الثلاثاء، 21 أكتوبر 2008

انا والراديو


اكتر وقت بنسى فيه نفسى وهمومى وانا معايا كتاب وبسمع الراديو
بغرق فى عالم تانى بتوه فيه عن احزانى ومتاعبى وبحس انى فى دنيا تانيه غير اللى انا عايشاهاوبيعدى عليا الوقت من غير ما احس بيه خصوصا لو كان الكتاب ده عن اشخاص زى ما حفروا اسمهم فى ذاكرة التاريخ حفروه فى قلوب كل الناس وخصوصا لو كان الصوت اللى طالع من الاذاعه صوت عبد الوهاب الرخيم (افضل صوت جه فى التاريخ) وبتمنى ان الوقت يقف بيا فى اللحظه دى وميعديش.
يا سلاااااااااااااام احلى مزاج




اعرف غنوتك من برجك
ده اسم برنامج سخيف سمعته فى الاذاعه وفكرة البرنامج ده لو كانت له فكره بتقوم على ان المستمع بيبعت للشخص ضيف البرنامج اللى انا معرفش هو بيشتغل ايه اساسا يقوله على برجه والضيف يستنتج ايه الاغنيه اللى هو بيحبها
يا حلاوه يا ولاد
ده غير بقى كلام من نوعية انت من مواليد برج ايه مش عارفه سنه كام وكوكب اورانوس داخل فى كوكب زحل فهتحصل حاجات محزنه
واخر فرصه للارتباط لبرج الدلو كانت فى شهر 6 وضاعت عليهم بس السنه الجايه هتكون فيه فرصه كبيره وطبعا لازم كل جمله تنتهى بجملة ان ده علم وان اولا واخيرا الله اعلم
سبحان الله
للدرجه دى الناس بقت فاضيه او يمكن يائسه ومستنيين واحد من خريجين مدارس هارى بوتر ولا تبع الاخوات هاليويل علشان يمسك الكره الزجاجيه ويقولهم ايه الى هيحصل وايه اللى مش هيحصل
هم مش عارفين ان الفرح والحزن والحب دول من عند الله
قاعدين ومكلفين خاطرهم ومضيعين وقتهم وفلوسهم على اس ام اس
فعلا اصحاب العقول فى راحه
طيب انا مثلا برج الجدى ياترى اغنيتى المفضله ايه
اكيد بحبك يا حمار ماهى كلها حيوانات منتجه






سمعت فى الاذاعه اغنيه طمنى لمحمد فوزى والى يعرفنى هيعرف عنى انى مدمنة قديم بكل ما فيه من افلام واغانى ومسرحيات بحس بنشوه غير عاديه لما بشوف ادامى حاجه ابيض واسود وبتسلطن كده لما بسمع محمد رشدى ولامحمد فوزى ولا عبد الوهاب ولا غيرهم طالع من الراديو من غير مؤثرات ولااجهزه حديثه تحس كده انا الصوت طالع نقى شفاف مغسول فى الغساله الفول اوتوماتيك
المهم فى اغنية فوزى لقيت المطرب العبقرى بيغنى الاغنيه من غير اى موسيقى والكورال اللى معاه كل واحد فيهم قايم مكان اله موسيقيه معينه بقيت اسمع وبقول سبحان الله ع الموهبه والعبقريه .ياترى لو جيبنا مطرب من بتوع الايام دى وشيلنا من حواليه كل المبانى والاعمده الى بيحطها جنبه وهو وبيغنى وقولناله اعمل زى محمد فوزى كده اعتقد ان ابلغ رد هيعمله ان الارض هتنشق وتبلعه







ابله فضيله صوتها حلو قوىى فى الاذاعه الله يرحم ايامك
كان نفسى الاقى الدنيا ابيض واسود زى ما كنتى بتحكيلنا بس لللاسف فيه الوان نسيتى تقولى لنا عليها





انا قلبى دليلى
لكن قالى مش هتحبى

هناك 7 تعليقات:

غير معرف يقول...

أنا بحبه قوي

وبحبك قوي

بس بإذن الله..هتحبي :)

فكريني بالراديو..وكل حاجة حلوة

والحواديت اللي تتوهي فيها


ودعوة إذاعية إلى مسرحية

والمسلسلات الإذاعية


وبرنامج..أسبوعيات طاهر أبو زيد إللي بابا بيسمعه ويبعت له :)


وكل حاجة حلوة فيه :)


الحاجة اللي لسة فاضلة حلوة :)

dr.lecter يقول...

الراديو عندي علاقتي به من الساعه 1 بالليل لغايه الفجر دايما مبسمعش فيه اي حاجه الا البرنامج الموسيقي العام غير كده

محمد فوزي باموت فيه وفي خفه دمه باحب افلامه جدا هو وفريد الاطرش مع ان الناس مابتطيقهومش مش عارف

The Seagull يقول...

علاقتي بالراديو تقتصر فقط على إذاعة القرآن الكريم .. مشغلينها 24 ساعة في اليوم :) .. ولمـا يصادف أنزل من البيت وراكبة تاكسي أسمع الشرق الأوسط او المنوعات أو الشباب و الرياضة و هكذا ..

بالنسبة للأبراج فأنـا علاقتي بيهم تقتصر على تفاصيل الشخصية فقط :D .. لكن تبؤات وكدة لا مابصدقش بقرأ من باب التسلية لا أكثر .. ولمـا بسمع حاجات من دي بقول لعله خير وخلاص :)

محمد فوزي أنـا بحب أفلامه وصوته وأغانيه جدًا .. وخصوصـًا استعراضاته .. جميلة اوي غير خفة دمه طبعـًا :D

قلبي دليلي .. ليه بس كدة؟ بلاش التشاؤم ده عشان خاطري :) .. إن شـاء الله هيحصل يا قمــر .. هتلاقيه طب عليكي كدة زي القضا المستعجل :D



ربنـا يوفقك يا قمر ..ابقي رني عليا يا وحشة :(

Fatma يقول...

لا هتحبي

وهتفرحي اوي

اوي يا ايمان

الحب حلو بس بيوجع اوي

بموت في فوزي وبحب الراديو والقراية انا كمان

بالنوسبة للابراج بقى

مالوش برج الحمل اغنيته ايه :))))

B a s o m يقول...

ايه الفيلم الابيض و اسود اللي و قعت فيه ده :)

ابله فضيله ... يااااااااااه يا ايمان كانت ايام !

الابراج مليش فيها خالص و لا صفات و لا توقعات و لا اي حاجه بتاتا

معرفش غير اني برج القوس :)

و بالنسبه ليلي مراد اكيــد هتلاقي انور وجدي قريب ان شاء الله

و دايما افتكري ان في حاجات بتتأخر و نظن انها مش هتيجي وربنا يبعتهالنا و بيبقي تاخيرها احسن لينا

خدي الحته التفائليه ديه .. الجااي احسن ان شاء الله و هافكرك قريب :D

الشارده يقول...

ايمان
هو طاهر ابوزيد ده الى بيلعب كوره؟

دليكتر
انا كمان بحب فريد جدا وبستعجب من الى بيكرهه مش عارفه ليه كتير مش بيحبوه فعلا
اهى اذواق

يويو
انا اكتشفت ان الحب ده طاقه مش لازم توجهيها لحد معين ممكن تفرغيها فى حاجات اهم بكتير

فنون
لو كنت اعرف ان الموضوع ده هيخلينى اشوف ردك كنت كتبته من زمان
وحشانى قوىى وسلامتك من الوجع ان شاالله الى يوجعك ......
للاسف مقالوش غنوة برج الحمل ولو انى راجح انها هتكون لام كلثوم لان والدى اللى يرحمه كان بيحبها وهو برج الحمل برده
اجدع ناس

باسم
انت برج القوس زى اختى
هتلاقيك رومانسى بافراط زيها
بس هو انت توعى على باله فضيله
متهيالى انك اصغر من كده

B a s o m يقول...

كنت هقول كده في ردي الاول اقصد موضوع الرومانسيه بس مرضتش :) .. انا فاكر موضوع اختك ده لما كنا بنتكلم عن اواخر الشتا البوم اليسا و الهيمان اللي بتسرح فيه لما بتسمعه :)

و بالنسبه لا بله فضيله سمعتها يمكن مش لايف بس سمعتها:) .. و بعدين يابنتي ده انا اوعي ع فحت البحر زي ما بيقولوا :)