الأحد، 26 أكتوبر 2008

صفحه بيضاء!!!!!!!!!!!!!!!!!!!!!


احنا جيل غلبان
دى حقيقه بقت واضحه وضوح الشمس ومفيش فيها اى شك
والغلب ده مش بسبب اللى شايفينه من فقر وومرض وسرقه وكوسه واحباط ويأس ومراره وبس
للاسف الوضع بقى اخطر من كده بكتير
مشكلتنا كشباب ان احنا كلما بيزيد عندنا الوعى والثقافه كل ما بتزيد خيبة املنا وصدمتنا
ساعات كتير بنتمنى ان تكون عقولنا انضف من الصينى بعد غسيله علشان منفهمش حاجه فى اى حاجه ولما منفهمش عمرنا ما هنفكر فى حقوقنا ابدا هنعيش وخلاص واهى دنيا وعيشه والسلام
لكن لما بتربى جوانا ان احنا بشر ولنا حقوق وعلينا واجبات مفيش اى حلول وسط ممكن تنفع مع اللى زينا
لازم هنفكر
ولما نفكر لازم هنقول لا اكتر ما نقول نعم
كلمة نعم سهله وبسيطه
لكن كلمة لا بتهز الجبال

ده غير بقى مشكله تانيه اخطر واكبر
ان احنا للاسف مش قادرين نلاقى قدوه لينا نتجمع حواليها ونتعلم منها
وطبعا بما ان احنا جيل مش بيفوت فسفوسه
وحاشرين نفسنا فى كل حاجه حتى التاريخ
فالتاريخ اللى احنا مدمنينه زى ماهو مصدر فخر واعتزاز لينا
بقى اكبر عنوان لخيبة الامل الى جوانا
وازاى ميكونش جوانا خيبة امل واحنا بنقرا عن الناس الى قبلنا الى كانوا شايفين قدوتهم بتتحرك ادامهم وتاكل وتشرب وتنفس

مش مجرد كلمات وسطور زى الى احنا بنقراها
بشر من لحم ودم
ابتداء من سيدنا محمد عليه افضل الصلاة والسلام
مرورا بابو بكر وعمر بن الخطاب والخلفاء الراشدين والصحابه
مرورا على الفاتحين العظام زى صلاح الدين الايوبى
انتهاء بالمناضلين الثوريين زى احمد عرابى ومصطفى كامل وسعد زغلول

يااااااااااااااااه
الناس الى قبلنا كانوا قد ايه محظوظين
ييجوا كده يتفرجوا علينا ويشوفوا
يشوفونا واحنا بنفتش حتى عن صباع قدوه مش لاقيين
ونضطر نلجا للكتب ونعيش معاها احلامنا ونقول اكيد جايه فى السكه بس اتاخرت شويه فى زحمة المواصلات
او تكبر الخيبه اكتر ونلاقى القدوه فى الناس الى بينطوا ادامنا فى التلفزيون ليل ونهار واللى الاعلام مظبطنها معاهم اخر تظبيط
تمشى فى الشارع تلاقى الشباب لابسين تى شيرتات عليها صوة تامر حسنى ولا البنات ماشيين يقلدوا حركات هيفاء المبتذله

حتى لما ربنا بيفتح علينا بحد ممكن نلاقى فيه الامل
الكبار بتوعنا يفضلوا يشوهوا فى صورته ويطلعوا عينه لغاية اما يسلم ويقول حقى برقبتى لان للاسف الناس دى مش عايزه يكون لينا قدوه
من مصلحتها ان احنا نفضل ضايعين

لما نيجى بقى نبص للاجيال الى جايه بعدنا دى ممكن تكون الحاجه الوحيده الى تحسسنا ان احنا مش منحوسين قوىى يعنى
طيب على الاقل احنا عندنا تاريخنا وابطال تاريخنا اللى احنا بنقرا عنه ونفخر بيه ونشوف فيه بارقة امل

لكن الاجيال الى جايه دى هتعمل ايه؟
هتلاقى ايه فى كتب التاريخ تقراه عننا؟
ياترى مؤرخين عصرنا ده بيكتبوا عننا ايه علشان الى جايين بعدنا يقروه؟
ايه الى احنا شايفينه فى حياتنا يستحق انه يتسجل فى كتب التاريخ؟
ولا تاريخنا هو كمان هيفضل جامد متحجر على اللى قبلنا وبس؟

سؤال صعب
الاجابه عنه سهله بس مؤلمه قوىىى
مكن تلاقى كلمة للاسف مع نهاية كل سطر
او تلاقى علامة استفهام كبيره وعلامة تعجب اكبر

ولو حظنا افضل من كده
ممكن يسيبوا الصفح بيضاء
ساعتها يمكن يكون عندنا امل
ونحاول نملى الصفح دى من اول وجديد

هنقدر نملاها
بس مين الى هيبتدى؟








هناك 5 تعليقات:

leeno يقول...

اااه

عارفة انا دايمق بقول التفاهة و الجهل نعمة صاحبها ما يعرف قيمتها الا لو فهم !!!

B a s o m يقول...

موضوع صباع قدوه ده ضحكني اووي .. مش عارف ليه فكرني بـ صباع كفته :D
و بعيدا بقي عن الكبابجي اللي فوق ده .. :)
انتي قولتيها في ناس كتير في البلد دي يهمها نفضل تايهين كده هايمين ع وجوهنا زي ما بيتقال عشان نفضل هايصين مع الهيصه.. قولوا ااه .. نقول اااااهين من بتاعت روبي :)
احنا اه يمكن جيل تايه .. بس عندنا امل كبير نبقي حاجه و قادرين بس دايما اللي بيعطلنا اننا شايفين ظروفنا مش سامحه لنا وده صح الي حد كبير
بس عارفه المفروض منفكرش كتب تاريخنا هتشيلنا ايه فيها للاجيال الجايه المفروض نفكر اننا نحاول نكون بجد ..وده المهم .. نكون بقي و لا لأ .. مش بايدينا!!
سمعتي اغنيه احمد ابراهيم اللي بتقول
اطمني بقي متخافيش .. سيبيها ع اللي فوق
مش عيب تحاولي متنجحيش مسيرها بكره تروق
مش لازم الانسان يموت من لدغه التعبان
يونس دعي من بطن حوت وصلت لاعلي مكان
المهم بس احنا نحاول ومنستسلمش .. النتيجه مش بايدينا .. خليها ع الله

Here i'm يقول...

ركبت مع سواق تاكسى بيقولى أنتوا جيل محظوظ .. جيل الأنترنت و الموبيل و الكومبيوتر ... قولتله خدهم و أدينى شقة ... قولتله مثل مش حينفع أقوله هنا :D ..

أحنا جيل مظلوم قوى ... و اللى ظلمنا أهلنا مش أى حد .. ظلمونا لما خلونا نطلع ع الدنيا و مبارك لسه بيحكم .. ظلمونا لما بدأوا يتكلموا و يعتصموا دلوقتى .. كنتوا فين من 20 أو 15 أو حتى 10 سنين .. ظلمونا لما رضوا بالظلم لغيرهم ...

يا ترى أحنا كمان حنظلم عيالنا ..؟؟

يا ترى أبنى حيقولى أنت ضيعت حقى .. ؟؟

يا خوفى

Mohammed يقول...

جاي اسلم عليكي يا غالية
مش حعلق علي الظلم
كفاية اللي حاسين بيه

The Seagull يقول...

أنـا تعبت من كتر التفكير :) والتزمت الصمت الأزلي عشان أرتاح من وجع القلب وقلبة الدمـاغ :) .. بناقص يعني

أصله أحمد عيد قالهـا في "ليلة سقوط بغداد" (احنـا جيل ضايع ضايع لا محالة)


بس :)