مخنوووووووووووووووووووووق يا ولدى

الاول ادخل ع المنتدى الاقى خبر عن وفاة عضو شاب كان لسه معانا من ايام
الموت علينا حق اه طبعا
وكل نفس ذائقة الموت
بس موت الشباب بياثر فيا قوىىىى حتى لو انا معرفهمش
وقعدت افكر ها ياترى انا رديت عليه رد يزعله
او ممكن موضوع هو تعب فيه واستنى يلاقى ردود افعال من الناس وانا قريته ومهتمتش ارد
مش عارفه ليه حسيت بالذنب مع انى معرفش اذا كنت عملت كده فعلا ولا لا
ربنا يغفر له ويرحمه واهم حاجه يصبر اهله

بعد كده موضوع العباره وريحة الفساد اللى بقت تخنق
والبجاحه والصفاقه التى لا توصف
حسيت ان المواطن المصرى وقبل ده كله الانسان بقى ارخص من الفرخه
وفيه تجاره جديده ظهرت فى السوق
هى تجارة البنى ادمين
وواضح ان اى حد فيه معرض انه يبقى سلعه قريب

ده غير موقف قبل كده حصلى من حد كنت فاكراه قريب منى
واثبتلى ان كل المبادئ الى انا ماشيه بيها فى حياتى عايزه اعادة تصنيع
ده غير انى حاسه انى بقيت عدوانيه تجاه كل الناس ومش طايقه اشوف حد حواليا

مش عارفه كل ماا احاول ابتسم للحياه ارجع اكشر وابوز تانى
اهم حاجه الناس تعذرنى لو حسوا انى كئيييييييييييييييبه وعنيفه
واضح ان الاصل لازم يحن

شوية رغى فى الفن ...........!

بما انى اتكلمت قبل كده عن الفن الهابط
حبيت انى اتكلم شويه عن الفن الراقى الجميل اللى بيهذب الاحاسيس والمشاعر
وهيكون ايه غير الموسيقى
ومش اى موسيقى دى موسيقى لتلاته من عباقرة الموسيقى فى مصر الى ميقلش اى واحد فيهم عن النجوم العالميين الى انا معرفش حد فيهم لانى اساسا مش بحب الموسيقى المستورده خالص
يمكن ده جهل منى لكن مفيش موسيقى بتاثر فيا غير الموسيقى العربيه
فيه تلاته بالذات بعتبر ان موسيقاهم زى ما غيرت مسار الموسيقى فى مصر اثرت فيا انا شخصيا وكونت جزء من ذوقى الموسيقى
لما بسمع موسيقى اى حد فيهم بعرف علطول بدون اى تفكير ان هو زى العلامه المسجله
هتكلم عنهم واحد واحد حسب ترتيب تاثيرهم فيا

عـــــــمــــــــــار الـــشـــــــريعى
الراجل ده عبقرى بجد
سبحان الله فعلا
زى ما ربنا اخد منه بصره
اداله مكانها موهبه رائعه مفيش زيها عند واحد مفتح وبيشوف
الراجل ده اول ما بسمع موسيقته بحس بالقوه والشموخ
اكتر واحد يقدر يقدم موسيقى الاعمال الوطنيه والملاحم بشكل هايل لان موسيقته تحس انها بتهزك وترجرجك من جوه
تحس ان انت اول تسمعها عايز تقوم تقف وتضرب تعظيم سلام
علشان كده تحس ان اقرب اله موسيقيه الى قلبه هى العود
اعماله كتيره قوى ورائعه
البرئ
كتيبة الاعدام
عصفور النار
ابو العلا البشرى
مازال النيل يجرى
وحاجات كتييير بصراحه مفيش وقت انى اقعد اعد فيها
فعلا عبقرى


عـــــــــمــــــر خــــــيــــرت
زى اول ما تشوف الشخصيه دى وتحس برقى ملوش حل
هتحس برده فى الموسيقى بتاعته برقى ملوش حل
انا عمرى ما شفت حد بيعزف على البيانو اللى هى الته الموسيقيه المفضله زى الراجل ده
او ما تسمع موسيقته تحس ان انت اتنقلت لعالم جميل كله خضار وبحر وشمس وعصافير بتزقزق وبتغرد
تحس ان انت رحت لعالم رومانسى جميييل قوى
تحس بالحب بيغمرك من فوقك لتحتك ونفسك تروح لشخص بتحبه وترقصوا سوا على انغامه
علشان كده بحس ان موسيقته اكتر موسيقى تقدر تعبر عن اى حاله رومانسيه جميله ببساطه وبدون تعقيد
اى عمل رومانسى مفيش حد زى عمر خيرت يقدر يقدمه
زى
القاء التانى
غوايش
مافيا
تيمور وشفيقه
عارفه
واعمال اكتر من رائعه
وبرده عبقرى

يــــــاســـــر عــــــبــــــــد الـــــرحــمــــن

بصراحه موسيقى ياسر عبد الرحمن اكتر موسيقى قريبه لقلبى
بحس بحنان رهيب بيغمرنى لما بسمع موسيقته
احاسيس ومشاعر وحنين غريب لشئ انا مش عارفاه
علشان كده موسيقى ياسر عبد الرحمن اكتر موسيقى تقدر تعبر عن المشاعر الانسانيه اللى جوه البشر
تحس ان فى ايده معلقه وداخل جوه احاسيسك ومشاعرك وقاعد يقلب فيها ويطلع كل حاجه مدفونه
يمكن علشان كده زى ما بيقولوا اصدقائى على ايجى بيقولوا انهم دايما بيحطوا موسيقاه على الحالات الانسانيه والمآسى الى بتيجى على برامج التليفزيون
بصراحه عندهم حق
هيلاقوا فين موسيقى احن و اكتر شجن من موسيقى ياسر
موسيقاه اللى انا شخصيا لما بسمعها بحس انى عايزه ابكى وارتمى فى حضن امى او اختى
علشان كده تلاقى ان اقرب اله موسيقيه له هى الكمان
لان الكمان اله حزينه قوىىى

ياسر قدم اعمال كتير معظمها فى التليفزيون بس فى الفتره الاخير اتجه للسينما بشكل كبير
حسن ومرقص
ايام السادات
خيانه مشروعه
سوق العصر
كناريا
الاصدقاء
اليل واخره
مش عارفه اقول ايه ولا ايه
يستحق فعلا انه يكون تالت عباقرة الموسيقى فى مصر

شوف الشارى مين ؟............شوفى عهدى كان كام سنه؟

بيع قلبك بيع ودك شوف الشارى
شوف عهدى مين يعدى هيصونهولك مين
العهد اللى راعاك
والقلب اللى فداك
ايامه عمرها بسنين
شوفى الشارى مين



لما سمعت الاغنيه دى فى فيلم فتى احلامى امبارح (مع انى بكره الفيلم ده عمى )
نطت فى بالى الاغنيه دى

اعتذر للى هيييجى خليه يسامحني اصل انا

اخدت كل حاجة في عهدي وشوفي عهدي كان كام سنة

انا مش قلقان عليكي عارفك راجعة وبوعدك

مين غيري بيملا عنيكي مين زيي هيقدر يسعدك

لو فاكراني هضعف و ارجعلك اسمعلك و احتاجلك

تبقي يا حبيبتي غلطانة و اتجننتي في عقلك


وقلت الله
ده الاغنيتين بيتكلموا عن حاجه واحده
طبعا مفيش مجال للمقارنه بين حليم وتامر وانا مش بقارن بينهم لان ده ظلم لتامر قبل ما يكون ظلم لحليم
انا اللى خطر على بالى ان الاغنيتين دول لهم نفس المعنى ونفس الهدف
بغض النظر عن الفرق بين شخصية الاول اللى هى واثقه من نفسها لدرجه لاتصل للغرور
وشخصية التانى اللى هى مغروره وشايفه نفسها لدرجة الغتاته والغلاثه والتباته

لكن الاتينين بيحكوا تجربه واحده
الحبيب المضحى الطيب الامير الى عمل كل حاجه عشان حبيبته وفى الاخر لما اخد منها الصابونه والبمبه التقيله
راح فاقعها اغنيه بيقولها فيها ابقى قابيلينى يا حبيبتى لو لقيتى ضفرى وابقى خلى حد تانى بعدى يبقى ينفعك

بس سبحان الله شتاااااااااااااااااااااااااان بين الطريقه الاولى والطريقه التانيه
يعنى الطريقه الاولى تحس انها طريقه شيك وبنت ناس
تحس الى بيقولها واحد فاعد مع حبيبته فى كافيتيريا شيك وماسك نفسه لحسن يرمى فى وشها كباية الشاى
او ماشى معاها على كورنيش النيل ومانع نفسه انه يشيلها يرميها هيلا بيلا فى النيل
يعنى واحد كده عاقل وراسى وابن ناس

نيجى بقى للطريقه التانيه
تحس ان الحبيب فيها قاعد بيشيش ويكركر مع اصحابه على قهوة بعره ولمح البت وهى معديه قام قال اما امسح بيها الارض
او مأجر سته من اصحابه قطاع الطرق وراحوا سادين عليها الطريق والكلام فين يوجعك

باختصار شديد يعنى بعد كل اللت والعجن ده
رغم ان الحالتين فيهم عتاب وحاله من التشفى
لكن فيه فرق كبيييييييييييير قوىىىىىىىىى بين الاغنيه الاولى والتانيه
فى الاغنيه الاولى رغم الفراق والغدر من الحبيبه تلاقى برده لسه الاحترام متبادل والعتاب موجود بس بارق الطرق
فى الاغنيه التانيه تحس ان المطرب ناقص يقوم يديها المين على وشها ومفيش اى احترام خالص
هل يا ترى عبد الحليم بيغنى بلغة اهل زمان؟
يعنى دى تصرفات الناس الى قبلنا ؟
ولو كان كده
يبقى تامر بيغنى بلغة العصر الى احنا فيه؟
وهى دى تصرفاتنا وكلامنا دلوقتى؟
بصراحه لو كان ده صحيح
يبقى انا بطلق العصر ده بالتلاتين وبقوله انا مش عايزاك

فينك يا اينشتاين تبعتلى من عندك الة زمن تريحنى وتريح ودنى من الى بتسمعه وعينى من الى بتشوفه

الرجل الحقيقى ................

لما هيحبك
هيحبك بجد
هتكونى انتى كل حياته ووآماله
هيديكى عمره وايامه
هيحلم معاكى وتحلمى معاه ويصبح حلمكم انتم الاتنين حلم واحد للابد
هيعيش طول عمره يديكى من غير ما يستنى منك المقابل لانه اتعود انه يدى من غير ما ياخد
هتحسى معاه بالامان وانه هو سندك اللى ممكن تعتمدى عليه لما تغدر بيكى الايام
هيكون ليكى اخ واب وصديق قبل ما يكون زوج وحبيب
اوعى تعملى زى البنات الهايفين وتقولى لازم يقولك كلام حلو
لا
اوعى تستنى الكلام الحلو وتتغرى بيه
انصاف الرجال معندهمش الا الكلام الحلو المزوق

كل كلمه حلوه هتشوفيها فى نظرة عينيه
كل احساس حب هتحسيه فى تصرفاته وخوفه عليكى
مش هتحتاجى لاى كلام لان الرجوله افعال مش كلام
عمره ما هيبصلك على انك مجرد جسد وشكل وبس
لان حدود نظره بتجيب ابعد وابعد من كده
ولانه عارف انك كيان وشعور واحساس وعقل
قبل ما تكونى جسم وشكل

واهم من ده كله هيراعى ربنا فيكى فى كل تصرفاته
ربنا دايما هيكون ادامه فى كل تصرف بيعمله معاكى
وحتى

لو النصيب مكتبش ليكى انك تكملى معاه
هيكون ليكى الصديق الى تقدرى تلجأى ليه لما تحتاجيه
وساعتها هيكون ليكى نعم السند والملجأ


ده لو قابلتى الرجل الحقيقى
ولما هيحبك بجد

كانوا بشر زينا .......

دايما لما اى حد فينا بيحاول انه يصلح حاجه غلط بيشوفها حواليه وتطلع عينيه علشان يفهم الناس ان ده ميصحش وعيب وحرام
تلاقيه يرد عليك الرد اللى مفيش غيره
انت عايز تصلح الدنيا تكونش فاكر نفسك نبى!
الجمله دى كنت لما بسمعها مش بعلق وكنت اقول اه عندهم حق فعلا

بس مين قال بقى انا الانبياء والرسل هم بس الى وظيفتهم الاصلاح والتغيير
الجمله دى لو بصينا لكل حرف فيها هنلاقيها جمله تعجيزيه وتحس انها تحصيل حاصل
اه فعلا
احنا عمرنا ما هنكون انبيا
احنا بشر عاديين
مستحيل ان احنا نكون انبيا
لكن ممكن ببساطه نكون بشر غير عاديين

الامه الاسلاميه لو بصينا لتاريخها هنلاقى انها قامت على اكتاف بشر عاديين زينا
بشر اكيد مش ملايكه ولا انبيا ولهم عيوبها زى ما ليهم ميزاتهم
والبشر دول ربنا كرمهم احسن تكريم ومنهم اتذكروا فى القرآن الكريم
سيدنا ابو بكر
ربنا سبحانه وتعالى قال عليه ثانى اثنيين يعنى اسمه ارتبط باشرف الخلق سيدنا محمد صلى الله عليه وسلم
سيدنا عمر بن الخطاب الرسول عليه افضل الصلاة والسلام قال عنه عجزت النساء ان يلدن مثل عمر
عمر بنا عبد العزيز وده من الشخصيات الى لازم اتكلم عنها انه على الرغم انه لم يعاصر سيدنا محمد عليه افضل الصلاة والسلام الا انه اصبح شخصيه خالده ابد الدهر
وناس تانيه كتير صعب انى حصى اساميها كلها
الناس دى انتشار الاسلام تعرض فى وقتهم لحملات صعبه ولاخطار مهوله كانت ممكن تهدد امة الاسلام بالتراجع
لكن بفضل الناس دى اللى هم بشر زينا برده امة الاسلام فضلت قويه صامده راسخه لقرون
الناس دى لو كانت اتهزت او ضعف او سمعت الكلام اللى احنا بنسمعه دلوقتى تفتكروا كان مصير الاسلام بقى ايه؟

وده بيخلينى اسأل اسئله تانيه
مادام الخالدين دول كانوا بشر زينا ايه اللى خلاهم يكونوا كده ؟
ايه الفرق بينا وبينهم؟
هل ظروفهم كانت افضل من ظروفنا؟
هل حياتهم كانت اسهل من حياتنا؟

اكيد طبعا لا
الناس دول عاشوا اصعب ظروف وقاسوا اشد الاهوال ورغم كده فضلو صامدين
بس الفرق فعلا بينا وبينهم
فرق واحد
بس فرق كبير
الفرق ده يتمثل فى كلمه واحده
الايـــــــــــمــــــــــــان
كلمة الايمان عندهم مكنتش مجرد كلمه
دى معنى واحساس وشعور وطاقه ايجابيه منحتهم القدره على التغيير
والقدره على التغيير منحتهم الخلود ليوم الدين
الايمان عندهم كان قول وفعل واحساس
الناس دول آمنوا بقضيتهم وبدينهم ووطنهم وقبل ده كله بربهم
فقدروا انهم يكونوا نور ينور لكل واحد فينا طريقه وحياته
الايمان حولهم من مجرد بشر زينا الى اساطير خالده قلما انه يجود بيها الزمان والمكان

الفرق فعلا بينا وبينهم فى الكلمه دى
لو قدرنا نوصل اليها ونعيشها بكل طاقتنا زيهم
اكيد اكيد مش هنكون اقل منهم فى شئ
ده اذا قدرنا نوصل ليها

شكرا اصدقائى

زمان لو كان حد قالى ان النت هيكون بالنسبه ليا عالم ملوش طول ولاعرض وهيشغل حيز كبير فى حياتى
لو كان قالى ان اعز الناس الى ممكن تقابليهم فى عمرك هتعرفيهم عن طريق الكمبيوتر والنت كنت بصيت له من فوق لتحت وقلتله امشى العب بعيد ياض
السنه اللى فاتت من عمرى بجد بجد غير كتييييييير فى تفكيرى واسلوبى فى الحياه اد السنين الى انا عشتها قبل السنه دى
فى خلال السنه دى اتعرفت على ناس كانوا بالنسبه ليا كنز واكتر من كده كمان
ناس عرفت من خلالهم ان شباب مصر مش هم شباب ستار اكاديمى ومحبين هيفاء وهبى زى ما بيحاولوا يصورونا
الناس دى شكلت شخصيه جديده منى شخصيه انضج واجمل واعقل
الناس دى بقت حاجه مهمه فى حياتى وعمرى ما هقدر انسى حد فيهم
على رغم من ان 99 فى الميه منهم عندهم اكتئاب واحباط بس والله والله هم اللى ادونى امل فى الحياه وعرفت من خلالهم ان ورا الياس والاحباط دول طاقه كبيره وقدره على التغيير وانهم برده رغم كل شئ لسه عندهم امل وامل كبير
مش عارفه الناس دى لو مكنتش اتوجدت فى حياتى مكنتش هعرف اعمل ايه
ناس كتير بتقولى ان النت والشات والمنتديات عالم كله كذب فى كذب وتمثيل فى تمثيل وان كل واحد بيدخل عشان يشتغل التانى
بس انا الحمد لله ملقتش كده ولا عمرى حسيت بكده
انا لقيت معاهم النوايا الحسنه والطيبه والاخلاق والتفاهم والحب
لقيت معاهم اللى للاسف مقدرتش الاقيه فى الناس اللى حواليا واللى كنت فاكره ان كلهم اصحابى وفاهمنى
لقيت معاهم الملاذ والملجا لما بكون متضايقه وكئيبه وهم بمنتهى البساطه يستحملونى ويشجعونى
لقيت معاهم طعم الاسره والصداقه والشعور الواحد

لكل شاب وفتاه من اعضاء منتدى ايجى فيلم اى كلام كلكم واحد واحد بلا استثناء
اللى كلمتهم والى لسه محصليش الشرف انى اتكلم معاهم بس حبيتهم من خلال اراءهم
تحيه اعتزاز وتقدير وحب ليكم
وياريت تقبلوا منى الهديه دى
زى ماقال سيد حجاب
ليكم منى ورده وكتاب

فيه ناس هتغيب عننا الفتره الجايه
بنت مصريه
dr lecter
relove
احب اقولهم تسافرو ترجعو بالف سلامه

المرأه .........مش مجرد جسد

بتفرج الايام دى على مسلسل الفرار من الحب
بغض النظر عن المستوى الفنى الرائع للمسلسل واللى من بعده مبقيناش بنعمل مسلسلات اساسا ده اذا كان السخافه الى بتتقدم الايامى دى اسمها مسلسلات
المهم انا هتكلم هنا عن شخصية الدكتوره سهام الى فى المسلسل . من الشخصيات القليله فى تاريخ الدراما اللى قدرت تجسد المعنى الحقيقى للمرأه
ينى المراة تلاقيها اتقدمت فى الدراما فى معظم مش فى كل الاحيان بشكل من الاشكال دى
يا واحده عبيطه وهبله ومكسورة الجناح وكل الناس عايشه عشان تستغلها
يا واحده كل وظيفتها فى الحياه انها تستخدم انوثتها سلاح علشان تضحك بيه على خلق الله
ياواحده لا حول لها ولا قوه كل ما تشوفها تلاقيها بتشخط فى عيالها
يا واحده مورهاش شغله الا انها تقعد تتسبسب ادام المرايه
علشان كده لما بشوف عمل تلاقيه بيقدم المرأه ككيان وعقل قبل ما يكون جسم بفرح قوىى
وعلشان كده بحب الاعمال اللى اتقدمت فيها شخصيه المراه بالطريقه دى
زى شخصيه شاديه فى فيلم كرامة زوجتى والزوجه رقم 13
شخصية فاتن حمامه فى دعاء الكروان وافواه وارانب
شخصية سعاد حسنى فى الزوجه التانيه
وشخصية حنان ترك فى مسلسل اوبرا عايده
وشخصية منى زكى فى فيلم مافيا
وحاجت تانيه
اهم حاجه فى الشخصيات دى كلها انها مش علشان تقدم شخصية المراه كعقل وكيان اظهرتها بشكل مستفز يعنى معقده وشكلها وحش ولابسه نضاره كعب كبايه
لا
لو بصيت على كل الشخصيات دى هتلاقى ان المراه فيها زى ما هى فى منتهى العقل والكرامه والعزه فى منتهى الانوثه والجمال
وممكن انوثتها دى تساعده فى وقت من الاوقات لكن من غير عقلها مينفعش

علشان كده نفسى اقول للقطاقيط الحلوين بتوع الفيديو كليب من امثال هيفا ودانا
ارحموا بقى نفسكم شويه
رخصتم قيمة المراه
حولتوها من كيان وعقل واحساس لمجرد جسد
جسد يتلوى ويتعرى علشان تكسبوا فلوس
ارحموا نفسكم وارحموا بنات جنسكم

ساعات كتير بسال نفسى لو دار الزمن وفات ممكن انتهى وانا لوحدى فى الدنيا ممكن ملاقيش حد جنبى يطبطب عليا لما احزن ويقولى متقلقيش انا جنبك
ولما اموت ملاقيش اى حد ياخد عزايا ويفتكرنى .
يااااااااه التفكير فى الاحساس ده بشع قوىى
انك تحس ان قطر الحياه بيفوت على كل الناس واحد واحد ويوصل كل واحد فيهم وتلاقيه ناسيك ومفكرش حتى يعدى عليك يوصلك زى باقى الناس وتفضل تستنى وتسنتنى لحد ما الوقت يعدى ويفوت وفى الاخر تلاقى نفسك لوحدك .
طيب انا بسال الاسئله دى ليه ؟ اذا كان انا اساسا بحب اكون لوحدى وبببقى سعيده وانا مع نفسى .

بس شتاااااااااان بين انك تكون لوحدك باختيارك وانك تكون لوحدك غصب عنك !!!