لا تحزن .......فاروق جويده

شفتك النهارده فى البرنامج
شفت جوه عينيك الحسره مع الاصرار
سمعت كلامك اللى كله الم مع امل
فهمت انك انسان قبل ما تكون مبدع وفنان
عرفت معنى الابداع الحقيقى معاك
ابداع الاضافه مش ابداع الشهره
حسيت بالدموع جوه عينيك من كتر القهر

منعوا عنك المنصب اللى تستحقه
منعوا قصايدك من انها تكون على السنة الطلبه

لكن عمرهم ابدا ما هيمنعوا ابداعك
ولا يقللوا اعداد محبيك
انت فوق اى منصب واغلى من اى قرار

عايزه اقولهم عمركم ما هتمنعوا نور الشمس انه يوصل لينا
وياريت تدخلوا على النت وتشوفوا محبين فاروق جويده الى فوق مستوى تفكيركم

ولا اقولكم
بلاش

لانكم اكيد عارفين بس بستهبلوا

المبدع الحقيقى هيظل مبدع ومش محتاج شهادة جوده منكم
المبدع الحقيقى يعنى فاروق جويده

طوابير ....طوابير ........طوابير

المشهد الاول

ام سعيد : ابو سعيد .انت يا راجل . قوم اصحى الساعه بقت 8 الصبح ؟ ياراجل قوم اتأخرت ع الشغل
ابو سعيد: ايه فيه ايه يا وليه سيبينى انام شويه انا هلكان طول النهار
ام سعيد: ياراجل الساعه بقت 8
ابو سعيد : يا نهارك الاسود 8 انا مش قلتلك تصحينى الساعه 6 ونص يا وليه انتى ناسيه ان الشغل بيبدأ الساعه 9 انتى عايزانى اترفد واقعد جنبك انتى وعيالك نشحت على باب السيده
ام سعيد: ايه يعنى ماانت لسه ادامك ساعه تعمل فيها الى انت عايزه
ابو سعيد: ساعه! صوتوا عليكى وعليا ساعه وسكتوا . انتى ناسيه يا وليه ان ورايا مشاوير وطوابير !
نسيتى طابور العيش ولا هتصوموا النهارده
وطابور الجمعيه ولا هتطبخى بمية الطرشى
وطابور مصلحة الكهربا الى حالفين لا يقطعوا علينا النور
انا عارف انك انتى وعيالك عايزين تخربوا بيتى
ام سعيد : نخرب بيتك ايه بعد الشر . هو انت ليك غيرنا انا وولادك سعيد ومسعود وسعد وسعيده وسعديه
ابو سعيد : سعيد ومسعود وسعديه
قال اسامى الدنيا خلصت ملفتش الا الاسامى دى اسميها ده من يوم ما ولدتهم مشفتش سعاده فى حياتى توب عليا بقى يارب
انا اقوم البس والحق نفسى
ام سعيد : ايه يا راجل مش هتفطر ؟
ابو سعيد : مش عايز اطفح مليش نفس سديتوا نفسى الهى يسد نفسكم

المشهد التانى
ام سعيد : ايه يا راجل ايه الى رجعك تانى ؟ ومال هدومك بقت 60 حته كده
ابو سعيد : الناس يا ستى اتسعرت طابور العيش بقى عامل زى الحرب العالميه الاولى والتانيه فى بعض
كويس انى خرجت سليم وماخدت ليش مطوه ولا سكينه
ياريت كمان لما تطبخى االنهارده ابقى فوتى زيت الجمعيه على المصفا لحسن شفت فيه حاجت لا تسر عدو ولا حبيب
وقولى لابنك اللى معندوش دم يبطل يفتح النور عمال على بطال انا دفعت دم قلبى النهارده فى الكهربا ومحفظتى مفيهاش غير 3جنيه

المشهد التالت
ابوسعيد: اوف هو الاتوبيس اتاخر كده ليه ؟ ده لو حده طابور تانى بس بالعرض . حلوه بالعرض دى . نياهاهاهاهاها
..........: طلع اللى فى جيبك لاشقك
ابو سعيد: ايه ده ؟ مين وعايز ايه؟
........... : عايز ايه ؟ عايز اتطلع فى جمال سحنتك لا لا عايز اناسبك . بقولك قب بالمحفظه لا جيب كرشك
ابو سعيد : اما انت حرامى فقرى صحيح ملقتش غيرى يا اهبل هو انا حيلتى حاجه متروح تسرق اللى ناهبين البلد ده انت حرامى نطع صحيح ومعندكش انتماء
...........: بقولك ايه يا راجل انت انت هتطلع المحفظه ولا ؟
ابو سعيد : خلاص خلاص خدها اشبع بيها
ابو سعيد : حرامىىىىىىىىىىى الحقونى اتسرقت

الناس : هيييييييييييييييييييييييييييييييييه
وهجموا ع الاتوبيس الى اخيرا وصل

المشهد التالت
المدير : يا حلاوته يا جماله ده ايه الهنا الى انا فيه ده يا ولاد حضرتك وصلت اخيرا الساعه كام يا خويا دلوقتى
ابوسعيد : معلش يا حضرة المدير انت لو تعرف اللى حصلى هتعذرنى
المدير: ايه يعنى هيكون حصلك ؟ هو هنا تكية ابوك تتاخر زى ما انت عايز لا يا خويا لا يا حبيبى مخصوم منك 3ايام
ابو سعيد : يا حضرة المدير هو انا ناقص كمان مش تخليك رحيم شويه
المدير : قصدك ايه ؟ طيب عشان الكلمه دى الخصم بقى 5 ايام وكلمه تانيه هتلاقيه عشره وانت وشطارتك
ابو سعيد : خلاص انخرست اهو حسبنا الله ونعم الوكيل

المشهد الرابع
ابو سعيد : ايه يا وليه اللى انتى مشغلاه ده
ام سعيد : دى اغنية الاستاذ فريد الحياه حلوه
ابو سعيد : الحياه حلوه ! على مين يا اختى ! اقلبى اقلبى دول عالم فاقيه هاتى النشره هاتى خلينا نشوف بلاوى الناس يمكن تهون علينا بلوتنا ولا هاتى اى برنامج من البرامج الكئيبه دى العاشره مساء ولا 90 دقيقه ولا الطبعه الاولى
المذيعه : هذا وقد نجح جيران المذكور فى انقاذه من عملية الانتحار التى حاول القيام بها وعلى لسانه جمله واحده فقط
( مفيهاش غير تلاته جنيه ! مفيهاش غير تلاته جنيه !)

ابو سعيد : اقلبى اقلبى ايه الهجس ؟ احنا ناقصين قلبة بطن
المذيع : هذا وستيم مناقشة مشروع خصخصة مياه نهر النيل فى جلسة مجلس الشعب غدا باذن الله
ابو سعيد : ...........................

( طا بور تانى ! طابور تانى!)

المشهد الخامس
الثرايا الصفرا
.........: مفيهاش غير تلاته جنيه !
ابو سعيد : طابور تانى !

الراديو : الحياه حلوه بس نفهمها

العلمانيه والملوخيه والابداع والصداع !

كل اما ادخل منتدى او موقع ع النت الاقى الكلمتين دول اللى بصراحه من كتر ما سمعتهم بقوا بيسببوا ليا حساسيه متنفعش معاها لا حقنة كورتيزون ولا مرهم البيتادرم (معلش المهنه بقى)
هم الكلمتين دول فى حد ذاتهم لا يعنوا ليا شئ يعنى مفيش عداوه بينى وبينهم الحمد لله علاقتنا زى الفل الله اكبر
هى المشكله ان الناس سابت كل حاجه فى الدنيا وماسكه فى الكلمتين دول كان مفيش حاجه تتناقش غيرهما (ماهم مثنى بقى)
يعنى انا هتسفيد ايه انى اناقش موضوع عن العلمانيه فى الظروف الحاليه
كأن يعنى كل مشاكل البلد خلصت والاحوال بقت تمام وعال العال وزى الفل والورد والياسمين بس واقفه على شعره واحده وهى العلمانيه هى دى يا جماعه الكلمه الناقصه فى حياتنا عشان نتممها ونكملها ونخليها ميه ميه ولا فراخ الجمعيه
او ان مشاكل البلد وبلاويها ومعاناة الشعب ومآسيه مستننين الكلمه السحريه دى علشان تخرجهم من الظلام والانحدار اللى هما فيه
يعنى بالكلمه دى هتتحل مشاكل البطاله والغش والاحتكار والكوسه والجوع والتشرد وتأخر الزواج واطفال الشوارع
طب انزل كده اسأل اى عيل من العيال المشردين عن معنى كلمة علمانيه قليل انا ما طلع سكينه ولا مطوه وغزك بيها
تصدقوا انا سمعت كذا وجهة نظر عن الكلمه دى وبصراحه كده ولا وجهة نظر علمت فى دماغى لانها بصراحه متهمنيش ولا تفرق معايا فى حاجه

نيجى بقى للابداع
يالهوىى على دى كلمه مطاطه
الابداع ده بقى المرادف العصرى للتطاول وقلة الادب
كل واحد عايز يطول لسانه حبتين ولا فيه سبه محشوره فى حلقه عايز يطلعها يقوم يعملها فى كتاب ويرد بمنتهى البجاحه (ده ابداع واحنا فى زمن الحريه يا متخلفين)
وطبعا بيستغل موضة المشى ورا الناس اللى بره اللى بيقولوا عليها (عولمه) ان احنا بلد حر على ارض حره ونعمل اللى احنا عايزينه
طيب يا كابتن ايه وجه الحريه فى التطاول على الناس ومنهم الرموز الدينيه العظيمه وساعات بتوصل للتطاول على ربنا استغفر الله العظيم
الحاجات دى مالها ومال الحريه انا عايزه اعرف ؟ حد يفهمنى يا ناس
يعنى انت لو واحد فعلا عندك فكر وهمك تغير احوال الناس سيبت كل المواضيع اللى تستاهل المناقشه والكتابه وقعدت لسه تفكر ربنا موجود ولا لا ولا الشخصيه التاريخيه الفلانيه كانت كويسه ولا بتمثل علينا
يا خويا لما تبقى مشاكلنا كلها تتحل ابقى اكتب زى ما انت عايز ولا انت عايز تعمل نفسك مثقف وواعى وخلاص
الحقيقه اللى انا عايزه اواجه بيها سيادتك ان انت مش عايز تبدع زى ما انت بتحاول تفهمنا ولا عايز تضيف زى مانت بتحوال تستغفلنا
انت ببساطه كده
عايز تشتهر وخلاص
مش مشكله بقى انك تعمل بلبله ولا شوشره
المهم ان اسمك يبقى على كل لسان
وناسى ان فيه ناس واقفه لنا ع الواحده
ناس نفسها ننسى دينا واخلاقنا وتربيتنا عشان يقدروا يوصلوا لنا
ناس عايزين يفرقونا على غرار سياسة (فرق تسد)
واول ما الناس دول يوصول لنا ويتحكموا فينا ابقى قابلنى لو خلوك تعرف تكتب كلمة واحده
يعنى انت كده بالنسبه ليا مش مبدع بالمره
انت بالنسبه ليا محدث شهره
يا محدث !!!!!!!!!!!!!!!!!

اطلع !!!!!!!!!! (سيد حجاب)

اطلع من عز الكتمه وقب واتمطع لعلع شب ولب
واصرخ للريح يا ابو قلب جريح
وارجع عيش زى ما كنت تحب وافرح بالدنيا واتمتع
سوق بينا يا صاحبى لاخر الكون
خلينا نفوق خلينا نكون
خلينا نعيشها بطيش وجنون يمكن يبقالها طعم ولون
وساعتها من الفرحه ندمع
اطلع اطلع اطلع اطلع
الدنيا متديش للقاعد
ولا للى عنها بيتباعد
ربك واحد عمرك واحد والفرحه متفرحش لجاحد
وانا عمرى م الفرحه ما هشبع
اطلع اطلع اطلع اطلع

حوار مع نفسى !!

بخته مايل

استوقفتنى دايما الكلمه دى اللى بتكون متداوله على لسان الانسان دايما
ممكن تقولها ام على ابنها
زوجه على زوجها
اخت على اخوها
والعكس صحيح
انا نفسى كتير بقول الكلمه دى دايما
حظى وحش
حظه هباب
الناس طبعا مش شايفه اى شئ فى الجمله دى لكن انا لما وقفت مع نفسى وضميرى وسالتهم هل الجمله دى حرام
(ايوه حرام) وانا متاكده من كده
احنا ايه عشان نقدر نجزم ان ده حظه وحش او حظه حلو دى حاجه مكتوبه ومعروفه عند ربنا وربنا اعلم بيها
انا فعلا لما بشوف كل حاجه بتحصل حواليا بستعجب ساعات
لما بلاقى انسان طيب ودايما بيكون انسان طيب ومحترم ومتدين والاقى الظروف مش مساعداه ومش ماشيه معاه ودايما الى حواليه يتحسروا عليه ويقولوله
(يا عينى ده انت بختك مايل قوىى) وهو ساعات تيجى عليه الاوقات ويغلط ويسال ربنا ويقوله (انا عملت ايه عشان يحصل لى كل ده الناس اللى متعرفش ربنا
واخده كل حاجه فى الدنيا )
بس حاجه واحده واهم حاجه مش بتيجى على بالنا
الابتلاء
ليه مش بنفكر فى الكلمه دى
بدل ما نقول ده حظه مايل ليه مانديش الكلمه معناها الصحيح (الابتلاء) وما اعظم الكلمه دى
يقول الله تعالى فى كتابه العزيز
(ولنبلونكم بشيء من الخوف والجوع ونقص من الاموال و الانفس والثمرات وبشر الصابرين)
( سورة البقرة: 155)

ياه ع الكلمه الاخيره دى (وبشر الصابرين)
كلمه بتحمل كل معانى عظمة ربنا واللى احنا بنقراها بتعدى علينا وخلاص من غير ما تهزنا من جزانا ونحس بيها
لو افتكرنا الجمله دى فى كل حياتنا مكنش بقى فيه اكتئاب ولازهق ولاياس

فعلا الناس الطيبه هى اللى ربنا بيتليها لانه بيحبها لو هم حسوا كده وفهموه هيرتاحوا قوىى

قال رسول الله صلى الله عليه وسلم : (عجبت من أمر المؤمن ، إن أمر المؤمن كله له خير ، وليس ذلك لأحد إلا المؤمن ، إن أصابته سراء شكر فكان ذلك له خير ، وإن أصابته ضراء فصبر فكان ذلك له خير)
تخيلوا كله خير فى حير
اذا كان اعظم البشريه وهم الانبياء عليهم الصلاة والسلام كانوا اكتر ناس مبتلين فى الدنيا
واولو العزم منهم هم اللى تحملوا اكتر مما يتحمله اى بشرى
وهم (نوح - موسى-عيسى- محمد)عليهم كلهم الصلاة والسلام
هل يا ترى ينفع نقول على دول بختهم مايل ده حتى حرام

ربك لما يريد

- اللهم انى أعوذ بك من دعاء لا يسمع , و علم لا ينفع , و قلب لا يخشع , و نفس لا تشبع , و عين لا تدمع

الهم ما انى اعوذ بك من دعاء لا يسمع او دعوه لا يستجاب لها
كنت دايما لما بدعى الدعاء ده بييجى فى بالى معنى واحد
ان دعاء لا يستجاب له معناها ان ربنا مش راضى عنى عشان كده مش بيستجيب دعائى
لكن فى الفتره الاخير جه معنى تانى على بالى ومش عارفه اذا كان صح ولا غلط
ان معنى دعوه لا يستجاب لها انى ممكن ادعو ربنا بشئ يكون شر ليا وانا معرفش
عشان كده ربنا مش بيعمله ليا لانه عارف كويس ودايما عايز يكتبلى الخير دايما
هل يا ترى جه فى بالكم المعنى ده ولا انا الوحيده اللى مكنتش عارفاه؟

فيه حكمه قريتها وعجبتنى قوىى
فيما معناها ان ربنا بيدى لينا الشئ اللى احنا محتاجينه مش الشئ اللى احنا عايزينه
فرق شاسع بين الكلمتين
لو كان اللى احنا عايزينه مش هو الى محتاجينه
وبيكون الاتنين حاجه واحده لو اللى احنا عايزينه هو اللى محتاجينه

فى الحاله الاولى ربنا وحده هو اللى عالم وعارف اذا كان اللى احنا عايزينه ده خير لينا او لا
وفى الحاله التانيه اكيد ربنا بيدى لينا الاتنين فى بعض

وفى كلتا الحالتين احنا اللى كسبانين بس لو احنا فاهمين وعارفين
ربنا بيدى كل حاجه فى وقتها ولو ادى كل حاجه من غبر حساب النعم الكتيره هتفقد معناها ومش هتكون ساعتها نعم
يقول الله تعالى
( انما آمره اذا اراد شيئا ان يقول له كن فيكون )
ادعوا معايا الدعوه دى
يارب اكتبلنا الخير دايما

الدنيا\اآخره

طبعا مفيش اى نسبه وتناسب بين الدنيا والاخره
لكن فيه ارتباط
الدنيا هى الامتحان والطريق اللى هتمشى فيه لغاية ما توصل لاخرتك
يعنى الدنيا مهمه جدا مش زى ما ناس كتير بتقول انها ملهاش قيمه
لا قيمة الدنيا انت اللى هتحددها مش حد غيرك

انا سالت نفسى السؤال ده
ايه هى نسبة الدنيا على الاخره بالنسبه ليا؟
يعنى لما بعمل حساباتى فى الدنيا بفكر فى الاخره ولا مش بتكون على بالى؟
ولقيت الجواب للاسف اوقات كتير بيكون لا
دايما ببص تحت رجلى
وعمرى ما ببربط الدنيا مع الاخره ابدا
وده هتلافيه عندنا كلنا
يعنى دايما بنستنى ان كل حاجه حلوه تحصلنا فى الدنيا وبس
لما بنعمل عمل خير دايما بنبقى مستنيين الجزاء فى الدنيا وبس
لما بنشوف حد بيفترى ويظلم ورغم كده يعلى ويعلى نفضل نستغرب لان لسه مشفناش نهايته

مستنيين كل حاجه
النعيم
الحب
السعاده


طيب ليه مفكرناش ان احنا لو ملاقيناش كل الحاجات دى فى الدنيا انها هتتحقق لنا فى الاخره

كل واحد صالح هيلاقى الحاجه اللى بيدور عليها فى اخرته ان شاء الله
لكن احنا ديما بنبص تحت رجلينا دايما ومستعجلين على كل حاجه وعايزينها تحصل بسرعه بسرعه
مع ان احنا عارفين ومتاكدين ان اللى عند ربنا مش بيروح

لكن دايما نبص فى ناحيه واحده
مع ان كل حاجه بتكون فى الناحيتين

انت يا ترى النسبه دى عندك اد ايه ؟

بين السما ولارض

فاكرين الفيلم الرائع الخالد ده
اكيد كلنا فهنا الفلسفه والهدف الى جوا الفيلم
فعلا يا جماعه
معظمنا مش بيفكر انه يقرب من ربنا الا لما بيكون عايز منه حاجه
او فى ضيقه وعايز ربنا يفرج عنه
ولما الازمه تعدى معظمنا بيرجع لنفس الغلط تانى
والمشكله ان علاقة المصالح دى ممكن تمشى فى الدنيا بينا وبين بعض
لكن مع ربنا متمشيش ابدا
انا من الناس دى
فعلا
ساعات كتير لما بعوز من ربنا حاجه بقرب منه واصلى وادعى من كل قلبى
وممكن بعد كده ارجع وانسى تانى
هو ربنا غفور رحيم بينا دايما
ومش غلط ان انت لما تحتاجه فى حاجه تطلبها منه
لكن ده الواحد لما بيطلب من واحد تانى حاجه بيكون مكسوف وخجلان
تخيل انت بقى لما تطلبها من رب الكون ده كله
وكان لازم اسال نفسى
هل ياترى انا اللى بقرب من ربنا فى وقت زنقاتى هكون مثلا زى اللى فاكر ربنا فى كل وقت ومع كل دقة قلب وكل نفس فى صدره؟
اكيد لا طبعا
لكن نفس ىونفسى قوىى اوصل للدرجه دى ونوصلها كلنا

حساب مع نفسى

واخير انا مش داخله هنا عشان اوعظ او اوجه نصح او استعرض ثقافتى الدينيه عليكم
لكن انا بقالى فتره مش مظبوطه وحاسه انى عايشه ومش عايشه
يعنى ماشيه كده زى ما بيقول صلاح جاهين
مغرم عليك يا صبح مغصوب يا ليل

ساعتها دار الحوار ده بينى وبين نفسى
والسؤال الاخير هل ياترى انا كده صح؟
ماشيه صح؟

اكيد لا
وقررت اكتب الحوار ده علشان لما ارجع لنفس الدوامه تانى اقراه وافتكر كل كلمه فيه
يمكن زى ما بيقولوا التكرار يعلم الحمار

ياريت دايما نحاول نحاور نفسنا ونصالحها لان احنا ملناش الاهى وهى ملهاش الا احنا

احلام انسان

قال ايه مراد ابن آدم قلتله طقه
قال ايه يكفى منامه قلتله شقه
قال ايه يعجل بعمره قلتله زقه
قال حد فيها مخلد قلتله لأ




احب اعرفكم بنفسى
انا ..........

لاااا

قبل ما اعرفكم بنفسى احب اكلمكم عن حاجه اهم من اسمى و شخصيتى
حاجه بتشكل كيانى ووجدانى وفى نفس الوقت مأساتى
حاجه من غيرها مقدرش اعيش ولا انتم كمان تقدروا تعيشوا
حاجه لماتعرفوهاوتحسوها هتعرفوا وتفهموا انا مين

احب اكلمكم عن احلامى
احلامى
ياااااااااااااااااااااااااه على احلامى

لااااا متفتكروش انها احلام كبيره وعريضه وغاليه
اوعوا تفتكروا انى نفسى فى فيلا بحمام سباحه
ولا شاليه فى الغردقه ولا الساحل الشمالى
ولا عربيه اخر موديل متقدرش عينك تجيب طولها ولاعرضها
ولا وظيفه بمرتب خيالى

انا احلامى ابسط من كده
بس بالنسبه ليا اغلى واعظم
احلامى انى اصحى من نومى الاقى لقمتى وهدمتى
احلامى ان يكون ليا اربع حيطان يلمونى ويلموا اهلى من برد الشتا ومن حر الصيف
احلامى انى اتعلم واتنور علشان نفسى والناس اللى حواليا
احلامى انى اربى اولادى على الخير والحق لغاية ما يبقوا مدرسه فى فن الاخلاق والجمال
احلامى ببساطه هى
الســــــــــتــــــــــر والامــــــــــان

تفتكروا ان الحلم ده كمان بقى غالى عليا
ليه ؟
مش انا من حقى انى اعيش زى ما انا عايز لان ببساطه حلمى مش بيدوس على حلم حد

طيب ليه اللى حواليا مستكترين عليا الحلم ده
رغم ان عندهم كل الى هم عاوزينه ليه عايزين يحجروا على حلمى بالستر والامان
ايه الى هيفيدهم فى كده وهم مش حاسين حتى بوجودى
نفسى اصرخ فيهم واقولهم يانااااااااااس سيبونى فى حالى بقى
سيبونى اعيش زى ما ربنا عايزنى اعيش من غير ما تفتكروا ان الارزاق باديكم وانكم تقدروا تحكموا باعدامى وقت ما تحبوا

انا واللى زيى سيبنا لكم كل حاجه
المال
الجاه
القوه
السلطه

ليه حتى ابسط الحقوق بتثتكتروها علينا
احنا مش عايزين منكم حاجه غير انكم تسيبونا فى حالنا
غير انكم تسيبونا نعيش من غير ما نلاقى اقدامكم بتدوس على رقابينا

متفتكروش ان انا ضعيف
لاااااااااااااا
ولا غلبان زى اما انتم بتحبوا تسمونى
برده لااااااااااااا
انا قوىىىىىىىى
وقوتى مش من مالى ولا جاهى
قوتى من ايمانى
قوتى من احلامى
وانتم مش هتقدروا تهزوا ايمانى
ولا تسرقوا احلامى

لانهم ببساطه من حقى
وانا مش هعيش لو سبت حقى

وفى النهايه احب اقولكم

ليا رب اسمه الكريم


ها
ايه رايكم فى حكايتى
تنفع فيلم او مسلسل
او اغنيه لا بتقدم ولا اتاخر
اهم من كده
انتم عرفتونى
اكيد لا
لان ببساطه انا بالنسبه لغيرى كانى مليش وجود
لكن بالنسبه لربنا
انا موجود



التوقيع : مواطن

والجنسيه : انسان