الأحد، 26 يوليو، 2009

الجمعة، 24 يوليو، 2009

عــــيــــــد مـــيــــلاد توأمتى .......cindrelaa


كان امبارح

كنت عايزه اعمل الموضوع من قبل كده بس للاسف نفسى مقفوله عن المدونه وقعدت ادور على حته تانيه احتفل فيها لفيت لفيت وبرده ملقتش غير المدونه دى

مش عارفه ليه هى بتحب تسمى نفسها سندريلا
مع ان هى احسن مليون مره من سندريلا
واقوى مليون مره منها
سندريلا كانت سلبيه وضعيف وهبله وعبيطه
كانت مستنيه امير علشان يخلصها من الغلب الى هى فيها
لكن سندريلا توأمتى مش محتاجه امير علشان يحققلها احلامها
هى تقدر تحققها بنفسها من غير اما تستنى حد
ويابخت الامير الى هتكون من نصيبه

مش عايزه اقولها غير انك اكتر واحده بتفهمنى بعد اختى
واكتر واحده برتاح معاها هى ومروه ميل وايمان سما مصر
وان انتم التلاته السبب فى انى لسه بدخل ع النت من اصله

مش عارفه ليه فى كل عالم جديد بدخله بندمج فيه شويه وبعدين احس انه غريب عنى وانا مش بنتمى للعالم ده
وان فى كل عالم فيه شلل ومجاميع انا مقدرش اكون فيها
اكيد العيب فيا انا

لكن معاكم انتم التلاته بحس ان انتم شلتى الى مش هقدر اخرج منها والى بحس انى بنتمى ليها

ربنا يكتبلك الخير يا توأمتى ويكون نصيبك احسن من سندريلا مليون مره


الأحد، 19 يوليو، 2009

Now In Theaters






الثلاثاء، 16 يونيو، 2009

Sense And Sensibility


" الموت كان هو الحاجه الوحيده الى هتصالحنا على بعض "

سييييييدىىىىىىىى سييييييييييييييييدىىىىىىىى

اهئ اهئ اهئ

ايه ده ؟ بتنهنهى ليه ؟ فيه حاجه بتوجعك ؟

بعيط على النهايه السوده دى ! صعبان عليا قوىى

هو مين ده ياختى الى صعبان عليكى ؟ المهندز ! ياختى فى ستين داهيه

حرام عليكى . انتى مبتحسيش

انا الى مبتحسيش ولا انتى الى ما بتفهميش . ده واحد كان واطى وماشى على كيفه . وغرر ببنت مسكينه ملهاش ذنب

ايوه . بس الحب غيره وخلاه انسان تانى

ماشى وحتى لو حصل يا عبيطة اخواتك هو ينفع انه يتجوز اخت الى اتسبب فى قتلها . يعنى يضيع هنادى وبعدين يتجوز امنه

اه . ليه لا ؟ الحى ابقى من الميت والحب قادر على كل شئ

والله العظيم انتى هبله ومانتش فاهمه حاجه . هى كل حاجه عندك سهله كده . طيب تعرفى ان طه حسين فى القصه الاصليه كان هيعمل زى مانتى عايزه كده بس بركات خلاه يغير النهايه

منه لله . ليه بس؟

علشان بيفهم ياختى . الحياه مش بتمشى زى مانتى عايزه افهمى بقى يعنى الحياه بينهم مستحيله

هتفضلى طول عمرك معدومة الاحساس

وانتى هتفضلى طول عمرك هبله وعبيطه



______________________________

الله . الواد احمد عز ده زى القمر . ياخرابى على عينيه

امممم اه . لطيف . تمثيله حلو

الا الواحد ممكن يلاقى فارس احلامه شبه الواد ده ؟

هتفرق فى ايه ؟ اهى الرجاله كلها شكل بعض

لا طبعا ده احمد عز. امير الرومانسيه

يا سلام ياختى . هو انتى يا بت فاكره ان الفنانين بيكونوا بنفس الشخصيات الى انتى بتشوفيها فى الافلام؟

واضح ان عندك تخلف عقلى متوسع ومنتشر . انتى فاكره يعنى انه هينزل فيكى حب وغرام لما يشوفك . مش تبطلى الاحلام الى انتى عايشه فيها دى

وبعدن مش كل واحد حلو تشوفيه تقعدى تحبيلنا فيه . كده غلط على صحتك ياماما

يعنى حتى الاحلام مستخسرينها فيا . اعمل ايه بس يا ربى فى العالم المادى الى انا عايشه فيه ده ؟

خلى احلامك على ادك . بلاش تشطحى . وبعدين بطلى تمشى تحبى على روحك . زهقتينى

امال اسمها احلام ازاى

هى الحياه كده

ييييييه . هتفضلى طول عمرك معدومة الاحساس

وانتى هتفضلى طول عمرك هبله وعبيطه



___________________________________

فين رويات عبير وزهور الى كانت فى الكرتونه تحت

روايات ايه ؟ اه . وديتها لبتاع الفول والطعميه الى جنبنا

اييييييييييييييييه ؟ مييييييييييييين؟

فيه ايه ؟

فيه ايه . توزعى كنوزى على بتوع الفول والطعميه

ايه . اهو بعمل خير . يعنى هم لازمتهم ايه؟ دى المره الوحيده الى حسيت ان لهم لازمه. الله يكون في عون الى هعرف يقرا الكلام الى فيهم . اكيد هيجيله استبحس فى مخه

ازاى تعملى كده فى حاجتى . يعنى انا لو اخدت كتبك الى انتى مصدعه دماغنا بيها واديتها لبتوع اللب هتفرحى؟

ايه جاب الى انا بقراه للسخافه الى انتى بتقريها . يا بنتى افهمى . الحاجات دى زمانها راح وانتهى . انا كده قلبى عليكى . عايزه اعالجك من الوهم الى انتى عايشه فيه . ده انتى لو قلتى للواد حماده ابن اخوكى الى عنده 3 سنين انك لسه بتقرى الحاجات دى هيزفك تريقه وانتى رايحه وانتى جايه

مش احسن من الكتب الكئيبه الى انتى بتقريها اوفات عصيبه والجريمه والعقاب . حسبنا الله وانعم الوكيل

بس هقول ايه؟ مانتى متفهميش فى المشاعر والاحاسيس زى باقى البشر

هتفضلى طول عمرك معدومة الاحساس

وانتى هتفضلى طول عمرك هبله وعبيطه



_________________________________


لما النسيم بيعدى بين شعرك حبيبتى بسمعه بيقول اهات

بعد ما ادى وبعد ماخد بعد ماهد وبنى واحتد شد لحاف الشتا من البرد

عارفه مش عارف ليه متونس بيكى وكانك من دمى على راحتى معاكى وكانك امى مش عارف ليه

عم بطاطا لذيذ ومعسل عمره ما طاطا لغير الله لما الدنيا بتقسى يمثل انه خلاص سلم لقضاه

يانسمه هلى شدى الستاير الشوق غالبنى والقلب حاير

امايا ياما شدى الضفايير شدى رباطها عصبينى

اه من عيناه دنا والله ما حب القلب سواه

والى بينا نص فرحه نص حاله نص راحه

هتفضلى طول عمرك معدومة الاحساس

وانتى هتفضلى طول عمرك هبله وعبيطه



________________________________




هيييه . ايه رايك فى العريس؟

كويس . زى ما بيقولوا كده مفيهوش عيب

طيب ما خلاص خلصينا واخلصى

ياسلام . هقولك زى غاده عادل فى شقة مصر الجديده اتجوز واحد علشان بس مفيهوش عيب

يادى الافلام الى انتى عايشلنا فيها . بطلى تحشريها فى كلامنا . مادام كويس جربى

اجرب ايه ؟ هى جيبه هجربها . انا محستش ناحيته باى احاسيس خالص

يادى الخيبه . انتى لحقتى . انتى لسه شاييفاه النهارده . بكره تحبيه وتموتى فيه

لا يا ماما لا مش انا . انا معرفش اعود نفسى على حاجه . انا مادام محستش من الاول انسى

يا بنتى فوقى بقى وانزلى للواقع شويه . هى الحياه كده . مش معقول هتفضلى مستنيه الحب علطول كده

واكيد هييجى

وافرضى مجاش . هتفضلى طول عمرك راهنه نفسك عليه

وهفضل مستنياه

طيب ياختى خليكى . لغاية ما يعدى عليكى الزمن وتلاقى نفسك بح ساعتها الحب هيبقى ينفعك قوىى؟

ماهو انتى عمرك ما هتفهمينى . لانك هتفضلى طول عمرك معدومة المشاعر

وانتى هتفضلى طول عمرك هبله وعبيطه



_____________________________

تفتكرى مين فينا الصح

اكيد انا

وليه ميكونش انا

القلب بيحقق السعاده

والعقل بيحقق الاستقرار

طيب هو ينفع استقرار من غير سعاده

يعنى السعاده الى تنفع من غير استقرار

القلب هو الى بيغذى الجسم

العقل هو الى بيتحكم فيه

مش عارفه مع انى ماشيه مع قلبى بس لسه ملقتش الى انا عايزاه

وانا شرحه . واضح ان احنا الاتنين غلط

تفتكرى هفضل طول عمرى هبله وعبيطه

تفتكرى هفضل انا طول عمرى معدومة المشاعر

الاثنين، 15 يونيو، 2009

من اعماق خنقتى


هى بس النيه

قبل زيارة الرئيس الامريكى باراك اوباما الناس صحيت لقت الشارع الى هى عايشه فيه اتسفلت

لالا

مش جن طالع من مصباح علاء الدين

ولا ساحر من الى كانوا بيدربوا هارى بوتر

ولا alien طالع من افلام سبيلبيرج

دول بشر والله زيى وزى باقى الناس

اه والله شفتم لما بننوى على حاجه بنعمل ايه ؟

بنصنع المعجزات

ده لما بننوى

ماهى مشكلتنا فى النيه

ومش النيه الى بالى بالك بتااعت مصر الى بتضمنااااا نبض الحياه فى قلبنااااااااااااا نوهب عشانها حياتنا لو كنا بنحبها

لا النيه الى من جوا القلب

النيه الى بيصدقها العمل

واهم من ده كله النيه الى يبقى وراها قوه واهتمام

وتقريبا النيه دى مش هتطلع الا مع كل زياره للرئيس الامريكى


باى باى عمرو خالد . اهلا وسهلا ....

بصراحه كنت هكتب هيفا وهبى

بس اولا ااتكسفت ان احط اسمها جنب اسمه

ثانيا وده الاهم ان الموضوع اوسع من هيفا ولا غيرها

يعنى كان ممكن باى باى عمرو خالد

اهلا وسهلا بكل شئ فاسد ملوش قيمه

والفساد مش بس فى الفن علشان احط اسم هيفا

الفساد الى فى كل حاجه

وللاسف بقينا بنرحب بيه ونقوله تعالالى لااااااااااااااااا تبعد بعيد وخدنى لحنانك خدنى عن الضمير وابعدنى

عمرو خالد قالوله باى باى للمره الكام............ مش فاكره والله المره الكام

هى الكام يا جماعه؟

هقول ايه ولا ايه

من كلام وحيد حامد وصولا لتعليقات زعيم الكوميديا الفز عادل امام مرورا باراء الاعلامى الوطنى القدير مفيد فوزى

عمرو خالد بيتكلم باسم الدين ليه ؟

وبيطلع يحلل الحرام والحلال ليه ؟

هو دارس

متعلم فى الازهر

ده على اساس ان وحيد حامد واخد ماجيستير فى الشريعه والفنان القدير عادل امام واخد كورسات فى الفقه والتشريع

انا مش بزايد على تدين حد على فكره انا اكتر واحده عارفه ان الاعمال بالنيات وان العبره بالخواتيم

بس بتكلم عن الناس دى الى بتناقض نفسها

يعنى لو السؤال الى بيتوجه لعمرو خالد انت بتتكلم فى الدين بامارة ايه ؟ يبقى المفروض يتوجه سؤال زيه للى فوق انتم بتحكموا على عمرو خالد بامارة ايه؟

بتطلوا علينا تتشدقوا بالحريه واحترام الاخر وانتم ابعد ما يكون عن ذلك

مجرد شعارات تقولوها ادامنا عشلان تبانوا متحضرين بس للاسف والله مفقوسين

ده حتى ادنى نوع من انواع احترام الاخر فى الكلام عنه معملتهوش ونازلين تريقه وتقليد

طبعا ماهى البلد فاتحه دراعاتها ليكم وطارده الى زى عمرو خالد

دى لازم تكون النتيجه الحتميه

للاسف الحقيقه الواضحه الى زى الشمس والى المسئولين مش فاهمينها او بيستهبلوا عنها هى ان عمرو خالد مش محتاج مصر

مصر هى الى محتاجاه من غير تهويل ولا تحيز

انا تابعت الشخص ده من اول ما ظهر

لا عمرى حسيت ان هو بيفتى

ولا بيعاند الشيوخ الكبار

ولا بيتكلم فى كلام ملوش فيه

بيحكى قصص

طيب ما يحكى

ولا هو المفروض يطلع يترقص

والله لو كان عمل كده مكانش اتهاجم الهجوم ده

انا لمست ودخلت فى مشروع من مشاريعه والى للاسف كان مصيره برده الالغاء وعرفت اد ايه الراجل ده صاحب رساله بجد

وانا بقوله خليك بعيد ياعم

انا لو منك معبرش الى هنا تانى

انت مش بتخبط دماغك فى حيطه

انت بتخبطها فى الجبل الى غرق تيتانيك

انسى ياعمرو

ولو انى عارفه ان انت مش هتعملها .



عيد ميلاد النكسه

فيه حد يحتفل بالنكسه

اه

انا

فيه حاجه

لا لا مش قصدى

النكسه كانت فى الشهر ده من كام يوم

النكسه الى الحمد لله فوقنا بعدها وقدرنا نجيب حقنا

دلوقتى بقى لو نبص هنلاقى نفسنا عايشين كل يوم فى نكسه

اه ماهى النكسه مش معناها ان احنا نحارب وننهزم بس

لا

دى نكسات الحرب ممكن تكون اتفه بكتير من نكسات العقل الى احنا بقينا عايشين فيها

ع الاقل نكسات الحرب بنفوق منها

لكن نكسات العقل بقت عامله زى الادمان على المخدرات

عاملين دماغ يعنى

احلى دماغ والله

ومش عارفين نفوق

عباره يغرق فيها الف

قطر يتحرق فبه الف

قمح فاسد ...... قلوب فاسده ..........عقول فاسده ..........والاخطر ضمائر فاسده

وكل يوم نقول

احنا بس محتاجين نكسه علشان نفوق

ياربى

هو فيه نكسات اكتر م الى بنشوفه ولا لازم يكون فيه دبابات ورشاشات ومدافع علشان نحس بيها




اوباما ... يصنع المعجزات

بستعجب قوىى من الناس الى اتصدمت من خطاب اوباما

وبستعجب برده من الناس الى فرحت بيه

طيب احنا ايه علاقتنا ؟

مستنيين منه ايه؟

اذا كان احنا مش بنعمل لنفسنا حاجه ؟

هو هيعملنا

اذا كان حكامنا مش طايقين بعض وكل يوم بالبلدى كده فارشين الملايه لبعض

وقاعدين نزايد على وطنية بعض

يبقى مستنيين ايه من واحد اكيد مصلحته ومصلحة بلاده اهم من كل شئ

متهيألى لما نعمل لنفسنا قيمه وكيان ووجود الاول

نبقى نستنى غيرنا يعملنا حساب




الحجاب وسنينه

مش عارفه صناع الدراما من كتاب ومؤلفين وممثلين مالهم ومال الحجاب

ليه كل تصويرهم للبنات المحجبات ينحصر فى واحده من دول

واحده معقده نفسيا عايزه تتجوز وخلاص

واحده جوزها مزواج وبيتكلم باسم الدين وفارض عليها الحجاب

واحده ملهاش رابط وماشيه على كيفها وواخده الحجاب ساتر لاعمالها

واحده متخلفه متعرفش حرف ال ب من طبق الفول

طيب والله انا محجبه ومش واحده من دول خالص

انا عاديه عايشه حياتى عادى زى باقى مخاليق ربنا

مش حاسه ان طالعلى قرن ولا ناب ولا حاجه

لا فيه راحل قاهرنى

ولا عندى مشكله نفسيه

ولا ماشيه على طول شعرى

ده انا حتى الى صحيت ولبسته من نفسى

يعنى محدش مسكلى الفرفر علشان البسه

لا وكل واحد من دول يطلع ماسك فى قافية الفنانه المحجبه و يقولك هى ينفع الواحده تطلع محجبه وهى قاعده مع جوزها فى الشقه ؟ احنا لازم نصور الواقع

طيب هو الواقع ان كل بنات مصر غير محجبات حضرتك؟

ياسيدى طلعها محجبه زى الواقع وابقى قلعها الحجاب فى البيت وانت بتصور

احنا مش هنعترض

الموضوع مش عن الدراما والممثلات المحجبات

انا نفسى بس برده ان الناس الى بتتكلم بالحريه والتحضر تراعى ادنى قدر من الحريه

ومن الاخر تخليها فى حالها

وملهاش دعوه بالحجاب والى اتحجبوا

عايزين يطلعوا البنات لابسين بكينى ولا من غير خالص

يعملوا الى هم عايزينه

بس يخلوهم فى حالهم وبلاش يحشروا نفسهم فى كل حاجه بمناسبه وبدون مناسبه

نحن حقا نعيش فى مجتمع منافق



المهندس شريف

كل اما اتابع حكاية الراجل ده واد ايه انه كان محترم ومتدين وابن ناس على حد قول زملائه وجيرانه

بيركبنى الفزع والخوف وساعات الشفقه عليه
وبسأل نفسى هى احوال الناس مكن تتبدل 180 درجه كده من اتجاه لاتجاه تانى خالص
من اسره ناجحه وغنيه ومرتاحه ل 4 جثث
والادهى والامر
هو ممكن اليأس يوصل بالانسان انه يفقد ايمانه بكل الى عاشه لا ويفقد ايمانه بربنا نفسه
استغفر الله
ربنا ما يكتب علينا كده
ويحسن خواتمنا جميعا
بس لازم نعرف
ان الايمان الحقيقى بيبان وقت الشده

الأربعاء، 3 يونيو، 2009

يارب


" اللهم انى اشكو اليك ضعف قوتى و قلة حيلتى و هوانى على الناس انت رب المستضعفين و انت ربى الى من تكلنى؟ الى بعيد يتجهمنى ؟ ام الى عدو ملكته امرى؟! ان لم يكن بك على غضب فلا ابالى اعوذ بنور وجهك الذى اضاءت له الظلمات و صلح عليه امر الدنيا و الاخرة من ان تنزل بى غضبك او يحل على سخطك لك العتبى حتى ترضى و لا حول ولا قوة الا بك

السبت، 30 مايو، 2009

ايها المجتمع ...... shame on you


.......: معرفتيش . قريبتى جوزها قرر انه يرجعلها . طبعا بعد ما بهدلته فى المحاكم ورفعت عليه قضيه رجع وبيقول حقى برقبتى
.......: طيب كويس الحمد لله . انا كان نفسى يحصل كدا من زمان . كانت هتروح فين ب 3 عيال وبعدين فرصتها فى الجواز كده معدومه
........: بصراحه هو بهدلها وضيع كرامتها عالاخر . بس انا قلتلها لما سالتنى لازم تفكرى كويس . اهللك مش راضيين انك ترجعى بس اهلك دول مش هينفعوكى
........: انا شخصيا لو بنتى قررجوزها انه يرجعلها دلوقتى لو فات التانيه الى ساب بنتى علشانها مش هقولها لا .؟!


ده باختصار حوار دار ادامى النهارده
هو اكيد مدارش ادمى انا بس
دى حاجه بتحصل كل يوم وكلام بيتكرر كل ساعه
دى مطلقه
يعنى سكاند هاند
لا
تينس هاند او اقل
ونظام لوى دراع على اتنهاز فرص
انتى مطلقه
يبقى خلاص حياتك انتهت
لا
لا
حياتك مرهونه بالافندى الى طلقك
لو جابه كيفه انه يرجعك ويسترعليكى يبقى كويس قوىى
لو مجابوش بقى يبقى تروحى تحفرى ليكى قبر فى اى حته وتدفنى نفسك وعيالك فيه

ايه يعنى مطلقه
انا مش قادره استوعب وافهم
ايه المجتمع الى احنا عايشين فيه ده
ايه سياسة الكيل بمكيالين دى
وقال زعلانين علشان العالم بيتعامل معانا بنفس الطريق
طيب اذا كان رب البيت بالدف ضارب
ايه الفرق بين راجل مطلق وست مطلقه
حد يقولى يا ناس

الحقيقه بقى الى انا وصلتلها ان احنا بنعيش فى مجتمع تحت درجات التخلف
لا
تحت
تحت
تحت
درجات التخلف

بنحكم على ناس بعقوبات فى حاجات هم ملهمش ذنب فيها
واحده تتطلق
تبقى سلعه رخيصه لازم تستنى الى يحن عليها ده اذا جه
واحده جوازها يتاخر
تبقى عانس متساويش فى سوق البنات 3 مليم
واحد فقير
يبقى ابن ستين ......
ونتعامل معاه بتعال وقرف وخصوصا لو بيشتغل شغلانه احنا كعقول مسطحه بنقول عليها مش اد كده
واحد مجهول الاب
نتعامل معاه كان هو الى غلط
هو الى ارتكب الفاحشه ولازم نبص باعلى درجات الازدراء
واحده اغتصبت
تبقى هى الى ماشيه على حل شعرها وبتغمز للرجاله وتقولهم تعالو اغتصبونى الله يخليكم
ونسيب الجناه ونمسك فيها هى

مجتمع عايش بازدواجيه منقطعة النظير
مجتمع عايش علشان كل فرد فيه يدور على نقظة ضعف فى التانى ويذله ويستغله
نصلى كويس قوىى
نصوم ميه ميه
نحج ونزكى
لكن جوهر الدين
روح الاسلام الى بتقول ولا تزروا وازرة مثل اخرى والانسان هيتحاسب بعمله
دى منعرفهاش

ليه احنا بنعمل فى بعض كده
ليه الكبت الى جوانا نطلعه على بعض
ونرجع نسال نفسنا
ليه فيه حكام ظلمين
ليه فيه عبارات بتغرق
ليه فيه قطورات بتتحرق
ليه فيه قمح فاسد وانفلونزا طيور وخنازير
ليه والف ليه
والاجابه عليها واحده
لو كان الخير فعلا جوانا
لو كان عندنا استعداد ان احنا نساعد بعضينا بدل ما نذل بعضينا

اكيد اكيد كان الامر اختلف

الثلاثاء، 26 مايو، 2009

نجوم .............و نجووووووووووووووم

حلقه واحده
حلقه واحده من برنامج الطبعه الاولى للاستاذ احمد المسليمانى خلتنى احس بجبال التفاهه الى احنا بقينا عايشين وسطيها وببحور الهيافه الى احنا قايمين نايمين نشرب منها
البرنامج قبل كده تكلم عن العالمه العظيمه سميره موسى
لكن بما ان انا اعرف عن الشخصيه العظيمه دى كتير فمهتمش قوىى
من اسبوع كده اتذاعت خلقه من البرنامج اتكلم فيها عن الدكتور يحيى المشد
طبعا انا فى دماغى ان يحيى المشد ده عالم وخلاص
جهل بقى بعيد عنكم
لما الاستاذ احمد ابتدى يروى قصة حياته الى انتهت بااغتياله
انتبهت قوىى
حسيت بهزه جوايا
وقف كده لو سمحت
لحظه
احنا عندنا شخصيات عظيمه كده
او كان عندنا
هل يا ترى حد تانى من جيلى او الجيل الى بعد جيلى يعرف الراجل ده
يعنى لو جيبت ابن عمى الى فى تالته اعداى وقولتله تعرفى مين هو يحيى المشد هيعرفه زى ما بيعرف تامر حسنى ولا عادل امام
وسؤال بقى اهم نط فى دماغى
ايه هو بقى مفهوم النجوميه من وجهة نظر المجتمع الى احنا عايشين فيه
متهيالى عندنا
لازم علشان تكون نجم يبقى تبقى حاجه من التلاته
يا مغنى
يا مثل
يا لعيب كوره
هم دول النجوم بس من وجهة نظرنا
وللاسف مش ده احنا السبب فيه
السبب فى الاعلام الى مورهوش غير الفن والفنانين
انا والله مش بتفه من دور حد
ولا بتريق على حد
لكن لما اسمع عن حرب بين منتج واسرة ليلى مراد علشان مسلسل بيتعمل عنها
وانا من عشاق فن ليلى مراد على فكره
ولما يتعمل مسلسل عن سعاد حسنى ولا عبد الحليم حافظ ولا غيره وغيره

ليه عندنا محدش بيهتم انه يعمل سيرة حياة عالم من العلماء الى قضوا حياتهم فى خدمة مصر وماتوا برضه بسبب حبهم لمصر
بلاش كده
ليه لما تيجى ذكرى فنان مطرب ولا ممثل يقعد التلفزيون يعيد ويزيد فى اعماله ويجيب تاريخ حياته ويمجده كانه فتح عكا ولا انتصر فى عين جالوت
والناس الى عاشت وماتت فى سبيل هدف ورساله يتنسوا بالشكل المهين ده
لا ذكرى ولا احتفال ولا حتى كلمه

منتهى الظلم والافترا صراحه
مش معقول تكون هايفه اشهر من سميره موسى
فى مصلحة مين وعلشان ايه ان نجومنا الحقيقه نورها ينطفى بايدنا احنا
اكيد فى مصلحة اى حد الا احنا
احنا الى غرقنا للاسف فى مسلسل مستمر من السخافه والسطحيه مش عارفين نتخلص منه
او مش عايزين نتخلص منه

اسرائيل عمرها مافكرت تغتال مغنى ولا ممثل ولا رقاصه
وده ان كان يدل على وحشية العالم دى فهو برده يدل على بعد نظرهم واعترافهم بالقيم والنجوم الحقيقيه الى احنا مش قادرين نعترف بيهم
اسرائيل وصلت للحقيقه الى احنا مش عارفين نوصلها ولا هنوصله طول ما اهتمامنا هيفضل منصب على حد واحد واتجاه معين

ومش عارفه احنا هنفضل نايمين فى العسل كده لامتى ولا على راى يسوف شعبان فى الضوء الشارد
عايمين فى مية البطيخ






الأحد، 10 مايو، 2009

يوميات مواطنه مفروسه !!!!


هطق من الغيظ

فى الشغل الاقى بيروقراطيه ما بعدها بيروقراطيه واستهبال ما زيه استهبال واستخفاف بارواح الناس لابعد الحدود . يعنى واحده ست غلبانه من فئات الشعب الدرجه العاشره عامله عمليه ومخيطه جرح فى بطنها وعندها ولدين فى عمر الزهور الاتنين عندهم صرع . طبعا ده ابتلاء من عند ربنا وربنا هيجازيها على صبرها لان ربنا مش بينسى حد . المشكله دلوقتى فى البشر الى انعدمت من قلوبهم الرحمه وانتهت من حياتهم كلمة انسانيه اللى ماسكين اسوا قطاع فى البلد أو اسوأ السئ فى البلد وهو قطاع الصحه . الست بظروفها الى ما يعلم بيها الى ربنا دى تيجى وتروح 3 مرات علشان تاخد العلاج لاولادها علشان سوء تنظيم وتسوية حسابات وعالم لا بتحس ولا بتفهم لا وياريتها لاقيه العلاج اصلا ده العلاج غير متوفر ولسه هتلف عليه بره ده اذا لقته اصلا والست من خنقتها ياعينى اخدت جنب وقعدت تبكى من غير ما تتكلم ولا تشكى . حراااااااااام والله هم مش الى عايشين فى البد دى بنى ادمين ولا خرفان وهيدبحوها ع العيد .

يعنى العالم معدومة الضمير مش عارفه ان كل حاجه سلف ودين . وان الارض كرويه والدنيا دواره . ولا هم فاهمين انهم ضد الميه ضد النار ضد الحشره ضد الفار لا عمرهم هيمرضوا ولا هيشوفوا بؤس فى حياتهم .

مش هقول غير حسبى الله ونعم الوكيل . مش عارفه الواحد المفروض يتحمل الى بيشوفه ده ازاى . وجع فى القلب وارتافع فى الضغط وغيره وغيره

ولا تعامل افراد الحكومه مع الموظفين الى فيها . على طريقة لو معملتش الى هنقولها عليه هنحط السيخ المحمى فى صرصور ودنك . يعنى نظام اوعى اوعى ترضى ضميرك على حساب البيروقراطيه والكلام اللى على الورق . ضميرك ايه وبتاع ايه ؟ ده انت لو مشيت وراه هنعمل ونسوى فيك . انت وظيفتك هنا انك تقرف المريض . لازم تكرهه فى حياته وفى اليوم الى اتولد فيه والمفروض كمان انك تدفعه لللانتحار علشان نخلص منه ومن قرفه وعلشان كمان نقل عدد الشعب شويه ماهو انفلونزا الخنازير لوحدها مش كفايه برده وبعدين احنا ايه عرفنا انها هتوصل مصر . مش لازم نعمل حسابنا ولا ايه ؟ . ونظام بقى مادام الناس مش لاقيه شغل يبقى لازم نذلك ونذل الى جابوك يعنى انت لو سبت الحا كومه هتلاقى شغل تانى فين

كل ده وتحس انك متكتف نفسك تعمل حاجه ومش عارف تعمل ايه ؟ تحس انك عايش بنظام جعلوه فانجعل هتعمل يعنى هتعمل وابقى ورينى شطارتك . يجيلك السكر ولا الضغط ولا حتى يطق لك عرق فى ستين سلامه.وللاسف كل ده تاثيره غلط على اى انسان نفسه يكون ايجابى بس مش عارف .




نيجى بقى للبيت ولقعدة البيت . يعنى حتى التلفزيون الى هو وسيله للترفيه بقى وسيله لحرق الدم متمثله فى الفنان العظيم الى انا بعزه جدا ومش عارفه طلع لنا منين الاستاذ تامر حسنى . تقلب على اى قناه تلاقيه فى خلقتك ؟يعنى ممكن لو دخلت المطبخ فتحت الحنفيه تلاقيه نازل منها

يا اغنيه يا اعلان تحفته الفنيه الجديده عمر وسلمى تو مش عمر وسلمى اتنين . لا تو . على وزن نورماندى تو

لا والادهى انه طلع مع المفتش كرونبو . يعنى تخيلوا معايا كرنبوا وتامر ومى عز الدين والسبكى فى اعلان واحد وفزوره اسخف من السخافه الى المفروض انها بتختبر غباء الشعب المصرى وفى الحقيقه هى بتختبر قدرة الشعب المصرى على التحمل والصبر . ازاى هتتحمل سخافة التلاته دول مع سخافة كرونبو منقطعة النظير

نيجى بقى لاعلان الفيلم منتهى السخافه والهيافه والاستفزاز . حاجه تعل بصراحه . استخفاف واستظراف قال يعنى المفروض ان احنا نضحك ونقول يا خفة دمك يا تيمو يا ملك الجيل . والمشكله برده انه مصمم على موضوع قلع القميص .واستعراض العضلات . ارحمنى يارب. تكونش فاكر روحك رشدى اباظه

ولا الاغانى . ياربى . مش عارفه اتكلم اقول ايه بس ! الله يرحمك يا فن بجد

كله كوم ومحبين تامر والمدافعين عنه دول كوم تانى . انا بحترم جدا اراء الاخرين ولولا اختلاف الاذواق لبارت السلع . بس مش توصل لدرجة ان اى حد يجيب سيرته ولا يعلق عليه يبقى حقودى غلاوى معقد مش فاهم فى الفن . ولا الجمله الى دايما بيكتبوها قبل ما تنزله حاجه جديده ( الصفعه التيموريه على الساحه الفنيه )

صفعة ايه مش فاهمه بصراحه . كأن تامر هيقدم تحفته الفنيه الاطلال ولا قارئة الفنجان . ولا هيعمل الجزء التانى من فيلم الارض ولا شئ من الخوف . ده اذا كان الجزء الاول من الفيلم قال حاجه يبقى عمر وسلمى تو يمكن يقول حاجه

وبعدين صفعة على الساحه الفنيه من اى ناحيه . الساحه الفنيه الى فيها الموهوبين الى زى احمد السقا واحمد حلمى وكريم عبد العزيز و احمد عز . تامر هيعمل صفعه ودول كلهم موجودين.

بس بصراحه فعلا عندهم حق . هى فعلا صفعه . بس صفعه على وش الفن

الجرايد بقى . اهم خبر يتصدر الصحف بعد موضوع انلفونزا الخنازير . فرح هايفه .هتتجوز مين . هتعمل الفرح فين . هتلبس ايه . فستانها بكذا الف ولا مليون جنيه . فرحها هيتكلف ترليون جنيه

احنا مالنا يا بشر

ماتتجوز ولا تعمل الى هى عايزاه

هيفيد الشعب فى ايه انه يعرف تفاصيل جوازها

خلاص بقت هايفه دلوقتى الى بتتصدر الصحف . هى المثل والقدوه والاهتمام

ده على اساس ايه

انها مطربه

ولا حتى فنانه

انا شخصيا لا اعترف بيها كفنانه

ومش انا لوحدى طبعا لانها حقيقه واضحه وضوح الشمس

لانها معندهاش اى موهبه غير الدعايه الغير عاديه لنفسها ودى بصراحه الحاجه الوحيده الى هى فالحه فيها .

محدش بقى يقلى اصلها زى القمر وحلوه وسنيوره

مع انى مش بشوفها كده بس هعديها واقول لولا اختلاف الاذواق لبارت السلع

هو المفروض ان احنا نهتم بواحده لمجرد انها حلوه وزى القمر . على كده المفروض ان احنا نروح نحدف مواهب زى شيرين عبد الوهاب وامال ماهر بالطوب ماهم على الرغم من موهبتهم الرائعه مش حلوين ولا زى القمرات

ونروح نشيل امثال هايفه وماريا فوق الاعناق . ماهى بالحلاوه والجمال والدلع بقى

للاسف لما ييجى الفن الهابط يطغى على الفن الراقى ويمسحه ويكون الى بيقدموه ملء السمع والبصر يبقى اكيد فيه حاجه غلط

اكيد فيه حاجه غلط

وعلشان كده وعلشان كمان مضلمهاش على محبى الفن الراقى . اقولهم اسمعوا جنات الى البومها مكسر الدنيا والى اثبتت ان الفن الراقى اقصر طريق لقلوب الناس

تحيه لجنات ولاحترمها لجمهورها قبل احترامها لنفسها

الأربعاء، 22 أبريل، 2009

من غير ليه ؟


ليه 11 فى الميه بس مش راضيين عن اداء الحكومه عام 2008 . امال الاضرابات دى مين الى بيعملها؟

والاعتصامات دى مين الى بينفذها ؟

يكونش الشعب المصرى بيمشى وهو نايم !!!

ليه الناس بتمسى بناتها هنادى ومش بتسمى امنه ؟.مع ان امنه هى بطلة الفيلم وهى الشخصيه العاقله القويه وهنادى هى الضحيه الهبله الى دفعت تمن سذاجتها

يمكن علشان امنه هى الى عرفت تاخد حقها؟

فتش عن القهر

ليه الناس بتتعامل مع البنت على انها ازازة دوا لها تاريخ صلاحيه وانتهاء؟ . تخيلوا اول ما البنت تتولد المفروض الاب والام يكتبوا فى شهادة الميلاد انتاج 1980 صالح لمدة 25 سنه من تاريخ الانتاج ويمكن كمان ترج جيدا قبل الاستعمال

ليه كل الناس الى انا بشوفهم بيقعدوا يشتموا فى هايفه وهبى ؟ مع ان بيقعدوا ادامها ناس كتير وهى بتغ..... قصدى بتعمل اى حاجه تانيه غير انها بتغنى

تفتكروا دى ازدواجيه ولا مهلبيه ولا ملوخيه

ليه مع ان تامرحسنى غنى اعتذرى للى هييجى بعدى . ولو وقفتى تتنططى ودماغك خليها تاكلك . البنات بتحبه وبتموت فيه ؟

واضح ان القط ميجبش الا خناقه فعلا

ليه عندنا فى مسلسلاتنا وافلامنا العربيه دايما الخادمه بتقول يا ستى ويا سيدى ؟. هو مش المفروض انهم محتاجينها زى ما هى محتجالهم ولا هم بيدفعولها فلوس لله

قنعره فارغه

ليه نشوف واحد طيب وذوق فى الزمن ده بنتنح ونفتح بقنا ونحس كاننا شايفين كائن خرافى من فيلم سيد الخواتم او كان الاستاذ اى تى نزل بنفسه وشرفنا على كوكب الارض؟

حاجه غريييييييييييييييييييييبه

ليه الاكتئاب بقى عندنا سياسه وفلسفه والحزن بقى روتين يومى مش قادرين نسيبه؟ . هو فيه حقيقه طبيه تثبت انا الاكتئاب بيفتح ماسم الوش وينوره وان الحزن بيدى هيبه ووقار ؟. على كده انصحكم انكم تكتئبوا 3 مرات قبل الاكل وانكم تعيطوا وتتشحتفوا ساعتين قبل النوم وانتم هترجعوا 30 سنه لورا

ليه محدش عارف ياخد حقه فى البلد الا لما يعمل اضراب او اعتصام ؟ مصطفى كامل قال لو لم اكن مصريا لوددت ان اكون مصريا واحنا المفروض لو لم اكن مضربا لوددت ان اكون معتصما

وعجبى

ليه كل قصة حب انا عرفت اطرافها فشلت او فى طريقها للفشل . واضح ان انا الى فقر ونحس

الخميس، 19 مارس، 2009

حكاية ولد



صندوق ذكرياتى مليان حاجات كتيير كتيير

من كل صنف ولون

وكل حاجه فيهم كنت بهد بيها الدنيا

انا الشجاع الشجيع

انا الفارس المغوار

انا البطل الرهيب

*******************

كوره

بجرى

بجرى

بجرى

جوووووووووووووووووووووووووون

الله عليك يا معلم

والله معلم

انت راجع معفر كده ليه ؟ مش قلتلك ارحم نفسك م الكوره شويه

ارحم نفسى ! ازاى ده انا الحريف انا كابتن الفريق

انا الاول وبس

********************

مسدس

بوم

بوم

بوم

انا مكنتش عايز مسدس

انا كنت عايز سيف

سيف بتار زى صلاح الدين

اركب الحصان زى الفارس واموت اعدائى يمين وشمال

ماهو انا فارس

بس من غير حصان

ياترى مين يجيب لى حصان

******************

جوابات

لسه ريحتها فيها

هجيبلك حته من السما

هلف الدنيا طولها وعرضها وهجيبلك خاتم سليمان

افركيه اتمنى

بس اوعى تتمنى حد غيرى

انا فارس احلامك الى جاى من بعيد

كل حياتى تحت امرك يا اميرتى

ماهو انا اميرك وانتى اميرتى

********************

صور

ضحكه من القلب

عيون فيها امل

لمه فيها دفا

ايدينا فى ايد بعض بس يترى كنا بنبص على ايه؟

*********************

دموعى

لما سيبتينى

لما عرفت انك هتكونى لحد غيرى

لما خلاص سلمت ان انا مش اميرك ولا انتى اميرتى

مفيش فارس بيكون متقيد

مش قادر اروحلك واقولك ليه مصبرتيش عليا؟

مش انتى قلتى ان انتى ليا؟

انا ذنبى ايه؟

غصب عنى

والله غصب عنى

ربنا يوفقك

********************

قصاقيص جرايد

بطل قعدتك ع القهوه ودورلك على شغله تنفعك

وظايف

وظايف

وظايف

بس للاسف ملقتش وظيفة فارس

ادور عليها فين؟

***********************

حبل

متكتف

متقيد

لازم احرر نفسى

مش هفضل كده طول عمرى

حد يساعدنى

يفكنى

يارب

يارب

يارب

لازم احاول لوحدى

اهو

قربت افكه

قربت

...............



الأربعاء، 18 مارس، 2009

حكاية بنت


مبرووك مبرووك

جالك بنت زى القمر

الحمد لله يامن انت كريم يارب

كان نفسى اجيبلك ولد يشيل اسمك ويكون ضهرك وسندك فى الدنيا

استغفرى الله بنتى دى هتكون ب 100 راجل

****************************

هاهاهاها

يابت تعالى هنا مش عارفه امسكك

شكلك هتطلعى بت مش على بعضك . ياترى الزمن مخبيلك ايه؟ . قال يا مخلفه البنات يا شايله الهم للممات

************************************

(يا ملاك يا جنيه ياست الحسن يعجبنى توهانك فى احلامك يعجبنى شد الخصر بحزامك يعجبنى اخدك للكتب بالحضن)

جوايا حنين لشئ غريب

جميل

بعيد

جوايا فرحه مش عارفه ليه

الله الدنيا حلوه قوىى زى ماقال فريد الاطرش

************************************

(راسمه ايه حبيبتى فى صفحة الكراس راسمه بنت حلوه بتجرى م الحراس راسمه ايه حبيبتى فى دفتر الاحلام راسمه قلب نونو بيعشق الايام .... ليه الصبايا ليه اجل حكايه ليه)

عايزه اغنى

عايزه اطير

قلبى بيرفرف

بيحن لانسان مجهول

لسه مقابلتوش بس عارفاه وعارفه انه جاى اكيد

اكيد هقابله

ان شاء الله هقابله

*********************************

الف مبروووك

ياااااااااااااه بنتى خلاص كبرت وهتدخل الجامعه دى طلعت اشطر من اخواتها الصبيان

يارب اعيش لغاية اما اشوفك استاذه فى الجامعه

لازم احقق لوالدى كل الى هو عايزه

انا بنت ب 100 راجل واكتر

*******************************************

( فى بلد البنات كل البنات ماشيه وظابطه فى ايدها الساعات وقبل تقفل بيبان البيوت وقبل ما ينزل ظلام الحارات فى بلد البنات بتجرى تروح)

كنتى فين لغاية دلوقتى يا هانم

الساعه لسه مجاتش 9 وانتى عارفه ان المحاضرات بتخلص متاخر

انتى مش واثقه فيا وفى اخلاقى

طبعا واثقه يا بنتى بس للاسف مش واثقه فى الناس

خوف

خوف

خوف

**********************************

(مش عارف ليه بتونس بيكى وكانك من دمى على راحتى معاكى وكانك امى)

ياترى لما هييجى هيقولى كده

هيغازلنى بالشكل ده

ولا هيقول جسمك حلو وعينيك دباحه

يعنى اعمل ايه ابخر جسمى علشان الناس تبطل تبصله

مفيش حد يبص ابعد واعمق من كده

هو انا كنت بحلم احلام خرافيه ؟

********************************

(قبل ما تحلم فوق احلم وانت فايق قبل ماتطلع فوق انزل للحقايق)

كل الى فات عدى عليا كانه حلم

وفى نفس الحلم كنت بحلم ييجى مليون حلم

لازم افوق

ولا استنى شويه

**********************************

(امر الهوا قلبى ميشلش غير واحد)

النهارده عايزاكى على سنجة عشره

ليه يعنى؟

ليه يعنى؟ علشان العريس الى جاى يشوفك يا فالحه النهارده ولا انتى نسيتى ؟

بس ياماما انا قلت انى مش هتجوز بالطريقه دى ومش هقف ادام واحد علشان يعاينى ويقلب فيا

اهى دى الطريقه الى ماشيه واذا كان عاجبك . اديكى خلصتى الكليه وقعدتى فى البيت وراكى ايه تانى تعمليه

فوقى بقى من احلامك دى وبطلى اغانى وافلام اجنبى

افوق

تانى افوق

**********************************

( انا كل ما بندهلك بتزيد المسافات يغرق صوتى ويهلك فى بحور الاوقات والايام بتفوت يدبل ورق التوت وتدور الفراشات على الضى المكسور)

انت فين

اتاخرت ليه

انا بقالى كتير مستنياك

مستنيه كل حاجه انا حلمت بيها فيك

هتيجى ولا لا

ولا هفضل احلم كده ولا ايه ؟

هفضل محتاره مشدوده زى الوتر بين حاجتين

يارب

يارب

********************************

( يا موجه يا زرقا دى المركبه سارقه احلامى وياكى)

اجمل حاجه فى الدنيا انى اعيش فى عالم فاضى بعيد عن الناس

بيت صغير ع البحر

وجنينيه فيها ورد وفل وياسمين

اصحى اقطف الورد واضمه وابيعه فى المحل الى حنب البيت

ياااااااااااااه

مااحلى العيشه وسط الورود

اعيش وسط حكايات الحب الى مقدرتش اعيشه

انا مش عايزه اكتر من كده

هو فيه ابسط من كده؟

حلم بسيط لكنه صعب

ليه صعب؟

مش عارفه

********************************

-لو مش هتحلم معايا مضطر احلم بنفسى

- امتى الاقى شغل

- الى ادك اتجوزوا وخلفوا

- ياترى هتيجى امتى ولا انت مش جاى

- زمن الاحلام عدى وفات

- لو بطلنا نحلم نموت