الأربعاء، 22 أبريل 2009

من غير ليه ؟


ليه 11 فى الميه بس مش راضيين عن اداء الحكومه عام 2008 . امال الاضرابات دى مين الى بيعملها؟

والاعتصامات دى مين الى بينفذها ؟

يكونش الشعب المصرى بيمشى وهو نايم !!!

ليه الناس بتمسى بناتها هنادى ومش بتسمى امنه ؟.مع ان امنه هى بطلة الفيلم وهى الشخصيه العاقله القويه وهنادى هى الضحيه الهبله الى دفعت تمن سذاجتها

يمكن علشان امنه هى الى عرفت تاخد حقها؟

فتش عن القهر

ليه الناس بتتعامل مع البنت على انها ازازة دوا لها تاريخ صلاحيه وانتهاء؟ . تخيلوا اول ما البنت تتولد المفروض الاب والام يكتبوا فى شهادة الميلاد انتاج 1980 صالح لمدة 25 سنه من تاريخ الانتاج ويمكن كمان ترج جيدا قبل الاستعمال

ليه كل الناس الى انا بشوفهم بيقعدوا يشتموا فى هايفه وهبى ؟ مع ان بيقعدوا ادامها ناس كتير وهى بتغ..... قصدى بتعمل اى حاجه تانيه غير انها بتغنى

تفتكروا دى ازدواجيه ولا مهلبيه ولا ملوخيه

ليه مع ان تامرحسنى غنى اعتذرى للى هييجى بعدى . ولو وقفتى تتنططى ودماغك خليها تاكلك . البنات بتحبه وبتموت فيه ؟

واضح ان القط ميجبش الا خناقه فعلا

ليه عندنا فى مسلسلاتنا وافلامنا العربيه دايما الخادمه بتقول يا ستى ويا سيدى ؟. هو مش المفروض انهم محتاجينها زى ما هى محتجالهم ولا هم بيدفعولها فلوس لله

قنعره فارغه

ليه نشوف واحد طيب وذوق فى الزمن ده بنتنح ونفتح بقنا ونحس كاننا شايفين كائن خرافى من فيلم سيد الخواتم او كان الاستاذ اى تى نزل بنفسه وشرفنا على كوكب الارض؟

حاجه غريييييييييييييييييييييبه

ليه الاكتئاب بقى عندنا سياسه وفلسفه والحزن بقى روتين يومى مش قادرين نسيبه؟ . هو فيه حقيقه طبيه تثبت انا الاكتئاب بيفتح ماسم الوش وينوره وان الحزن بيدى هيبه ووقار ؟. على كده انصحكم انكم تكتئبوا 3 مرات قبل الاكل وانكم تعيطوا وتتشحتفوا ساعتين قبل النوم وانتم هترجعوا 30 سنه لورا

ليه محدش عارف ياخد حقه فى البلد الا لما يعمل اضراب او اعتصام ؟ مصطفى كامل قال لو لم اكن مصريا لوددت ان اكون مصريا واحنا المفروض لو لم اكن مضربا لوددت ان اكون معتصما

وعجبى

ليه كل قصة حب انا عرفت اطرافها فشلت او فى طريقها للفشل . واضح ان انا الى فقر ونحس

هناك 9 تعليقات:

القلب الحزين يقول...

السلام عليكم
وبتصدقي ارقام الحكومة
11 فى الميه بس مش راضيين عن اداء الحكومه عام 2008
اعتقد 99في المية مش راضين
لالا بنبصلها هنادي مودرن امنة بلدي اوي

ليه الناس بتتعامل مع البنت على انها ازازة دوا لها تاريخ صلاحيه وانتهاء؟
للاسف دة مجتماعنا وبكل صراحة
البنت ضحية ثم ضحية

يشتموا فى هايفه وهبى ؟
ممكن من طريقة لبسها
او ادءها الخليع

تامرحسنى
بجد له اغاني مستواها هابط جدا

ليه نشوف واحد طيب وذوق فى الزمن ده بنتنح
بقيت عملة نادرة جدا


ليه كل قصة حب انا عرفت اطرافها فشلت
او فى طريقها للفشل
مفيش حب صادق ومتبادل وبيفشل
اهل الشاب مش موفقين علي العروسة يبقي كداب
لو بيحبها بيتجوزها وبعد فترة قليلة كل شي بيتصلح
بس الا قصدية حضرتك مش حب بيبقي وهم او خداع

تقبلي مروري

Maga يقول...

ليه ليه ليه ليه ليه مليون ليه يا ايمان لحد ما سلمت ووصلت لحقيقة بان الانسان فى البلد دي والزمن دا لازم يتكيف باي طريقة باللى حواليه سواء برضاه او غصب عنه

The Seagull يقول...
أزال المؤلف هذا التعليق.
♥نبع الغرام♥♪≈ يقول...

السلام عليكم ورحمة الله وبركاته
دى أول زياره ليا بالمدونه
بس لافت إنتباهى لتلك الموضوع الجميل
وزى ما قلتى من غير ليه
يعنى مافيش إجابه
دايمآ حقنا ضياع فى الزمن ده
هنلاقيها منين ولا منين
لازوء نافع ولاحب نافع ولا احترام نافع
ولا ايه حاجه
أفضل أسكت وأحط بقلبى لحد ما الحق ياخد حقه
ولو حبيت أتكلم مين هيسمعنى غير ربنا
ربنا يزيل همك وهمى
تقبلى مرورى
وتحياتى
إيناس

dr.lecter يقول...

ايه ياستي فيينك طيب اسالي حتي عبرينا يعني مش تختفي كده علي طوول


مصر بلد الالغاز ميكي بنفسه ولا شرلوك هولمز مش هيعرفوا يحلوا الغازنا
فرويد لو كان اتولد في مصر كان ساب علم النفس وطلع يجري في الشارع

اما حكايه اتامر

هحكيلك موقف بنتين اعرفهم بس اصغر مني ب 5 سنين الاتنين بيموتوا في تامر

قعدت اتناقش معهم وارغي واعرف ايه السبب وزكرت لهم اكتر من اغنيه في تهزيئ للبنات عامه وقباحه

قالت اكيد البنت هي اللس استفزته علشان يقول البقين دوول

مارديتش عليهم وقلت عليه العوض دول مش بيعشقوه دول ناقص يلحسوا التراب اللي بيمشي عليه ويعملوه اله لهم

الاكتئاب والحزن اتخنقت بجد من اللي معيشين نفسهم في الموود ده

واحده اعرفها بتنكد علي نفسها 24 ساعه يوميا مع انها جميلاه جدا لكن بدات التجاعيد تطلع عليها للاسف رغم انها لسه في مقتبل العمر

الحكومه

ربنا يكون في عونها

؟
لييه؟

علشان جايه من الشعب


كل قصه حب بتفشل

مش انت السبب

ولا الاهل زي مايسرا بتقول

احنا مالناش ذنب

الذنب ذنب المجتمع والزمن اللي بيموت المشاعر

الاهل خايفين والحبايب خايفين الكل خايف وقلقان

الكل حاطط ايده علي قلبه وخايف من بكره

مافيش حاجه مضمونه للاسف

الزمن ده بيقتل الحب

عارفه انا كنت بتفرج علي حاجات زمان كانت جميله جدا ورقيقه رغم بدائيتها لكن النتس كانت عايشه مبسوطه

مش عيشه متكلفه

مش ناس عايشين علشان عملوا قرشين ودخلوا ولادهم جامعات غاليه وبياكلوا بره البيت كل يوم وهمهم علي الوديعه والمشاريع اللي حاطينها

الناس دي مش عايشه الناس دي ميته


اللي عاش فتره اوائل التسعينات والتمانينات هو اللي عاش فعلا وعرف الحب الحقيقي ايامها كان الحب بيعيش

دلوقتي الحب ياما مؤقت ياما مزيف ياما اتنين بيبضحكوا علي بعض وعارفين ان حدوتهم هتفشل

mUsLiM يقول...

قل لن يصيبنا الا ما كتب الله لنا هو مولانا وعلى الله فليتوكل المؤمنون

الحمد لله الذى هدانا لهذا وما كنا لنهتدى لولا ان هدانا الله


الذين اذا اصابتهم مصيبة قالوا انا لله وانا اليه راجعون

وحسبنا الله ونعم الوكيل

والحمد لله رب العالمين

انت تسال والكمبيوتر يجيب يقول...

دعوه
الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://stop.to/cairo

الشارده يقول...

اسعدتونى يا جماعه بردودكم لان الردود على ايجى جابتلى احباط اتحول الموضوع بقدرة قادر الى مذكرة دفاع عن اسطورة الجيل تشامر حسنى

القلب الحزين
عاشقة الاحزان
شرفتوا المدونه وياريت كون دايما

ماجا
حمد الله ع السلامه شرفتنى بزياره كنت مستنياها من زمان

د ليكتر ومصعب
اخباركم ايه
نفسى اعرفها بجد مش تسالوا عليا

انت تسال والكبيوتر يجيب
ان شاء الله هدخل اكيد وهعلق تعليق من تعليقاتى السخيفه

leeno يقول...

لييه وجع القلب

عارفة انا لقيت الحل


منفكرش لاننا حنموت من كتر التفكير و احنا بنقول ليه و يا اما مش لاقيين جواب او لاقينه بس حيموتنا من كتر غيظنا و قهرنا منه

بس قابلييني لو عرفتي