وحديها براحتها

عدى شهر و شهر تاني
شُفتها فرسة جميلة
تنطلق تجري ف ثواني
تقطع الرحلة الطويلة

قمت قلت لها قولي لي
ليه بتجري يا مهرة شاردة
قالت الريح بتنادي لي
بكرة أجمل م النهارده
من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني
العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده




الجمعة، 9 مايو، 2008

حريه ............. خوف

انا حر
اقدر اعمل اى حاجه واحقق اى حاجه واحاسس انى كل حاجه
انا خايف
مش قادر اعمل اى حاجه ولا احقق اى حاجه وحاسس انى ولا حاجه
انا حر
هطلع اللى جوايا للعالم من غير تردد واقول رايى من غير نفاق واتكلم مع الى حواليا بكل ثقه
انا خايف
كل الى جوايا كاتمه فى قلبى مش عارف اعبر عن رايى ولازم انافق عشان اقدر اعيش
انا حر
قادر احب احب بكل كيانى ومشاعرى واقول لحبيبى انا بحبك يا اغلى حاجه عندى
انا خايف
مش قادر احب ولو حبيت مش ممكن اعبر عن احساسى ولو عبرت مشاعرى
لازم تكون ناقصه واحاسيسى عمرها ما تكون كامله
انا حر
قادر اساعد الى حواليا بكل طاقتى
انا خايف
مش قادر اساعد حتى نفسى
انا حر
اقدر اغضب واثور واغير
انا خايف
بكتم غضبى وثورتى لما بقوا سكينه بتنهش فى قلبى
انا حر
سعيد سعيد سعيد منتهى السعاده
انا خايف
تعيس تعيس تعيس منتهى التعاسه
انا حر
والحريه جناحات اقدر ارفرف بيها واطير لاعلى حته فى السما
انا خايف
والخوف قيد من حديد مكلبشنى وموقفنى فى مكانى فى الارض
انا حر
مستحيل انى اكون خايف
انا خايف
مستحيل انى اكون حر



far far away !


كان نفسى اكون شخصيه كارتونيه فى علم بعيد بعيد عالم فيه الخير خير والشر شر الابيض ابيض والاسود اسود تقدر تعرف الشرير لما تشوفه تلاقيه مكشر وانيابه طويله وتلاقى على راسه قرون شيطان تقدر تعرف الطيب لما تشوفه تلاقيه مبتسم ابتسامه بيضه وتلاقى على راسه هاله الملاك



مش لازم اكون اميره من دول















كان ممكن اكون عصفوره ولا سمكه ولا حتى فيل


بس المهم انى اعيش بحريه
ومع الحريه هتتولد كل المشاعر صافيه زى نقيه زى ما هى وزى ما ربنا خلقها
لان اى شعور من غير حريه ملوش لا لون ولا طعم ولا ريحه



احب اعيش ولو اعيش فى الغابات
اصحى كما ولدتنى امى وابات
طائر حوان حشره بشر بس اعيش
محلا الحياه حتى لو فى هيئة نبات

الثلاثاء، 6 مايو، 2008

قلبى خلاص لا هفرحه ولا ازعله

فعلا وصلت لمرحلة التعادل دى
لا بقيت بفرح
ولا بزعل
خاله كده زى الميه لا ليها لون ول اطعم ولا ريحه
وصلت لدرجه ان لما بتحصلى حاجه جميله بكون عادى
ولما بتحصلى حاجه وحشه برده بكون عادى
حاله كده ملهاش وصف
حاله بايخه ممله بارده
بس افضل من انى افرح قوى ع الفاضى
واحزن برده ع الفاضى
وفى الاخر يكون مصيرى الاكتئاب
الحاله دى بايخه ب سانا راضيه بيها لانها ارحم من الاكتئاب

الأحد، 4 مايو، 2008

من باب التجربه

مش عارفه عملت المدونه دى ازاى ؟انا عمرى ما جه فى دماغى انى اعملها
ولغاية دلوقتى مستغربه الحقيقه
كنت داخله على مدونة واحده صاحبتى وعملت اشتراك عشان بس افتح مواضيعها
لقيته بيقولى هل ترغب فى انشاء مدونه قلت وماله يعنى انا يعنى هعرف اعمل حاجه فى اى حاجه
اكيد هقف فى النص
بس اهو عملتها
ممكن انساها
ممكن متدخلش عليها تانى
بس اهو جربت والحمد لله

الرضا بالمقسوم

فعلا الرضا بالمقسوم عباده وسعاده ما بعدها سعاده
دورت بنفسى على كل اسباب السعاده
ناس قال فى الحب
وناس قالت فى المال
وناس قالت فى الصحه

لكن الاكيد والمؤكد ان السعاده ليها معنى واحد بس هو الـــــــرضـــــــــــــــا