صندوق ذكرياتى مليان حاجات كتيير كتيير
من كل صنف ولون
وكل حاجه فيهم كنت بهد بيها الدنيا
انا الشجاع الشجيع
انا الفارس المغوار
انا البطل الرهيب
*******************
كوره
بجرى
بجرى
بجرى
جوووووووووووووووووووووووووون
الله عليك يا معلم
والله معلم
انت راجع معفر كده ليه ؟ مش قلتلك ارحم نفسك م الكوره شويه
ارحم نفسى ! ازاى ده انا الحريف انا كابتن الفريق
انا الاول وبس
********************
مسدس
بوم
بوم
بوم
انا مكنتش عايز مسدس
انا كنت عايز سيف
سيف بتار زى صلاح الدين
اركب الحصان زى الفارس واموت اعدائى يمين وشمال
ماهو انا فارس
بس من غير حصان
ياترى مين يجيب لى حصان
******************
جوابات
لسه ريحتها فيها
هجيبلك حته من السما
هلف الدنيا طولها وعرضها وهجيبلك خاتم سليمان
افركيه اتمنى
بس اوعى تتمنى حد غيرى
انا فارس احلامك الى جاى من بعيد
كل حياتى تحت امرك يا اميرتى
ماهو انا اميرك وانتى اميرتى
********************
صور
ضحكه من القلب
عيون فيها امل
لمه فيها دفا
ايدينا فى ايد بعض بس يترى كنا بنبص على ايه؟
*********************
دموعى
لما سيبتينى
لما عرفت انك هتكونى لحد غيرى
لما خلاص سلمت ان انا مش اميرك ولا انتى اميرتى
مفيش فارس بيكون متقيد
مش قادر اروحلك واقولك ليه مصبرتيش عليا؟
مش انتى قلتى ان انتى ليا؟
انا ذنبى ايه؟
غصب عنى
والله غصب عنى
ربنا يوفقك
********************
قصاقيص جرايد
بطل قعدتك ع القهوه ودورلك على شغله تنفعك
وظايف
وظايف
وظايف
بس للاسف ملقتش وظيفة فارس
ادور عليها فين؟
***********************
حبل
متكتف
متقيد
لازم احرر نفسى
مش هفضل كده طول عمرى
حد يساعدنى
يفكنى
يارب
يارب
يارب
لازم احاول لوحدى
اهو
قربت افكه
قربت
...............
هناك 10 تعليقات:
نترك المجـال للأخوة الشباب عشـان همـا أدرى بأحوالهـم مننـا :D جميل جدًا يا توأمتي بجد .. استمري ;)
حكاية بنت وحكاية ولد
انتى ايه حكايتك الاول ؟
وحشتينى اوى اوى يا ايمان
ووحشنى اقرالك بجد
علشان ماحدش ييجي يتهمنا اننا مجتمع زكوري والهبل ده
احنا زيكم بالظبط ضحابا لقيود واحلام واحباطات
مش عارف ليه يابنات ماحدش فيكم بيقدر يحس بمعاناه اي ولد لمجرد انها شايفه نفسها بنت وانها هي الضحيه الاكبر
ليه مابتتعمقوش فينا وفي نفسيتنا
انتم مش مدركين ان طفل او صبي بيفشل انه يحقق حلم له صغير بياثر عليه اد ايه بعد كده
حياته ممكن تتغير 180 درجه وافكاره وشخصيته
ممكن ورا الضحكه الصفرا بتاعته ودخان سيجارته ودقنه النصف ناميه يكون وراه حطام انسان
حطام طفل
حطام احلام انهارت وللاسف مهمها وقفت جنبه اي واحده بعد كده مش هيقدر يبقي مخلص لها لانه هيقارنها دايما باللي ضاعت منه
علشان كده البنت بتتهم الولد بالانانيه والخيانه وهي ماعندهاش فكره اد ايه هو بيعاني من جوه وبيدور علي نفسه
انا بتبعك من بعيد لبعيد اول مرة اعلق
تعرفي رغم اني بنت بس الاغلب بيصعب عليا الولاد سيبنا من الاولاد اللي نص كوم بس حياة الولد بتصعب علبا احس انه مفروض عليه قسوة لمجرد انه ولد لازم ما يعطش و لازم ما يتألمش و غيره
و كل ما كبر بيبقى مطلوب منه اكتر و تعبه اكبر بجد تحسي لو هنتكلم عن وضع طبيعي او عادي لولد هتلاقي حياته صراع و معافرة منه هو صغير
انا مش من البنات الى دايما بترمى كل حاجه غلط بتحصل للبنت على الولد
يمكن كنت زمان كده ايام اما كانت نظرتى مسطحه وضيقه لكن دلوقتى خلاص الحمد لله
سندريلا
مشاكل الولاد هى هى مشاكل البنات وممكن نسميها مشاكل الشباب لان كلنا فى الهوا سوا
امل
انتى واحشانى اكتر
متغبيش كتير وحكايتى هى حكاية كل بنت وحكاية كل ولد
ليكتر
انا حاسه بكل الى بتقوله لانى دايما بحط نفسى فى مكان الى ادامى
اصعب حاجه انك تكون متقيد بحبل ومش قادر تفكه ولو قدرت وفكيته الاصعب انك تفكر انك تعمل ايه بعد كده
reem
نورتى المدونه
وزى ما قلت فى الاول احنا بقيت بحس ان كلنا متقيدين للاسف بنات واولاد
نورتى مره تانيه
انا بقترح تضمى الموضوع ده مع الموضوع اللى قبله وتسميهم " حكاية جيل "
فعلا موضوع جميل وبسيط وبيحكى تقريبا مسلسل مكرر بحصل مع جيل بحاله ،،
نسأل الله التوفيق آميـن
:)
السلام عليكم
مصعب
حمد الله ع السلامه
عامل ايه؟
لو كنت اعرف ان الموضوع ده هيطلعكم كلكلم من المخابئ كنت فكرت فيه من زمان
الحياة صعبة
مش على البنت لوحدها و لا الولد لوحده
عموما الحياة صعبة على الكل
جزء من البنات ضحايا اولاد
و جزء من الولاد ضحايا بنات
و في مننا ضحايا مجتمعات و تقاليد بالية
بس في النهاية كل انسان (ولد او بنت)
بيقدر يقبل الي عايزه و يرفض اللي عايزة
الحريف والاحتراف
الدنيا او الحياة مبتدناش كل الا بنتمناة
مكنتش تكون دنيا تعب وحزن ودموع
كانت تبقي جنة لازم نقاسي لازم
اما الدموع فهيا الصديق الشخصي وكاتم
سر كل انسان
اما قصاقيص الجرايد
الشغل كتير بس شبابنا مش بيحبوا
يتعبوا او يبداؤ حياتهم تدريجيا
حيل
لازم احرر نفسى
مش هفضل كده طول عمرى
حد يساعدنى
دلوقتي محدش بيساعد حدزمن المصاعب
لابد الاعتماد علي الله اولاا والنفس ثانيا
تقبلي مروري
لينو
احنا ايوه هى التالته دى احنا كلنا ضحايا حاجات باليه انقرضت من ايام الديناصورات
وحشانى قوىى كلكم وحشنى انتم فين
القلب الحزين
شكرا على مرورك شرفتنى وشرفتى مدونتى المتواضعه جدا بس ياريت متكونش اول واخر مره
احب اشوفك تانى ان شاء الله
إرسال تعليق